2 Samwél 22 - Udél Dwata: Gna Kesfasad ne Lomi Kesfasad

Lingón Dabid dmóyón ke Dwata

¹ Kogol yóm kehewà Dwata ke Dabid lem hólól yóm kdê hohonen ne lem hólól Sol,

² ni se lingónen ebè Dwata, “Dwata se dou gónó heklung, gónóhu hofin, gónóhu gewà.

³ Dwata se do gónó heklung, gónóhu e mlo. Du se dou klung, kun kgis hewà do ne hbegel do. Dwata se gónóhu hofin, gónóhu gewà. Deng hewaen ou lem tdok yó kem tau mò sidek.

⁴ Tmabahe ebè Dwata, yóm knóón sendóyón, yakà deng hewaen ou lem hólól yó kem hohonu.

⁵ Yóm hatay, lómón ke lewók mohin gu hmilol do, ne hol lómón ke dunuk bong mulé tahu.

⁶ Lómón ke deng nféten ou hatay. Lómón ke deng wen holot naken bè lanu.

⁷ Bè yóm alì ksidek kegnómu du, tmabahe ebè Dwata. Htóbónge béléen. Tahu se, hnungolen ou bè yóm gónô gónóhen nô. Gungolen yóm tey kmou nmò ebéléen.

⁸ Lemwót bè yóm kebut Dwata yó kem hohonu, tódô megsinsig tonok, ne megsinsig tud blóngón longit.

⁹ Hol lómón ke wen kebel semfut gu lem ilungen, ne lómón ke wen ofi msut gu lem baken, mung du bala ofi kemyóngón.

¹⁰ Hennasen longit, ominen mnaul elaan. Ne tey kifu mget gónón mdà.

¹¹ Wen sotu hógów Dwata kemgis snakayen boluyen sirubim, Móyóng, ne tey kehlóngen mung bè lenos.

¹² Tey kifu mget hmilol du, mung du yóm tey lobun mfól hitem, hono él nô du.

¹³ Ya tey keslinangen yóm lemwót bè soluhen, sut gu lemen kal silà.

¹⁴ Heték Dwata gu bè longit, hetê yóm Dwata hol dandónen geta.

¹⁵ Gtien yó kem hohonen yóm tey kal silà, ne gotu le sekla mlóy.

¹⁶ Lemwót bè kudél Dwata, hesuten yóm tey kebuten, botong gfan sokol mohin, dalang se tud blóngón tonok.

¹⁷ Sigelen se mogot dou lemwót gu ta, ne nkayen ou gu lem yóm tey él nelem.

¹⁸ Hewaen ou lem hólól yó kem hohonu alì mbegel, kem hohonu alì mutó do nawa, lel le tey kemgis sentahu.

¹⁹ Bè yóm kdaw laen dù gmou, kulel se kul kundug do yó kem hohonu, okóm Dwata se hbegel dou.

²⁰ Nwiten ou ebè yóm gónón laen dù hemenu. Hewaen ou, abay se maan nawahen béléu.

²¹ Deng bnalà Dwata ou lemwót bè yóm ktedeng nmou, ne lemwót bè yóm klaen dù deng sidek nmou gónón malà dou.

²² Abay se deng lolou yóm kun lan Dwata, ne là kô knogolu du ke tô nmou yóm sidek.

²³ Yó kem hlau Dwata, là kô klifótu kul. Là kô knogolu du yó kem hloloen.

²⁴ Laen dù gónóhu mulé du, ne deng senyahu yóm salà.

²⁵ Yó gónóm mon, deng bnalà Dwata o lemwót bè yóm kmou yóm tedeng, ne lemwót bè yóm klaen dù sidek tonen béléu.

²⁶ Ó Dwata, teyi teneb bè yó kem tau teneb béléem, ne teyi hyu bè yó kem tau hyu ktonem du.

²⁷ Bè yóm tau laen dù belenen, bud hegfanem béléen se yóm kóm klaen dù belen. Okóm bè yó kem tau sidek nmò le, bud sidek se nmoem bélê le.

²⁸ Sal gel hewaem yó kem tau hulung heglaan, okóm gel tonem yó kem tau hegeta knô ne heglaanem.

²⁹ Ó Dwata, uu se dou layag, tendo hlayagem yóm gónón kmifu béléu.

³⁰ Lemwót bè yóm kehekgisem do, gbeku gemlà yóm sotu lumbuk yó kem hohonu, ne gbeku mkaf nô kihu beng hmilol syudad le.

³¹ Yóm kun klan Dwata, hono tedeng. Sal dohò ke wen fasaden. Dwata se klung yó kem tau gel hofin béléen.

³² Laen dù dumu Dwata, són yóm Dwata hol gónó mogot. Laen dù dumu gónó heklung, són yóm kut Dwata.

³³ Du se yóm Dwata tendo hekgis dou, ne tendo mentey dou bè lanu anì laen dù hemenu.

³⁴ Tey kehekgisem yó kem tihu, lómón kgis ti uhu, ne yó gónóhu gembek mlan gu ta yó kem tfusù bulul.

³⁵ Toloken o bè gida anì gbeku bemtul yóm boho nmò le bè tembaga.

³⁶ Yóm deng kehewaem do, lómón ke yó se klungu, ne yóm któbóngem do gónóhu alì gboluy.

³⁷ Deng hlamangem yóm lan hloloem do, yó gónóhu là tlidus.

³⁸ Ktesu yó kem hohonu, ne gotu genlau lu. Là kóe mulék ke là deng le gotu meglà.

³⁹ Gotu himotu lu, ne là kô le bud gebtik, gotu le masà gu laan tihu.

⁴⁰ Deng hekgisem ou bè gida. Lemwót béléem gónó le là gemmò béléu yó kem hohonu.

⁴¹ Gotu hlóyem yó kem hohonu. Gotu genlau yó kem tau mutó do nawa.

⁴² Tey ktaba le anì wen tmóbóng kul, okóm laen dù tau sut mò lemwà kul. Tmaba le ebè Dwata, okóm là kô bnalaen kul.

⁴³ Gotu lenunahu lu efet le meblibù lómón kfung, gotu ndau lu elaan efet le lemuna lómón hitok bè yó kem lan.

⁴⁴ Deng lenwaem ou bè yó kem tau sidek udél le etahu, ne deng bud hulékem ou mò mogot benwu, ne deng le mogot béléu yó kem tau là deng do hnikót tngón du.

⁴⁵ Gotu le heglaan béléu yó kem tólóng tau, ke gungol le o, tódô henmung nimón le o.

⁴⁶ Balù udì ke wen bud klóbô le, tódô setbol kkel le igò le hewà bè yóm gónó le gel heklung.

⁴⁷ Mowil Dwata. Dóyónu yóm gónóhu heklung alì mbegel. Hegetahu yóm dou Dwata, yóm Dwata mbegel lemwà dou.

⁴⁸ Du se Dwata gel meles yó kem hohonu. Heglaanen yó kem tau bè dumu benwu mò hogoten do,

⁴⁹ ne lenwaem ou lem hólól yó kem hohonu. Tey khegetahem do senta yó kem hohonu. Gel lenwaem ou lem hólól yó kem tau alì sidek nmò le.

⁵⁰ Lemwót bè nim nmoem ni, Dwata, angat dóyónu uu bè klamang benwu, ne lingónu yóm lingón dmóyón kóm.

⁵¹ Tey kehegmoem du yóm tau hol geta deng nélékem, ne tendo hegfanem béléen yóm tey kbong nawahem du. Laen dù sónen yóm kbong nawahem ke Dabid efet kól bè yó kem lugoden.”