2 Samwél 17 - Udél Dwata: Gna Kesfasad ne Lomi Kesfasad

¹ Yó bud mon Ahitufél mò ke Absalum, monen, “Hélékem o sfolò lewu libu tau na me ktes Dabid kifu ni.

² Tnanahu mundug du tolo miteg ne sidek kegnómen du anì slaf, ne gotu le mlóy yóm kdê tau mung du. Olohu hmatay yóm tau hol geta,

³ ne gotu bud nwitu lu semfulék ebéléem yó kem tau mung du, lómón yóm ngà libun lomi myehen bud mulék ebè yehenen. Olohem ma klowil yóm sotu tau, ne laen dù hemen le yó kem dumu tau.”

⁴ Ya tey kehyu nawa Absalum du yóm hlau yó dalang se yó kem tmuha bè Israél.

Yóm hlau Husay ke Absalum

⁵ Omin Absalum mon du, “Tnaba ye Husay se kun yóm tau Arkayt, bud hnungol tekuy se kun udél.”

⁶ Tikóng kól bè yó Husay bè Absalum, gotu tulón Absalum du yóm hlau Ahitufél, ne yó monen mò ke Husay, “Ni se kun hlau Ahitufél. Lolò tekuy kô yóm hlauhen duhen ke là? Tedu se kóm kmon du?”

⁷ Omin Husay mon du mò ke Absalum, “Bè nim kmoen ni, là hyuhen yóm hlau Ahitufél kuy.”

⁸ Yó bud udél Husay, monen, “Tngónem se yóm maem ne yó kem sendaluen, hono le tau hulung mit sfatay, ne tey le tolo lembut he ni, lómón kebut bér ke wen ma du béléen kem ngaen. Lelen yó he yóm maem hol sendalù deng layam bè sfatay, ne là kóen na a mung tungô bè yó kem sendaluen ke kifu.

⁹ Balù ni he, kaem deng wen kilib gónón hebnos duhen ke wen dumu sol gónóhen nô. Ke tódô le mundug yó kem sendaluem ne wen matay bélê le, ne ke wen temngón du, ngem kà mon le du, ‘Gotu le matay yó kem sendalù Absalum.’

¹⁰ Ke yó nmò le, balù yó hem sendaluem alì lóbô, lómón klóbóen liyun, kaem botong likò. Abay se tódô kdéen tau bè klamang Israél deng gotu temngón du yóm alì khulung maem sfatay dalang se yó kem sendaluen.

¹¹ Yó dou hlau kóm, gotu sentifunem lu yóm kdéen sendalù Israél lenwóten bè Dan fi bwak efet kól bè Birsiba fi leged. Ke yó nmoem, kaem lómó kwen le yó kem sendaluem, lómón helek bè kilil mohin, ne tódô uu malak kul ebè sfatay.

¹² Omin tekuy mebel ke Dabid balù kihu gónón nô, sulék tekuy tbó etahen gu laanen là deng temngón du, lómón ketbó amù ete tonok, là kô tngón tau du. Ke ni se nmò tekuy, kaem matay Dabid dalang se yó kem tauhen, balù sotu ke wen tebel.

¹³ Ke wen syudad gónón e mlóy, gbekem mdók yóm kdéen tau Israél anì wen tébéd nwit le mò kemteng beng yóm syudad yó etu etlem efet gotu lemusok yó kem botuhen.”

¹⁴ Yó mon Absalum ne kdê yó kem tau Israél, “Hyu yóm kun hlau Husay, yóm tau Arkayt, senta yóm kun hlau Ahitufél.” Yóm klolò le du yóm mon Husay yó, Dwata se mò du anì là lolò le du yóm hlau hyu Ahitufél, ne anì wen glumfak Absalum.

Eles kehetgama Husay ke Dabid anì mlóy

¹⁵ Omin Husay tmulón du yó kem tau gel blóng ebè Dwata bè le Sadok ne Abyatar yóm hlau Ahitufél ke Absalum ne yó kem malak bè Israél, ne bud tulónen kul se yóm kun hlau.

