2 Samwél 11 - Udél Dwata: Gna Kesfasad ne Lomi Kesfasad

Kton Dabid ke Batsiba

¹ Tikóng deng kól yóm bulónen kinì kdaw, yóm bulón le gel sgida yó kem tau hol geta, hógów Dabid Juab, mung du yó kem sendalù genlalen ne yóm kdéen sendalù Israél anì na le e nundug yó kem tau Amunayt. Tahu se, gotu senibut le yóm syudad Raba yóm yê yó kem syudad le. Okóm ke Dabid, fen tebel bè Jirusalim.

² Sotu kdaw, btik Dabid bè yóm ktungóen kimel, ne yó nmoen, lelen mógów ta ketef bè gónón gel henos bè yó bè gónô bongen. Yóm igoen temngel eta yóm syudaden, tonen yóm libun dyo, libun alì tilob.

³ Omin Dabid mdók tau anì tngónen ke libun du tum tu. Yó tulón le du, mon le, “Du se Batsiba ngà Ilyam, yehen Uraya yóm tau Hitayt.”

⁴ Omin Dabid mdók kem tau anì na le e nangay. Tahu se, mung kul, ne sentungô Dabid. (Blaem lomi hólós Batsiba knóen, abay se lomi wen hen-gifaten.) Ominen mulék.

⁵ Tikóng tngón Batsiba deng mlutut, wen udél hwiten ebè Dabid, monen, “Denge mlutut.”

⁶ Omin Dabid tminok ebè Juab, monen, “Hógówem dou edini Uraya yóm tau Hitayt.” Tahu se, hógów Juab ebéléen.

⁷ Tikóng kól bè yó Uraya, snólók Dabid béléen ke tedu deng kmò le Juab ne yó kem sendalù mung du, ne deng kmò yóm kesgida le.

⁸ Omin Dabid mon du mò ke Uraya, “Muléki ebè gónóem nam hegnô bè yó.” Tahu se, hewà Uraya bè gónô bong yóm tau hol geta, ne wen basa hwiten du ebè gónóen.

⁹ Okóm là dogen mom mulék ebè gónóen Uraya, deng mom tungô bè bak tikeb yóm tau hol geta, slomong bè yó kem tau gel mentey bè yó.

¹⁰ Tikóng wen tmulón du ke Dabid yóm là dog kulék Uraya ebè gónóen, yó gónó Dabid bud tminok du, ne monen mò du, “Moen de ke là dogi mulék ebè gónóem ebuteng igoen deng tey legen kógówem?”

¹¹ Yó balà Uraya du, monen, “Blaem yóm Slungan Dwata ne yó kem sendalù Israél ne Juda, tolo le nô ditu bè lewà bè kamfù le. Ne nô ditu snéen kun ke Juab ne yó kem sendalù genlalen. Là gbeku du ke tóe fen mulék ebè gónô dou, ke fene tô mken ne minum ne stungô ke yehenu. Safau, là gbeku mò du yóm yó.”

¹² Omin Dabid mon du mò du, “Nahem nô bè ni sen kemdaw ni, haya he khuléku kóm etu bélê le.” Tahu se, nô bè yó bè Jirusalim Uraya bè yóm kdaw yó. Tikóng hayahen bè yó,

¹³ tinok Dabid anì mung béléen mken ne tey kehlengelen du. Tikóng kifu, bud senged snéen, là kóen mulék ebè gónóen Uraya, deng mom bud slomong tungô bè yó kem tau mentey bè bak tikeb.

Eles katul Dabid ke Uraya

¹⁴ Timbow hlafus bè yó, wen sulat hwit Dabid ebè Juab, hwiten ke Uraya.

¹⁵ Yó nô lem yóm sulaten, monen, “Bè yóm gónón alì kinì kesfatay ye, suem tukô gna kuy Uraya, omin ye tmebel du anì wen hmatay du.”

¹⁶ Tahu se, yóm igò le Juab lemibut hmusek yóm syudad, suen Uraya bè yóm gónó le gel nô yó kem hohon alì hulung sfatay moni bè beng yóm syudad le.

¹⁷ Gotu le hewà yó kem sendalù hohon le lem yóm syudad yó na le e mit sfatay bè Juab. Wen bè yó kem sendalù Dabid matay, ne gomong matay bélê le Uraya yóm tau Hitayt.

¹⁸ Omin Juab hemwit tulón ebè Dabid, gotu tulónen du yóm kmò yóm kesfatay le.

¹⁹ Yó hloloen yóm tau henwiten tulón, monen, “Ke deng deng ktulónem du yóm tau hol geta yóm kmò yóm kesgida tekuy,

²⁰ ne ke lembut, ne ke monen mò kóm, ‘Mò ye alì hloni ebè yóm syudad bè yóm kesgida ye? Là tngón ye du kô gbek le gemtì kuy gu bè yóm beng le?

²¹ Là klifót ye du kô yóm tehe katay yóm ngà Gidyun logi boluyen Abimélék bè Tébés? Wen libun tehe hebtang du etahen yóm gónó gmaling lemwót gu ta yóm beng ne matay. Moen du ke alì ye hloni ebè yóm beng?’ Ke ni snólóken béléem, tulónem du, monem, ‘Matay snéen Uraya yóm tau Hitayt tóbóng lówóhem.’ ”

²² Tahu se, lemwót yóm tau mit tulón yó, ne gotu tulónen ke Dabid yóm kdê htulón Juab du.

²³ Yó mon yóm tau mit tulón yó mò ke Dabid, “Alì le kemgis senta me yó kem hohon tekuy, gotu le hewà gu lem syudad le, okóm udul me lu efet le kól bè bak tikeb yóm syudad le.

²⁴ Bè yó gónó le gemtì kum yó kem tau mogot boho nô bè beng, ne wen matay bè yó kem sendaluem. Matay snéen Uraya yóm tau Hitayt.”

²⁵ Yó udél Dabid bè yóm tau mit tulón yó, monen, “Tulónem ke Juab, monem, ‘Béen abay hesbeweg kegnómen du nim gfà ni. Yakem wen se eles temngón du ke tau du yóm matay bè gida. Hol hbegelen kwiten sfatay bè yóm syudad yó anì gemmò ye.’ Ni se udélem ebéléen mò hgel nawahen.”

²⁶ Timbow tngón yehen Uraya yóm deng katay yehenen, ominen lemangag du.

²⁷ Tikóng deng yó kem kdawen langag, omin Dabid hangay du, nwiten ebè gónô bongen ne yehenen, ne wen ngaen béléen logi. Okóm yóm deng nmò Dabid yó, tey sidek bè kton Dwata du.