2 Samwél 15 - Udél Dwata: Gna Kesfasad ne Lomi Kesfasad

Katù Absalum ke maen anì du tles tau hol geta

¹ Kogolen bè yó, wen klitun tók benli Absalum ne wen kem kudaen, ominen limu folò tau snukéyen mò mlóy tukô gna du.

² Tódô ket kdaw Absalum gel temkifu btik, ne gel mdà bè yóm kilil lan mógów ebè bak tikeb yóm syudad. Ke wen tau mlan bè yó tô mógów ebè yóm tau hol geta na a klamo, sal gel tnaba Absalum, monen mò du, “Gónóm gu lemwót de?” Yó balaen du yóm tau yó, monen, “Ou se sotu tóbóng lówóhem lemwót bè sotu tbong Israél.”

³ Yó bud mon Absalum mò du, “Tahu se yóm klamohem yó, okóm yó dum laen dù tau deng nélék yóm tau hol geta mò hmungol kóm.”

⁴ Bud mon Absalum, “Ke yó dum ou yóm gel kmukum, kaem mahil le hloni ebéléu yó kem tau wen klamohen duhen ke wen hkukumen, hentedengu kkukumu du.”

⁵ Ke wen tau hloni ebéléen ne heglaan bè kadaten du, sal gel nogot Absalum lem hólólen, ominen melek du.

⁶ Yó se gel nmò Absalum bè yóm kdéen tau Israél gel mógów ebè yóm tau hol geta na e tô hkukum du anì gwahen nawa le.

⁷ Tikóng deng fat halayen bè yó, yó mon Absalum bè yóm tau hol geta, “Yake hógówem ou ebè Hibron anì naw e hendohò yóm deng fasadu ke Dwata.

⁸ Abay se bè yóm tehe knóu bè Gisur yóm benwu snakuf Aram, wen fasadu ke Dwata, monu, ‘Ke bud nwit Dwata o semfulék ebè Jirusalim, angate mógów ebè Hibron naw e demsù béléen bè yó.’ ”

⁹ Yó mon yóm tau hol geta mò du, “Yó sen, lemwóti anì dnohoem yóm deng fasadem ke Dwata.” Tahu se, lemwót Absalum ebè Hibron.

¹⁰ Okóm deng eles wen lifut hógów Absalum ebè klamangen Israél, yó htulónen kul, monen, “Ke gungol ye yóm uni féw bong, hol hgel ye udél ye, mon ye, ‘Deng Absalum yóm tau hol geta bè Hibron.’ ”

¹¹ Wen lewu latu tau lemwót bè Jirusalim mung ke Absalum, kem tau deng tinoken. Ni kem tau ni, là kô tngón le du yóm atul Absalum.

¹² Yóm igò Absalum demsù ebè Dwata, hangayen Ahitufél yóm sotu bè yó kem gónón gel hmungol hlau yóm tau hol geta nô bè benwu Gilo. Duhen yó, sónmoen temnù ne tau mung ke Absalum, ne yó gónón mgemel yóm atulen matù ke maen.

Klóy Dabid gu bè Jirusalim

¹³ Wen tau sut bè Jirusalim tmulón du ke Dabid, monen, “Deng le gfi bè Absalum yóm kdéen tau Israél bè yóm katuen kóm.”

¹⁴ Omin Dabid mon du bè yóm kdê genlalen nô béléen bè yó bè Jirusalim, “Heslò ye, géhél tekuy mlóy. Ke là mlóy tekuy, laen dù bélê tekuy gewà ke deng kól bè ni Absalum. Heslò ye. Ke gafiten tekuy, hnatayen tu dalang se yó kem tau nô lem nim syudad ni, gotu hnatayen lu.”

¹⁵ Yó mon yó kem genlal bè yóm tau hol geta, “Kihu hmoem kum, tódô nmò me.”

¹⁶ Tahu se, lemwót bè yó yóm tau hol geta, mung du yóm kdê fes lówóhen, okóm wen sfolò tebelen bè yó kem libun nmuhen mò mentey gónô.

¹⁷ Tódô tmonok yóm tau hol geta, huli du yó kem tauhen, ne nahen htengen mdà bè yóm hol són gónô nius le bè syudad.

¹⁸ Gotu le mdà klohoken yóm kdê genlalen yóm igò le mius yó kem sendalù gel mentey du, kem sendalù Kiritayt, ne kem sendalù Pilitayt, ne yóm nem latu kem tau Gitayt tehe mung du bè yóm kewóten gu bè Gat, gotu le gna mò malak lan.

¹⁹ Omin Dabid mudél ebè Itay yóm tau malak yó kem tau Gitayt, monen, “Moen se kuy ke mung ye kum? Mulék ye, mung ye bè yóm tau hol geta Absalum, yakà tólóng ye tau se kuy, ne deng tebel ye yóm kuy benwu.

