2 Samwél 16 - Udél Dwata: Gna Kesfasad ne Lomi Kesfasad

Keston le Dabid Siba

¹ Timbow deng giwes Dabid ta tfusù yóm bulul yó, senlong Siba yóm tóbóng lówó Mifibusét. Wen lewu asnu nwiten lemulón lewu latu mambang ne lematu klangkang bungu grép, ne lematu klangkang dumu bungu koyu, ne hnok sning kulit yóm tifas grép gel ninum le.

² Yó udél yóm tau hol geta ebè Siba, monen, “Tedu de muhem du ni kem ni?” Bnalà Siba, monen, “Yó kem kudà asnu mò snakay yó kem tauhem, ne yó kem mambang ne yó kem bungu koyu mò ken yó kem sendalù mung kóm. Dalang se yóm tifas grép mò ninum yó kem lenmek bè yóm benwu laen hol wen tauhen.”

³ Ne yó bud monen mò du yóm tau hol geta, “Nô se Mifibusét du, yóm ngà yóm amohem?” Bnalà Siba, monen, “Tebel bè Jirusalim, abay se yó hendemen kemdaw ni bud hulék kem tau Israél ebéléen yóm tehe kegeta téméen Sol.”

⁴ Omin yóm tau hol geta bud mon du mò ke Siba, “Kdê yó kem nfun Mifibusét, gotu blayu kóm.” Mon Siba se, “Ou se sotu mò tóbóng lówóhem, ne tendo nmou kihu hmoem dou.”

Kehmulà Simi ke Dabid

⁵ Timbow le gefet bè Bahurim le Dabid, wen tau hewà bè yóm ngà benwu yó lemwót bè fes lówó Sol boluyen Simi ngà Gira. Yó nmoen bè yóm kehewaen, henmulaen Dabid.

⁶ Wen botu tudaen kul le Dabid ne yó kem genlalen. Ne gotu le nô hilol Dabid yó kem sendaluen alì mbegel.

⁷ Tódô htê Simi yóm igoen hemmulà ke Dabid, monen, “Mdóhi bè ni, yóm tau monok, ne tau hono sidek nmoen.

⁸ Deng bneles Dwata uu bè yóm litô Sol ne yó kem fes lówóhen, yakà deng nledem du yóm kgetahen. Okóm ni, deng blay Dwata elem hólól ngaem Absalum yóm kogotem benwu. Ngem, deng bud mulék etahem yóm tehe gel nmoem, yakà tauhi monok.”

⁹ Omin Abisay ngà Siruwaya mon du mò yóm tau hol geta, “Moen du ke tódô bayaem du yóm kehmulaen kóm yóm ohu deng matay yóó? Hógówem ou ebéléen dé naw kenleng kuluhen.”

¹⁰ Okóm yó mon yóm tau hol geta mò du, “Yu kem ngà Siruwaya, laen dù kuy du yóm nmoen yó. Ke lemwót bè Dwata yóm kehmulaen do yó, là hyuhen ke tô henseng te.”

¹¹ Yó udél Dabid ebè Abisay ne ebè kdê yó kem genlalen, monen, “Hol dou ngà se yóm tô malu hmatay do ni, milud he kutó nawahen do nim sfu Bindyamin nii, yakà kun dumu du Sol. Bayà ye du ne. Bayà ye du ne yóm kehmulaen, yakà deng hmò Dwata du.

¹² Déke ton Dwata he nim tey ksidek kegnómu du, ne du he bud malà du béléu hyu mò tles nim kehmulaen dou Simi kemdaw ni.”

¹³ Duhen yó, tódô henlós le Dabid ne yó kem tauhen yóm lan lolò le, ne tódô henlel Simi se kun hemmulà semdolol kul, bede mlan hilol bulul, lelen tmudà ke Dabid botu, ne kem kfung gotu tudaen ebéléen.

¹⁴ Bè yóm kkól le Dabid ne yó kem tau mung du bè Él Jurdan, ya tey sidek kliteg le. Na le na hegnô bè yó.

Yóm hlau Ahitufél ke Absalum

¹⁵ Kewót Absalum se kun, mung du yó kem tau Israél, gotu le mógów ebè Jirusalim, mung du snéen Ahitufél, yóm tau gel hmau yóm tau hol geta.

¹⁶ Tikóng mógów ebè Absalum Husay yóm wè Dabid, yó monen mò ke Absalum, “Hol tahà he ktauhem, Tau Hol Geta.”

¹⁷ Yó mon Absalum mò ke Husay, “Ni kô kmò ktenebem bè yóm weem Dabid? Moem là mung du du?”

¹⁸ Yó mon Husay, “Là. Yó gónów mung ne gónów mò nmò bè yóm tau deng kun nélék Dwata, ne kul nélék yóm kdéen tau Israél.

¹⁹ Lelen yó he, tau du se tô gónów tmóbóng du ke là bè ngà yóm ogotu du? Yóm tehe któbóngu ke maem, bud lómón yó se któbóngu kóm ni.”

²⁰ Omin Absalum beklil ebè Ahitufél ne monen mò du, “Tedu se atul tekuy ni du? Tulónem do ke tedu nmò tekuy?”

²¹ Yó mon Ahitufél mò ke Absalum, monen, “Wen kem libun nmu maem tebelen bè ni mò mentey yóm gónô bong. Mógówi etu bélê le nam e sentungô lu. Ke tngón yó kem tau Israél yóm alì khefebutem ke maem, ngem kà temnù ketgel le kóm.”

²² Tahu se, wen slung hdà le bè Absalum bè yóm gónó hnos ta ketef yóm gónô bong, ne ditu ta gotu sentungô Absalum lu yó kem libun nmu maen igò le temngel yóm kdéen tau bè yó.

²³ Bè yóm kdaw yó, ket hlau Ahitufél sal lolò Absalum lómón yóm tehe kun gel klolò du Dabid. Abay se yóm kmò kehedem le du yóm hlau Ahitufél kul, hlau lemwót bè Dwata.