2 Samwél 19 - Udél Dwata: Gna Kesfasad ne Lomi Kesfasad

Kbólów Juab ke Dabid

¹ Wen tmulón du ke Juab yóm kkik yóm tau hol geta, lenangagen Absalum.

² Yó gónóm mon, yóm tô kehligal le bè yóm kegmò le bè yóm kdaw yó, deng mom baling kdaw le langag bè yóm kungol le du yóm klangag tau hol geta yóm ngaen.

³ Gotu le ganag mulék holo elem syudad yó kem sendalù, lómón tô kem sendalù myak lan le mlóy gu lem gida.

⁴ Tódô snefeng Dabid hólól uyóhen igoen dmumu mkik, monen, “Ngau Absalum, Absalum, Absalume, ngau.”

⁵ Omin Juab husek elem dfél yóm tau hol geta, monen mò du, “Nim nmoem ni, deng henyakem yó kem sendaluem, igoen lu hlowil kóm, ne hlowil yó kem ngaem logi, ne ngaem libun, ne kem yehenem, ne kem libun nmuhem.

⁶ Nim nmoem ni, kbong nawahem yó kem tau mutó kóm nawa, ne nutó nawahem yó kem tau kembong kóm nawa. Tódô dilô me béléem kemdaw ni yóm klaen dù mu le béléem yó kem kmandér ne yó kem sendalù nalak le. Tódô tonu béléem mom hnigalem he ke gotu me matay yóm kdê me, ne fen mowil kun ke Absalum.

⁷ Duhen ni, hewai, ne henyuhem nawa yó kem sendaluem. Safau bè Dwata, ke là hewai, laen kô dù sendalù tebel béléem bè nim kifu ni balù sotu. Ke gotu le mulék, ni he yóm alì ksidek kwen gbunuem nbuten bè hanà kngaem efet nim kmoen ni.”

⁸ Tahu se, hewà yóm tau hol geta, ne myón bè yóm kun gónó gel myón bè bak tikeb yóm syudad. Wen tmulón du bè yó kem sendalù, mon le mò kul, “Ngem, deng myón bè bak tikeb yóm tau hol geta.” Omin le gotu mógów ebéléen yó kem sendaluen. Okóm kul yó kem sendalù Israél, kem sendalù mung ke Absalum, deng le gotu mlóy mulék ebè kul gónô.

⁹ Bè yó bè klamang Israél, gotu le skaf mon yóm kdéen tbong Israél, mon le, “Deng lenwà yóm tau hol geta tekuy lem hólól yó kem hohon tekuy, ne lem hólól yó kem Flistin. Okóm ni, deng mom henlóyen yóm kun benwu olo lemwót bè Absalum.

¹⁰ Okóm yóm Absalum deng nélék tekuy mò tau hol geta bélê tekuy deng matay. Moen ke là mebel tekuy lan anì bud semfulék elem blóng tekuy yóm tau hol geta?”

¹¹ Wen udél hwit Dabid ebè le Sadok ne Abyatar kem tau blóng ebè Dwata, monen, “Tulón ye yó kem tmuha malak bè Juda, ni se udélu ebélê le, ‘Moen du ke yu yóm són huli hfulék dou ebè yóm dou gónô? Deng gotu gungolu yó se kul kóyô yó kem tau Israél.

¹² Yu se kem dou dumu, dou unged, ne dou litô. Moen du ke yu yóm són huli hfulék dou?’ ”

¹³ Ne bud wen udél hwit Dabid ebè Amasa, monen, “Lemwót bè yóm kessotu litô te, Dwata he hol tmafak dou ke là nmou kóm kmandér bè yó kem sendaluu mò tles Juab.”

¹⁴ Lemwót Amasa, gotu sensotuhen nawa yóm kdéen tau malak bè Juda. Omin le hemwit udél ebè yóm tau hol geta, mon le, “Muléki edini ebélê me, dalang se yóm kdê tau mung kóm.”

Kulék Dabid ebè Jirusalim

¹⁵ Tahu se, mulék ebè Jirusalim Dabid yóm tau hol geta. Bè yóm kkólen bè Él Jurdan, senlong yó kem tau Juda bè Gilgal mò mit du mifal él.

¹⁶ Kewót Simi se kun yóm ngà Gira semfu gu bè Bindyamin, lemwót gu bè Bahurim, hetlasik semlong se kun mung bè yó kem tau Juda.

¹⁷ Wen lemibu tau mung du lemwót bè tbong Bindyamin, mung du snéen Siba yóm tehe tóbóng lówó Sol, ne yóm sfolò limu kem ngaen logi ne lewu folò tóbóng lówóhen. Gotu le heslò ebè Él Jurdan anì gna le kól bè yó.

¹⁸ Gotu le mifal él na le e tnóbóng mifal yó kem fes lówó Dabid. Móyô le mò du nô kihu hmò yóm tau hol geta kul. Hol móyón tô mifal se Dabid, tódô hegluduk bè soluhen Simi ngà Gira.

¹⁹ Yó udélen ebè yóm tau hol geta, monen, “Hol hnifótem ou bè yó kem sidek tehe nmou béléem bè yóm kdaw kewótem gu bè Jirusalim. Hol béem bud sù bè nawahem yóm yó.

²⁰ Tngónu se denge gemsalà béléem. Yó gónóm mon, ou gna semlong kóm bè nim kdaw ni lemwót bè kun sfu Jusif.”