²⁰ Lomi ye kól bè ni se kuy, ne tô ye mung do tabag? Nim kógówu ni, là kô tngónu du gónów e mógów. Muléki, nwitem yó kem dumuhem. Dwata he hol hegfan du bélê ye yóm kbong nawahen kuy ne yóm là konol nawahen ebélê ye.”

²¹ Okóm yó balà Itay yóm tau hol geta, monen, “Safau hlanu bè boluy yóm Dwata là matayen, ne safau béléem, balù nô gónóm e mógów, tendohe mung kóm baluen ke mataye du.”

²² Yó mon Dabid mò ke Itay, “Yó ne, mung ye kum.” Tahu se, mlan le bè solu yóm tau hol geta le Itay ne yóm nem latu kem tauhen, dalang se yóm kdê fes lówó le.

²³ Ya tey kedlumu le mkik yóm kdéen tau mton du yóm kius le Dabid bélê le. Lolò Dabid yóm lan mifal Él Kidron, ne hlós le ebè yóm benwu laen hol wen tauhen.

²⁴ Mung snéen Abyatar lewu le Sadok, hono kem tau gel blóng ebè Dwata. Mung le snéen yóm kdê sfu Libay fen gel mit yóm Slungan Dwata, nô lemen yóm fasad Dwata kul. Na le hyón yóm Slungan Dwata yó efet le deng gotu hewà gu lem yóm syudad yóm kdéen tau mung.

²⁵ Omin yóm tau hol geta mon du mò ke Sadok, “Nwit ye semfulék elem syudad yóm Slungan Dwata. Ke hyu nawa Dwata béléu, bud nwiten ou semfulék ebè Jirusalim, ne bud tonu nim Slunganen ni dalang se yóm gónóhen nô.

²⁶ Okóm ke mon Dwata mò do, ‘Laen dù gónóhu hligal béléem.’ Ke yó udélen, ni se ou, tódô nmoen béléu yóm hyu béléen.”

²⁷ Yó bud mon yóm tau hol geta mò ke Sadok, “Ngem, mulék ye elem syudad lewu ye Abyatar, ne Dwata he henek nawa ye. Nwitem yóm ngaem Ahimaas ne Junatan yóm ngà Abyatar.

²⁸ Lemwót do, mangate ditu bè kifal Él Jurdan lem yóm benwu laen hol wen tauhen efet wen udél gungolu lemwót gu bélê ye.”

²⁹ Tahu se, bud nwit le Sadok mulék lewu le Abyatar yóm Slungan Dwata elem syudad Jirusalim, ne bè yó gónó le nô se kul.

³⁰ Omin Dabid mneged eta Bulul Ulib, igoen mkik. Tódô mógów hono hólól ti ne bnausen kuluhen, ilô yóm klangagen. Dalang se yóm kdê tau mung du, bud bnaus le se kul kulu igò le mkik mneged eta yóm bulul.

³¹ Wen tmulón du ke Dabid, deng mung bè Absalum Ahitufél. Yó gónó Dabid mni bè Dwata, monen, “Ó Dwata, henbalingem laen dù gónón e kól yóm hlau Ahitufél.”

³² Timbow gefet ta tfusù bulul Dabid bè yóm gónó le gel tmaba ebè Dwata yó kem tau, senlong Husay yóm tau Arkayt tehe gel gónóhen hmungol hlau, bede deng kenséen nesen ne bnulusen kfung lem kuluhen.

³³ Yó mon Dabid mò du, “Ke mungi do, laen kô dù gónóm tmóbóng do.

³⁴ Okóm ke semfuléki elem syudad, wen gónóm gemtóbóng do. Tulónem ke Absalum, monem, ‘Ó Tau Geta, ou se tehe tóbóng lówó maem yóm gónón gel hmungol hlau bè gnan kdaw. Okóm ni, móyóe mung kóm mò tóbóng lówóhem.’ Ke ni se nmoem, gbekem hemseng du do yó kem hlau Ahitufél.

³⁵ Nô le bè yó snéen le Sadok ne Abyatar kem tau gel blóng ebè Dwata. Hol tulónem kul ke wen gungolem bè gónô bong yóm tau hol geta.

³⁶ Nô bélê le bè yó snéen yóm lewu kem ngà le logi, Ahimaas kun ngà Sadok, ne Junatan ngà Abyatar. Tulónem kul kdê yó kem gungolem, ne lu fen bud tmulón du dou.”

³⁷ Tahu se, lemwót Husay yóm wè Dabid, mulék elem syudad. Ne geslaen se khusek Absalum se kun elem yóm syudad yó.