2 Samwél 18 - Udél Dwata: Gna Kesfasad ne Lomi Kesfasad

Katay Absalum

¹ Yó nmò Dabid, gotu sentifunen yóm kdê sendalù mung du, ominen mélék kem kmandér mò halaken bè libuhen ne mò halaken bè latuhen.

² Ominen mólól kul bè tlu lumbuk yó kem sendaluen, yóm sotu lumbuk fen nalak Juab, ne yóm sotuhen fen nalak Abisay yóm dumun setwoli Juab kem ngà Siruwaya, ne yóm sotuhen fen nalak Itay yóm tau Gitayt. Yó udél Dabid ebélê le, monen, “Bude mung kuy snéen dou.”

³ Okóm yó mon le mò du yó kem tau malak yó, “Béi mung kóm. Ke mlóy me se kum, là holen nô bè nawa yó kem hohon tekuy. Baluen he ke sóól matay bélê me, là holen nô bè nawa le snéen. Kaem uu yóm hol nalu hnatay le senta ke hmatay le sfolò libu tau bélê me. Yó gónóm mon, mom hyu ne ke tódói tebel bè ni bè syudad, henwitem mi tóbóng he ke wen mu me du.”

⁴ Yó balaen kul yóm tau hol geta, monen, “Yóm hyu bélê ye, yó se lolou.” Tahu se, tódô mdà bè yó yóm tau hol geta bè kilil yóm bak tikeb yóm igò le hewà yó kem sendalù, mlan bè latuhen ne bè libuhen.

⁵ Yó udél yóm tau hol geta ebè le Juab ne bè Abisay ne bè Itay, monen, “Hol bê ye abay hensidek dou yóm ngau Absalum.” Ne tódô kdê yó kem sendalù mungol du yóm udél Dabid ebè yó kem kmandér yó.

⁶ Tahu se, gotu le hewà yó kem sendalù Dabid na le e mit sfatay bè yó kem tau Israél. Bè yó bè Dlag Ifraim gónó le sfatay.

⁷ Là kô le gemmò yó kem sendalù Israél bè yó kem sendalù Dabid. Ya tey kdê tau matay bélê le bè yóm kdaw yó, botong lewu folò libu tau.

⁸ Ya tey klamang yóm gónó le sfatay bè yóm benwu yó. Tey dê he tau tódô matay gu lem dlag senta yó kem tau matay bè sudeng.

⁹ Bè yóm kesfatay le yó, smakay kudà asnu Absalum, ne tódô glebeten yó kem tau Dabid, ne mlóy smakay kudà asnu mlan laan yóm koyu mfól hangahen boluyen ok, ne gsangà kuluhen bè yóm tey hanga yóm koyu yó. Tódô hlós mlóy yóm kudaen, fen gsangà bè yó ke Absalum.

¹⁰ Wen tau mton du ne tulónen ke Juab, monen, “Deng tonu Absalum gsangà bè koyu ok.”

¹¹ Yó mon Juab bè yóm tau tmulón du yó, “Na. Tonem kô? Moem là tmibó du bè yó du? Ke deng tnibóhem, deng benlayu u sfolò botù blówón bukay ne hilet sendalù.”

¹² Okóm yó mon yóm tau mò ke Juab, “Baluen he ke deng nô lem hólólu yóm sfolò libu blówón bukay, là kô glefu hmatay du ngà yóm tau hol geta. Lelen yó he gungolu yóm udél yóm tau hol geta ebéléem ne ebè Abisay ne bè Itay, monen, ‘Hol bê ye abay hensidek dou yóm ngau Absalum.’

¹³ Ke deng snonolu yóm tau hol geta mlan bè khatayu yóm ngaen, ne laen kô dù gebnos béléen, kaem uu se gna hmatay dou.”

¹⁴ Yó bud udél Juab, monen, “Olohu mamà udas béléem.” Omin Juab ma tlu buyus, ne deken bè kfu Absalum igoen tolo mowil bè yóm gónón gsangà bè koyu ok.

¹⁵ Ne wen sfolò kem sendalù Juab smibut ke Absalum, omin le hmatay du.

¹⁶ Omin Juab huni du yóm féw bong anì teflok kektes kem sendaluen yó kem sendalù Israél.

¹⁷ Omin le ma lówó Absalum, ne bot le elem tum tey sol bong lem dlag, tódô hennok le botu tahen. Lemwót yó kem sendalù Israél, gotu le mlóy ebè kul gónô.

