2 Samwél 1 - Udél Dwata: Gna Kesfasad ne Lomi Kesfasad

Ketngón Dabid yóm katay Sol

¹ Kogol yóm katay Sol, mulék Dabid gu bè yóm kegmoen bè yó kem tau Amalikayt, ne lewu kdawen na nô bè kun benwu bè Siklag.

² Tikóng deng tlu kdaw Dabid kól, wen sotu tau gdek bè yó lemwót gu bè kamfù Sol, gotu ksê nesen ne hono kfung lem kuluhen mò gónón hegfan yóm klangagen. Bè yóm kkólen bè Dabid, tódô hegluduk bè tonok bè soluhen bè yóm kadaten du.

³ Snólók Dabid, monen, “Gónóm gu de?” Bnalaen se, monen, “Mlóye gu bè kamfù yó kem tau Israél.”

⁴ Snólók Dabid béléen, monen, “Mò kmoen se? Tulónem do kun kmoen yóm kesfatay le?” Ne yó balaen du, monen, “Gotu le mlóy yó kem sendalù Israél ne tey dê bélê le matay. Matay snéen Sol dalang se yóm ngaen Junatan.”

⁵ Omin Dabid bud smólók yóm logi mit tulón yó, monen, “Kmò ketngónem du du yóm deng katay Sol lewu le Junatan?”

⁶ Bnalà yóm tau yó, monen, “Geslau yóm knóu ta bulul Gilbuwa, tonu Sol hetngù ta buyusen igò le deng móyón moni béléen yó kem hohonen mit klitun tók ne yó kem dumu le smakay kudà.

⁷ Bè yóm kebeklilen, tonen ou ne tnabahen ou. Bnalau, monu, ‘Tedu yó du?’

⁸ Ne snólóken ou, ‘Tau kóm de?’ Bnalau se, monu, ‘Tauhe Amalikayt.’

⁹ Yó monen mò dou, ‘Géhéli edini hnatayem ou. Tey sidek kegnómu du, abay se tey bong nim haliu, bede là géhéle matay.’

¹⁰ Tahu se, mógówe ebéléen ne hnatayu, abay se deng tódô tngónu là bud lowilen du tum tey halien. Ominu ma yóm kuruna nô bè kuluhen ne sotu bè yó kem blusù tahu blówón nô bè henmuen anì nwitu lu ebéléem, yóm gónóhu mogot.”

¹¹ Tódô kensê Dabid nesen, botong ksidek kegnómen du, dalang se yóm kdê tau mung du, gotu kensê le se yóm kul nes.

¹² Tey klangag le, gotu le mkik glok le fasting efet kifu lan le lemangag kul le Sol lewu le Junatan, ne yó kem sendalù Israél dalang se yóm kdê tau Israél, abay se deng tey dê bélê le matay bè sudeng.

¹³ Omin Dabid smólók yóm logi mit tulón béléen, “Gónóm gu lemwót de?” Bnalaen se, monen, “Tauhe Amalikayt, okóm menwuhe bè yóm kuy benwu.”

¹⁴ Yó bud snólók Dabid béléen, “Moen de ke glefem hmatay yóm tau hol geta deng kun nélék Dwata?”

¹⁵ Omin Dabid tmaba yóm sotu bè yó kem sendaluen, ne monen mò du, “Hnatayem nim tau ni.” Tahu se, tnibóhen ne matay.

¹⁶ Ne yó udél Dabid ebè yóm tau Amalikayt deng matay yó, monen, “Uu se mò du bè knóem nim ni. Lómón ke hfatayem knóem bè yóm ktulónem du yóm khatayem yóm tau hol geta deng kun nélék Dwata.”

Klanu Dabid kul le Sol lewu le Junatan

¹⁷ Omin Dabid hewót lemanu lanen lemangag kul le Sol lewu le Junatan.

¹⁸ Kogolen bè yó, gotu hdalangen yó kem tau bè Juda yóm lanu yó. Yó boluyen du, Lingón Boho. Ne deng snulat le bè Bok Jasar. Yó lanuhen,

¹⁹ Ó Israél, ta yó kem ngà bulul gónóhen matay yóm tau malak kuy. Deng le gotu masà bè yó tahen yó kem tau alì mbegel.

²⁰ Hol bê ye abay tulón bè yó kem hohon tekuy ditu bè benwu Gat, ne hol bê ye tulón bè syudad Askilun. Ke tulón ye bè yó, gotu le hligal yó kem libun Flistin. Gotu le hligal yó kem libun là hemtahu le bè Dwata.

²¹ Ó kem bulul bè Gilbuwa, hol béen abay wen amù etahem duhen ke kulón. Hol béen abay wen hulu tmowok bè yó. Yakà bè yó du gónón masà yóm klung Sol deng golu, klung yóm tau alì mbegel mit sfatay bè kem hohonen. Laen dù bud hemnolo du ne klungen,

²² Mlan bè sudeng Sol ne bè boho Junatan, tey dê matay bè yó kem hohon le alì mbegel.

²³ Yóm Sol lewu le Junatan, kem tau alì knóón, tey dê kembong nawa kul. Slomong le mowil, ne slomong le matay. Ke sfatay le, tey le metlasik senta yó kem banug, ne tey le kemgis senta yó kem liyun.

²⁴ Ó kem libun bè Israél, nkik ye Sol. Lemwót béléen se gónó ye lemsek nes hulô mebtes ne gónó ye mngom tahu blówón.

²⁵ Deng le matay bè gida yó kem tau alì mbegel mit sfatay. Bè yó ta yóm ngà bulul gónón matay Junatan.

²⁶ Tey klangagu kóm, Junatan, hol lómón ke uu yóm dou dumu sulil-lem. Tey deng kbong nawahu kóm. Ne hol kbong nawa bong yóm deng kbong nawahem dou, mkay senta yóm kun kbong nawa libun.

²⁷ Deng le matay ne yó kem tau alì mbegel mit sfatay. Tódô gbayà ne yó kem ngom le sfatay. Deng le matay ne.