²¹ Yó mon Abisay ngà Siruwaya, “Yake hnatay Simi lemwót bè yóm deng kehmulaen yóm tau hol geta deng kun nélék Dwata.”

²² Okóm yó mon Dabid, “Yu kem ngà Siruwaya, tedu se kmou kuy du? Hligal tekuy bè nim kdaw ni. Ou se bud tau hol geta bè Israél bè nim kdaw ni, laen dù tau hnatay.”

²³ Ne yó udél yóm tau hol geta ebè Simi, monen, “Ni fasadu kóm, là kói na a matay.”

Kehyu nawa Dabid ebè Mifibusét ngà Junatan

²⁴ Kewót Mifibusét bè yó se kun bè Jirusalim yóm témê Sol, senlongen Dabid. Lemwót bè yóm kdaw tehe kewót Dabid gu bè Jirusalim, là kô deng noloben du tihen, ne là se kóhen du dumu bngeten, ne là se hfuken du nesen.

²⁵ Bè yóm kegdek Mifibusét bè yó, yó udél yóm tau hol geta ebéléen, monen, “Moem là tehe mung do du, Mifibusét?”

²⁶ Bnalà Mifibusét, monen, “Ó dou gónó mogot, tngónem se kihode. Snukaten ou yóm tóbóng lówóhu Siba. Deng monu mò du, ‘Senyaem do yóm kudà asnuhu mò snakayu anì munge bè yóm tau hol geta.’ Okóm là.

²⁷ Tódô hnulu Siba yóm tulónen kóm. Okóm, tngónu hol lómón ke uu yóm hógów Dwata. Yó gónóm mon, tódô nmoem béléu yóm hyu béléem.

²⁸ Wen kwalisem hmatay kum yóm kdê fes lówó témê. Okóm mom yó nmoem béléu, hmungem ou mken bè yóm kóm lemisa. Là kóen bud hyu ne ke bude mni tóbóng béléem.”

²⁹ Yó udélen ebéléen yóm tau hol geta, monen, “Tongen yó ne. Deng eles hendemu, yake hensóól ye Siba yóm tonok téméem.”

³⁰ Yó udél Mifibusét ebè yóm tau hol geta, monen, “Tódô hensulék blayem du ne yóm kdéen. Deng gsengel nawaw du ne yóm bud kulékem.”

Yóm kehyu nawa Dabid ebè Barsilay

³¹ Gdek bè yó se ke Barsilay yóm tau lemwót bè Rugilim. Mosol se kun, mógów ebè Él Jurdan nan e tmóbóng mifal yóm tau hol geta.

³² Nim Barsilay ni deng tey tuha, deng wolu folò halayen, bede wen kendengenen. Du se tehe bemlay yóm tau hol geta ken bè yóm tehe klóyen ebè Mahanaim.

³³ Yó mon yóm tau hol geta mò ke Barsilay, “Hlósi mung dou mifal, ne tódói nô béléu bè Jirusalim, ne ou he temdof kóm bè yó.”

³⁴ Okóm yó balà Barsilay yóm tau hol geta, monen, “Là buden tahà ne ktauhu, là gbeku mung kóm ebè Jirusalim.

³⁵ Deng wolu folò ne halayu, là bud dilóu du ne yóm tilob ne yóm là tiloben. Là bud gnómu du ne nóm ken ne kem tifas grép. Là bud gungolu du ne sngal kem logi ne sngal kem libun. Là hyuhen ke bud henblaten uu yóm sotu tóbóng lówóhem.

³⁶ Yóm keslomongu kóm mifal ni, yó se yóm henged ofol blayem dou.

³⁷ Ke denge kól fatu, bud hulékem ou anì yó mataye bè yóm dou benwu, moni bè lebeng le mà lewu le yê. Okóm ni ngau Kimham, nwitem, ne nmoem béléen yóm hyu béléem.”

³⁸ Yó balà yóm tau hol geta du, monen, “Mung do Kimham, ne nmou béléen he yóm hyu béléem.”

³⁹ Omin le gotu mifal Él Jurdan yóm kdéen tau, ne mifal se kun ke Dabid. Nahen nelek Barsilay, ominen mni béléen bè Dwata. Omin Barsilay mulék ebè yóm kun benwu.

⁴⁰ Lemwót yóm tau hol geta hlós ebè Gilgal, mung du Kimham. Gotu le mung du mifal él yóm kdéen sendalù Juda, ne sóól bè yó kem sendalù Israél.

⁴¹ Omin le mógów ebè yóm tau hol geta yóm kdéen sendalù Israél, mon le mò du, “Moen de ke són yó kem tau bè Juda yóm tmóbóng kóm mifal dalang se yó kem fes lówóhem ne yó kem sendaluem?”

⁴² Ne yó balà le kul yó kem tau Israél yóm kdéen tau Juda, mon le, “Abay se yóm tau hol geta, hol kum dumu. Moen de ke lenbut ye nim nmò me ni? Là henkenen kum se yóm tau hol geta, ne laen se dù ofol blayen kum.”

⁴³ Okóm yó balà yó kem tau Israél yó kem tau Juda, mon le, “Semfu me bè sfolò tbong Israél se kum, bong yóm kum kwalis bè yóm tau hol geta senta ye. Ne moen se ke kenhisik ye mi? Igoen mi yóm gna semtulón du yóm bud khulék yóm tau hol geta.” Okóm alì sidek yóm udél yó kem tau bè Juda bè yóm keskuya le yó senta yóm kul udél yó kem tau Israél.