¹⁸ Bè yóm hanà tolo klowil Absalum, wen kun ilô hdà bè Datal Tau Geta, yó monen, “Laen dù ngau logi mò mit du yóm dou boluy mò hentulón nawa le.” Boluy yóm hehek yó yóm kun boluy. Efet nim kmoen ni, yó taba le du Hehek Absalum.

Klangag Dabid ke Absalum

¹⁹ Omin Ahimaas ngà Sadok mon du mò ke Juab, monen, “Hógówem o dé ebè yóm tau hol geta anì naw e tulón du yóm deng kehewà Dwata du lem hólól yó kem hohonen.”

²⁰ Okóm yó mon Juab mò du, “Bê. Béen uu tmulón du kemdaw ni, dumu kdaw he ktulónem du, là ni du, yakà dengen matay ngà yóm tau hol geta.”

²¹ Omin Juab mon du bè yóm tau Kusayt, “Lemwóti se kóm, tulónem yóm tau hol geta yóm deng tonem.” Nahen na kudung bè solu Juab yóm tau yó, ominen hetlasik mlóy. “Lemwóti se kóm, tulónem yóm tau hol geta yóm deng tonem.” Nahen na kudung bè solu Juab yóm tau yó, ominen hetlasik mlóy.

²² Yó bud udél Ahimaas ngà Sadok ebè Juab, monen, “Kihu bagiu, syan hol hfulihem ou yóm tau Kusayt.” Mon Juab se, “Moen de, ngà, ke alii móyô mógów yake wen sem ofolem du?”

²³ Yó bud udél Ahimaas, monen, “Kihu se, syan ke hole mógów.” Mon Juab se, “Yó ne, lemwóti.” Kewót Ahimaas bè yó, loloen yóm lan mahil dmatal Jurdan, botong du gegna bè yóm tau Kusayt.

²⁴ Lemwót Dabid, tolo myón bè bak tikeb yóm syudad. Lemwót yóm tau gel mentey, mkaf eta ketef yóm bak tikeb yóm syudad yó, tonen yóm tau tek sotuhen mlóy gu ditu.

²⁵ Ominen tmaba yóm tau hol geta ne tulónen du yóm tonen. Yó mon yóm tau hol geta mò du, “Ke tek sotuhen, wen tulón hyu nwiten.” Ne sónmoen minut moni yóm tau mlóy yó.

²⁶ Okóm yóm tau mentey yó, bud wen sotu tau tonen mlóy gu ditu, ne tmaba monen, “Bud wen sotu tau mlóy gu ditu.” Yóm balaen du yóm tau hol geta, “Bud wen se tulón hyu kun nwit.”

²⁷ Yó mon yóm tau mentey yó, “Dilô Ahimaas ngà Sadok yóm tau gna mlóy yóó.” Mon yóm tau hol geta se, “Hyu yóm tau yó, dô wen tulón hyu nwiten.”

²⁸ Omin Ahimaas tmaba ebè yóm tau hol geta igoen mlóy, monen, “Deng menek ne yóm kdéen.” Ominen hegdufok ebè tonok bè solu yóm tau hol geta, monen, “Hol dóyón tekuy yóm kóm Dwata hol gónó mogot. Deng hegmoen uu bè yó kem hohonem matù kóm.”

²⁹ Yó mon yóm tau hol geta, “Kmoen se yóm ngau Absalum du?” Bnalà Ahimaas, monen, “Yóm kdók Juab dou edini, tonu yóm gotu kesebwól yó kem tau, okóm là tngónu du moen.”

³⁰ Yó mon yóm tau hol geta mò du, “Nahem mdà bè yó he.” Tahu se, tódô mdà bè yó bè kilil.

³¹ Ominen gdek se kun yóm tau Kusayt, ne yó tulónen, monen, “Wen hyu tulónu kóm, Sér. Kemdaw ni, deng hewà Dwata uu lem hólól yóm kdéen tau hmohon kóm.”

³² Yó udél yóm tau hol geta ebè yóm tau Kusayt yó, monen, “Laen dù hemen ngau Absalum kô?” Bnalà yóm tau Kusayt, monen, “Yake yó hol bud gfà yó kem hohonem ne kdê yó kem tau matù kóm yóm kun gfà yóm ngà yó.”

³³ Tódô gleket bè yóm tau hol geta yóm ksidek kegnómen du, tódô mógów elem yóm dfél nô ta yóm bak tikeb yóm syudad, ne hebtuen dlumuhen. Yó udélen, monen, “Ngau Absalum, Absalum, Absalum. Yake ou dé matay, béen uu Absalum, ngau.”