2 Samwél 12 - Udél Dwata: Gna Kesfasad ne Lomi Kesfasad

Kudél Natan ke Dabid

¹ Duhen yó, hógów Dwata Natan yóm tugoden, ebè Dabid. Yóm kkól Natan bè yó, monen mò ke Dabid, “Wen lewu tau nô bè yóm sotu benwu. Yóm sotu, wen kendengenen, ne fen élél yóm sotuhen.

² Yóm tau wen kendengenen ni, tey wen ubihahen ne safien.

³ Okóm kun yóm tau élél, balù udì ke wen nfunen, tek són yóm sotu ngà ubiha alì gnayam benlihen. Hbongen yóm ngà ubihahen yó, tódô lemnok béléen mung bè yó kem ngaen. Hkenen du yóm kun ken, ne hinumen bè yóm kun tegayan, lelen tendo smiwi du lómón ke ngaen libun hanà udì.

⁴ Sotu kdaw, wen tau mauy bè yóm tau wen kendengenen. Ne yóm tau wen kendengenen yó, là dog tnétéen du yóm kun ubiha duhen ke safien, deng mom nétéen yóm kun ngà ubiha yóm tau élél mò hkenen yóm tau mauy béléen.”

⁵ Bè kungol Dabid du yóm tulón Natan, botong lenbuten yóm tau wen kendengenen yó, yó monen mò ke Natan, “Safau mlan bè boluy yóm Dwata là matayen, yóm tau mò du yóm lómónen yó tódô hnatay.

⁶ Lemwót bè yóm klaen dù koduhen yóm tau élél, fat ubiha he bud tlesen du yóm sotu ngà ubiha deng nwahen.”

⁷ Yó mon Natan mò ke Dabid, “Uu se yóm tau yó. Yó udél Dwata yóm Dwata yó kem tau Israél, monen, ‘Deng tenwélu uu hnolo mò tau hol geta bè Israél, ne deng hewau uu lem hólól Sol.

⁸ Deng blayu kóm yóm gónô bongen dalang se yó kem yehenen. Deng suu tahem snéen yóm kogoten yóm benwu Israél ne Juda. Ke tolo udì béléem he nim ni, bud bong he tnuu du béléem.

⁹ Moen ke deng mom nuléhem ou, ne nmoem yóm tey sidek béléu? Deng hfatayem Uraya bè gida yóm tau Hitayt, lelem bud mled yehenen.

¹⁰ Yó gónóm mon, lemwót bè nim deng nmoem ni, tódô senflósen wen matay bè sudeng bè fes lówóhem dalang se bè yó kem semfu gu béléem, yakà deng nuléhem ou, ne deng nalawem yehen Uraya yóm tau Hitayt.

¹¹ Lemwót bè yóm deng nmoem, ou se Dwata angat mò du bè kem fes lówóhem nim ni, wen bè yó kem fes lówóhem angat matù kóm. Wen tau gónów bemlay yó kem yehenem, ne tódô sentungóen lu bè gónón hnas lem mata kem tau.

¹² Yakà deng lifut nmoem du yóm kóm salà, okóm yóm ktafaku kóm, tódô nmou kemdaw anì gotu ton yó kem kdê tau Israél.’ ”

Kehegsel Dabid bè Dwata

¹³ Yó udél Dabid ebè Natan, monen, “Denge gemsalà bè Dwata.” Ne yó mon Natan mò du, “Tahu se, bede deng hnifót Dwata uu, là kói matay.

¹⁴ Okóm lemwót bè yóm là kimónem ke Dwata, angat matay yóm ngaem.”

¹⁵ Omin Natan mulék ebè gónóen. Yó nmò Dwata, hleeden des yóm ngà Dabid bè Batsiba yehen Uraya.

¹⁶ Tey kehkodu Dabid bè Dwata bè yóm ngà yó, botong fasting, ne suloyen buteng hlilil talak tonok.

¹⁷ Mdà le klohoken yó kem tmuha genlal bè yó bè gónóen, nubug le anì olò mdà, okóm là kóen móyô ne là se kóen móyô mung kul mken.

¹⁸ Bè yóm ghituhen kdaw, matay yóm ngà. Likò yó kem tóbóng lówó Dabid tmulón du béléen yóm deng katay yóm ngà, yó mon le, “Yóm hanà tolo klowil yóm ngà, ke mudél tekuy ebéléen là kô hnungolen tekuy. Sélétem mon ne ke tô tulón tekuy du deng matay yóm ngaen, déke wen sidek nmoen bè knóen.”

¹⁹ Okóm tikóng ton Dabid yóm kesboyong yó kem tóbóng lówóhen, tódô tngónen deng matay yóm ngà. Ominen smólók, “Deng matay kô yóm ngà?” Bnalà le se, mon le, “El, deng matay.”

²⁰ Omin Dabid mdà, ne dyó, lenunolen hboo lówóhen, ne tenlesen nesen. Ominen mógów ebè Gónô Dwata, tey knihen ebè Dwata bè yó. Ominen semfulék ebè gónô bongen ne mken.

²¹ Ne yó mon le mò du yó kem tóbóng lówóhen, “Boluyen nim nmoem ni? Bè yóm tolo klowil yóm ngà, fastingi, lelem mkik. Okóm tikóng deng matay, mom yó he kebtikem ne kkenem.”

²² Bnalà Dabid, monen, “Yó gónóhu fasting ne mkik bè yóm hanà tolo klowil yóm ngà, hendemu déke tnóbóng Dwata o, bud hlowilen yóm ngà.

²³ Okóm ni deng matay, tedu muhu bud fasting du? Gbeku kô bud hlowil du? Là. Okóm bè hulin kdaw, ou se mógów ebéléen, okóm kun, là kô gbeken bud semfulék ebéléu.”

²⁴ Omin Dabid mifa ke Batsiba yóm yehenen, ne sentungóen, ne bud wen ngaen béléen logi, yó boluy le du Selumun. Tey kbong nawa Dwata du yóm ngà yó,

²⁵ yó gónón bud hógów ke Natan yóm tugoden anì boluyen du Jididaya yóm ngà yó lemwót bè yóm kbong nawa Dwata du.

Kled Dabid yóm syudad Raba

²⁶ Bè yóm kdaw yó, tolo nundug Juab yóm yê yó kem syudad bè Amon boluyen Raba, ne móyón gled le.

²⁷ Wen kem tau dók Juab ebè Dabid, yó tulón hwiten kul, monen, “Deng nundugu yóm syudad Raba, lelen yó, deng gwa me yóm gónó le gel ma él.

²⁸ Duhen yó, gotu sentifunem lu yó kem dù sendalù tebel bè yó, hendengem mled du yóm syudad anì uu gboluy, là ou du.”

²⁹ Tahu se, gotu sentifun Dabid yó kem dù sendalù tebel, omin le mundug ebè Raba, ne gled le.

³⁰ Nwa Dabid yóm kuruna nô bè kulu yóm kul dwata boluyen Molék. Yóm kuruna yó, nmò le gu bè tahu blówón, botong tlu folò limu kilu keblaten, ne wen kem botu sminang mebtes heklóón le du, ne sù le te kulu Dabid. Tey wen negef Dabid bè yóm syudad yó.

³¹ Gotu negefen yó kem tau bè yó, ne henbalingen lu mò hesek, dansóken lu lemgadì ne smokul ne mogot beyung, lelen dmansók kul mò yóm tonok miket nmò le mò ngom gónô. Bud yó snéen nmoen bè kdê yó kem syudad yó kem tau Amunayt. Omin Dabid mulék ebè Jirusalim, mung du yóm kdê sendaluen.