2 Samwél 13 - Udél Dwata: Gna Kesfasad ne Lomi Kesfasad

Kgaga kestungô Amnon yóm libunen Tamar

¹ Wen sotu ngà Dabid logi boluyen Absalum. Wen libunen boluyen Tamar, bede tey tilob. Bud wen sotu ngà Dabid logi boluyen Amnon, ne deng mom niwolen yóm libunen yó.Okóm yóm tô hendeen Amnon bè yóm libunen yó, là gmoen du, abay se hanà ngà libun, ne là móyô le ke gdulen bè logi. Botong gemnóm des Amnon bè yóm tô kehdeenen ke Tamar.

² Okóm yóm tô hendeen Amnon bè yóm libunen yó, là gmoen du, abay se hanà ngà libun, ne là móyô le ke gdulen bè logi. Botong gemnóm des Amnon bè yóm tô kehdeenen ke Tamar.

³ Okóm wen wè Amnon boluyen Junadab ngà Simiya, dumun sulil-lem Dabid, bede tey gel hulung mebel lan se kun.

⁴ Snólók Junadab Amnon, “Moen de ke tódô ketu hlafus mton kóm là hligal, igoem ngà tau hol geta? Tulónem do dé.” Bnalà Amnon, monen, “Tey bong iwolu ke Tamar, yóm libun Absalum dumuhu setwoli bè mà.”

⁵ Yó mon Junadab mò du, “Hlilili bè gónóm tungô, hlingóni hdongos gemnóm des. Ke nauy maem uu, monem mò du, ‘Hógówem dou edini libunu Tamar anì henkenen ou. Kóyóu ke du mò du bè ni bè soluhu yóm mò kenu anì tonu ne du hol hemken do.’ ”

⁶ Tahu se, hlilil Amnon, hlingón hdongos gemnóm des. Tikóng nauy tau hol geta, yó mon Amnon mò du, “Yake hógówem do edini yóm libunu Tamar anì mò dou mambang bè ni anì tonu, ne henkenen ou.”

⁷ Tahu se, wen tau dók Dabid ebè gónô bongen nan e hangay Tamar. Yó udél hwiten du, monen, “Mógówi ebè gónô logihem Amnon nam e mò mambang béléen kun.”

⁸ Tahu se, mógów Tamar ebè gónô logihen Amnon, ne hlós ebè yóm gónón hlilil. Omin Tamar ma yóm arina, ne nmoen mambang bè yó bè solu Amnon, ne tnógóhen.

⁹ Timbow deng tógó, kayen ebè soluhen, okóm là móyóen mken du Amnon. Yó monen, “Gotu ye hewà kem tau.” Tahu se, gotu le hewà yó kem tóbóng lówóhen bè yó.

¹⁰ Omin Amnon mon du mò ke Tamar, “Nwitem edini bè gónów tungô yóm mambang anì henkenem ou.” Tahu se, nwit Tamar ebè gónóhen tungô logihen Amnon yóm mambang tnógóhen yó.

¹¹ Okóm timbow tô henkenen, tódô ktos kteng Amnon, monen mò du, “Stungô te, libunu.”

¹² Bnalà Tamar, igoen mkik, monen, “Bê, igò te slogi, béem gnaga o. Là nmò le du kem logi Israél nim tey sidek ni. Ni se hol kenbê Dwata.

¹³ Tedu se uyó tô bud hegfanu bè kem tau du? Lemwót kóm angat tnaba le uu hol nungel bong bè klamang Israél. Yake stulóni bè tau hol geta anì hyehenen uu béléu.”

¹⁴ Okóm là kô hnungol Amnon ke Tamar, ne lemwót bè yóm kekgisen sentahen botong gutahen.

¹⁵ Yóm alì óyô Amnon ke Tamar yó, deng mom baling mkay bè yó he bud utó nawahen du, yó monen mò du, “Géhéli hewà bè ni.”

¹⁶ Okóm yó mon Tamar mò du igoen mkik, “Bê, yóm kehdóhem dou bè ni, ni se hol salà bong senta yóm deng nmoem béléu.” Okóm là kô hnungol Amnon du.

¹⁷ Mom tnabahen yóm logi tóbóng lówóhen, monen mò du, “Hdóhem bè ni bè soluhu nim libun ni, ominem kmunsì yóm tikeb beng.”

¹⁸ Tahu se, hdó yóm tóbóng lówó Amnon, ominen kendel tmikeb beng. Blaem bè yóm kdaw yó, lesek Tamar yóm nes tilob tahà wen soongen gel lesek yóm ngà libun tau hol geta ke tolo hanà ngà libun.

¹⁹ Okóm yó nmò Tamar, hensuen kfung ta kuluhen, ne kenséen yóm nes tilob leseken. Ominen lemwót, snefengen tdok uyóhen igoen dmumu mkik.