¹⁶ Yó monen mò kul, “Heslò ye, tulón ye ke Dabid, hol bê le abay tungô bè lan mifal Él Jurdan kifu ni bè kilil yóm benwu laen hol wen tauhen, hol le géhél mifal ne hlós elem yóm benwu laen hol wen tauhen anì là matayen yóm tau hol geta dalang se yóm kdê tauhen mung du.”

¹⁷ Lemwót Junatan ngà Abyatar, ne Ahimaas ngà Sadok, fen le mangat bè In-rogél bè lewà Jirusalim anì laen dù mton kul husek elem yóm syudad duhen ke hewà le gu lemen. Ke wen tulón sut, wen sotu ngà libun tóbóng lówó mò fen gel hgefet du ebélê le, ne lu fen bud hgefet du ditu ebè Dabid yóm tau hol geta.

¹⁸ Okóm bè yóm sotu kógów le ebè Dabid, wen ngà logi mton kul, ne tulónen ke Absalum. Yó gónó le kendel hetlasik lemwót yóm lewu le, mógów le ebè gónô yóm sotu tau bè Bahurim. Yóm tau yó wen sol kokol bè yó bè lósólen, ne bè yó gónó le hebnos lemen.

¹⁹ Lemwót yóm yehen yóm tau yó, nsengen bak yóm kokol yó, ominen hemdaw halay tahen anì laen dù dmilô du.

²⁰ Tikóng le gdek bè gónô yóm libun yó, yó kem tau dók Absalum, yó mon le mò du, “Nô se Ahimaas lewu le Junatan du?” Bnalà yóm libun, monen, “Tu deng le mifal él.” Ne hlós hnebel le lu, okóm là kô ton le kul, ne tódô le bud haking semfulék ebè Jirusalim.

²¹ Kogol yó kem tau yó koni, omin le kendel hotun eta gu lem yóm sol kokol le Ahimaas ne Junatan na le e kendel mógów ebè Dabid, ne gotu tulón le du kdéen. Yó mon le mò du, “Hetlasik ye mifal Él Jurdan kifu ni, abay se deng wen hlau Ahitufél ke Absalum anì kenfô le uu ne hnatay le uu.”

²² Tahu se, gotu le mifal Él Jurdan le Dabid ne yóm kdê tau mung du bè yóm kifu yó. Gu laanen là deng btù mata kdaw, deng tódô kdê le mifal yóm él yó.

²³ Tikóng tngón Ahitufél yóm là klolò le du yóm kun hlau, tódô lemwót, senyaen kudà asnuhen, ne mulék ebè yóm kun benwu. Wen kem udél tebelen bè yó kem fes lówóhen, ominen mówól liholen, ne matay. Ne lebeng le bè yóm kilib tehe gónó le lembeng ke maen.

²⁴ Deng le sana gefet bè benwu Mahanaim le Dabid. Okóm kul le Absalum ne yóm kdéen sendalù mung du, hanà le tolo mifal Él Jurdan.

²⁵ Yó nmò Absalum, néléken Amasa mò kmandér bè yó kem sendaluen mò tles Juab, yóm kmandér bè yó kem sendalù Dabid. Nim Amasa ngà Jitér semfu gu bè Ismaél, yehenen Abigil yóm ngà Nahas libun dumun setwoli Siruwaya yê Juab.

²⁶ Na le na kmamfù bè Gilyad le Absalum ne yó kem sendalù Israél.

²⁷ Bè yóm kkól le Dabid bè Mahanaim, wen tlu tau hmódó du bè yó. Yó boluy yóm sotuhen, Subi yóm tau Amunayt lemwót bè Raba ngà Nahas. Yóm gewuhen, duhen Makir yóm ngà Amyél lemwót bè Lo-dibar. Ne yóm getluhen, duhen Barsilay yóm tau Gilyad lemwót bè Rugilim.

²⁸ Wen kem igam nwit le ebè Dabid, ne kem kuleng, ne kem tukung. Wen ken nwit le, duhen halay wit ne barli, ne arina, ne halay senla, ne blangul, ne blotung.

²⁹ Wen tneben, ne tóbô, ne ubiha, ne tsis. Gotu blay le ke Dabid ne bè yó kem tauhen mò ken le. Yó mon le, “Mò ken ye yóm kdê ye, yakà tey ye miteg lel ye bitil ne meeng bè yóm tey kógów ye lem yóm benwu laen hol wen tauhen.”