2 Samwél 2 - Udél Dwata: Gna Kesfasad ne Lomi Kesfasad

Ketwél le ke Dabid hnolo mò tau hol geta bè benwu Juda

¹ Kogolen bè yó, snólók Dabid Dwata, “Bude mulék ebè yóm sotu benwu bè Juda kô?” Ne yó balà Dwata du, monen, “El, muléki etu.” Omin Dabid bud smólók, “Benwu du de gónów e mógów?” Ne yó balà Dwata du, monen, “Mógówi ebè Hibron.”

² Tahu se, mógów ebè Hibron Dabid, mung du yóm lewu kem yehenen, Ahinuam yóm libun lemwót bè Jisriil, ne Abigil yóm libun tehe yehen Nabal lemwót bè Karmél.

³ Nwit Dabid snéen yó kem tauhen, sket kul wen kem fes lówó le mung kul ne menwu le bè yó kem benwu lemnek snakuf Hibron glem lem Juda.

⁴ Omin le mógów ebè Hibron yó kem tau bè Juda, ne bè yó gónó le temwél hnolo te kulu Dabid, henbaling le tau hol geta bè Juda. Tikóng gungol Dabid yóm kebeng le ke Sol yó kem tau lemwót bè Jabis-gilyad,

⁵ yó gónón mdók tau ebélê le, wen udél hwiten kul, monen, “Dwata he hol muyag kuy lemwót bè yóm kehegfan ye yóm là konol nawa ye bè Sol, yóm tau hol geta bélê ye, botong lebeng ye.

⁶ Dwata he hol hegfan du bélê ye yóm kbong nawahen kuy ne yóm là konol nawahen bè yóm któbóngen kuy. Dalang se dou, wen ofol blayu kuy lemwót bè nim deng nmò ye ni.

⁷ Deng matay Sol. Duhen ni, hol ye hbegel ne hol bê ye abay hlikò. Deng nélék le ou yó kem tau bè Juda mò tau hol geta bélê le.” Là gomongen bè nili yóm bérs 8 efet kól bè tsaptér 4:12. Yó tulónen bè ni kem tsaptér ni yóm deng kogot Dabid yóm benwu Israél fi leged boluyen Juda. Yó fen kmandér bè yó kem sendalù Dabid, duhen Juab. Ne Abnér fen kmandér bè yó kem tehe sendalù Sol. Ne yó nmò Abnér, nmoen Isbusét, yóm ngà Sol mò tau hol geta bè yó kem tau Israél menwu fi bwak. Yó se buten yóm alì kesgida yó kem tau mung bè Sol ne yó kem tau mung bè Dabid. Ngangen sónmoen tendo temnù yóm kbegel Dabid mit tau, ne sónmoen minut mnà yóm kun kalak tau Isbusét. Timbow ton Abnér nim ni, tódô mógów ebè Dabid anì mung béléen, ne fasaden du gotu bud nwiten lu ebéléen snéen yóm kdê tehe sendalù Sol. Ne móyô Dabid. Bè yóm kungol Juab du nim ni tey sidek kebuten. Yó nmoen, snukaten Abnér, ne hnatayen. Tikóng gungol Dabid, ya tey sidek kebuten ke Juab, ne wen tey sidek hmulaen ke Juab kkólen bè yó kem angat lugoden. Ya tey klangag Dabid ke Abnér. Là legenen bè yó, matay Isbusét, hnatay yóm lewu kem tau mò nmò béléen yóm igoen tolo hegnô kemdaw. Nwit le kuluhen ebè Dabid, ofo kul mon du ke hligal du Dabid. Okóm là, abay se tódô hnatay le yóm tau laen dù salaen lem kun gónô bè yóm kun gónó tungô. Omin Dabid hfatay yóm lewu kem tau hmatay ke Isbusét yó koni. Ne hebengen kulu Isbusét bè gónó le lembeng ke Abnér bè Hibron.