²⁰ Tikóng ton yóm logihen Absalum, snólóken, “Deng wen sidek nmò Amnon béléem kô? Béem alì hendem, yakà logihem du. Béen tafa nawahem.” Duhen yó, bè yó gónó Tamar nô bè gónô logihen Absalum, okóm tey sidek kebà nawahen.

²¹ Timbow tngón Dabid nim ni, ya tey sidek kebuten. Okóm là kô dog tnafaken ke Amnon yóm ngaen logi, abay se tey bong nawahen du, abay se du twogu bè kdê yó kem ngaen.

²² Laen dù udél Absalum ebè Amnon bè yóm nmoen yó, abay se tey sidek kutó nawahen du bè yóm deng nmoen bè libunen.

Kbeles Absalum ke Amnon

²³ Timbow deng lewu halayen miwes bè yó, nungus Absalum bul yó kem ubihahen ditu bè Baal-hasor, moni bè tonok Ifraim, ne gotu tinoken yóm kdê ngà logi yóm tau hol geta anì mung le béléen bè yó.

²⁴ Mógów ebè Dabid Absalum, monen mò du, “Nungusu bul yó kem ubihahu. Gbekem mógów e du kô dalang se yó kem genlalem?”

²⁵ Bnalà yóm tau hol geta, monen, “Là, ngà, ke gotu me mógów, bong blat béléem.” Ya tey kubug Absalum du, okóm là kóen móyô mógów yóm tau hol geta. Olohen slamat bè Absalum.

²⁶ Okóm yó mon Absalum mò du, “Yó ne, ke là se móyói mógów, olohem hógów ke Amnon ne yó yóm dumuhu setwoli.” Yó mon yóm tau hol geta mò du, “Moen de ke hógówem Amnon?”

²⁷ Okóm alì nubug Absalum efet hógów yóm tau hol geta Amnon dalang se yó kem dumu ngaen logi. Yóm kmò Absalum ken yó, hol lómón kmoen ken tau hol geta.

²⁸ Omin Absalum mon du bè yó kem tóbóng lówóhen, “Nangat ye ke deng alì lengel Amnon, ne ke wen ilô nmou bélê ye, hnatay ye. Bê ye abay hlikò, ou se mdók kuy. Hfól ye nawa ye, hnatay ye.”

²⁹ Tahu se, nmò yó kem tóbóng lówó Absalum bè Amnon yóm deng hlolò Absalum kul. Lemwót yó kem dumu ngà Dabid logi, gotu le hotun eta kudà asnu le, omin le lemwót mlóy.

³⁰ Bè yóm hanà tolo knô le bè lan, wen tmulón du ke Dabid deng gotu hnatay Absalum yóm kdê ngaen logi, balù sotu ke wen tebel.

³¹ Tódô hebkó mdà Dabid, gotu kenséen nesen, tódô lemfen te tonok botong klangagen. Dalang se yó kem tóbóng lówóhen nô bè yó, gotu bud kensê le se yóm kul nes.

³² Okóm gdek Junadab yóm ngà Simiya dumun setwoli Dabid, monen mò ke Dabid, “Là. Là kdéen du matay bè yó kem ngaem logi, tek són Amnon yóm deng matay. Hnatay Absalum, ne deng eles natulen nim ni lemwót bè yóm kdaw kgaga Amnon stungô bè libunen Tamar.

³³ Béen sidek kegnómem du yóm kmon le du deng le gotu matay yóm kdê ngaem logi. Kaem tek són Amnon néen yóm matay.”

³⁴ Ke Absalum kun, deng sana lemwót mlóy. Lemwót yóm sendalù gel mentey bè beng yóm syudad Jirusalim, wen tey tau tonen mosol gu ditu bè yóm lan gu bè Hurunaim. Lemwót yóm tau mentey yó, tódô mlóy ebè yóm tau hol geta, tulónen du, monen, “Wen tey kem tau tonu mosol gu ditu bè yóm lan gu bè Hurunaim.”

³⁵ Omin Junadab mon du mò yóm tau hol geta, “Ngem, tenngelem dé, yó se lu kem ngaem logi, lómón yóm deng tulónu kóm.”

³⁶ Unin deng kudél Junadab, gdek se yó kem ngà Dabid logi, nbut le bè yó mkik, dalang se ke Dabid ne yó kem genlalen, gotu le dmumu mkik se kul.

³⁷ Botong hilu kdaw Dabid lemangag ke Amnon yóm ngaen. Okóm ke Absalum kun, deng mlóy etu bè téméen Talmay ngà Amihud, yóm tau hol geta bè Gisur.

³⁸ Botong tlu halay Absalum nô bè Gisur bè yóm klóyen.

³⁹ Tikóng deng mkó klangag Dabid ke Amnon, yó mò du tey khahuen ke Absalum.