2 Kurin 13 - Udél Dwata: Gna Kesfasad ne Lomi Kesfasad

Yóm hol són hlau Pol kul

¹ Ni se getluhu dulék tô mauy kuy. Ke angat wen hkukum ye dou, tódô lolou yóm tehe hsulat Dwata, yóm monen, “Song hentahuhem yóm duón le yóm sotu tau ke wen lewu duhen ke tlu tau yóm fen gemtanud du.”Yu kem tau deng tehe gel mò sidek ekni, ne yó kem dumu tau bè yó, ni wen eles tulónu kuy. Deng tehe eles tulónu kuy ekni bè yóm gewuhu dulék bud mauy kuy, bede bud nulitu bélê ye nim ni gu laan tekuy là deng bud ston. Yó udélu bélê ye, bè yóm bud kkólu bè yó, laen kô dù tau mò sidek ke là angat tnafaku du.

² Yu kem tau deng tehe gel mò sidek ekni, ne yó kem dumu tau bè yó, ni wen eles tulónu kuy. Deng tehe eles tulónu kuy ekni bè yóm gewuhu dulék bud mauy kuy, bede bud nulitu bélê ye nim ni gu laan tekuy là deng bud ston. Yó udélu bélê ye, bè yóm bud kkólu bè yó, laen kô dù tau mò sidek ke là angat tnafaku du.

³ Wen ilô hnebel ye kun mò gónó ye dmilô du yóm khudél Krays dou. Angat ton ye he yóm hnebel ye yó bè yóm ktafaku kuy. Angat gnóm ye yóm tey klóbô Krays. Angat hegfanen lem blóng ye yóm tey kfasangen.

⁴ Bè yóm tehe khatay le du, lómón ke laen kô dù kfasangen, okóm lemwót bè yóm kun kfasang Dwata, yó gónón bud mowil. Bè yóm deng kessotu me béléen, gbót me se kum bè yóm là kfasangen. Okóm bè yóm angat kógów me edyó bélê ye, bud me gbót bè yóm tey kfasang Dwata hlanen bè yóm kun klowil Krays.

⁵ Yake hol henklol ye dé yóm kuy kmò ktau ke deng ye tahu hemtahu. Deng tahu nô bélê ye kô Jisas Krays? Ke là nóen bélê ye, kéng ye yóm kehtahu ye.

⁶ Ke deng ye tahu hemtahu, kaem tódô tngón ye yóm kewóten bè Krays yóm nmò me.

⁷ Hol tendo gel hni me bè Dwata he anì laen dù sidek nmò ye. Là yó du hni me ke hol dilô tau yóm kewóten bè Dwata yóm gel nmò me. Okóm yó dé gel hni me anì hol tedeng kmò ye, baluen ke henkéng le yóm kewóten bè Dwata yóm nmò me ni.

⁸ Ke tedeng nmò ye, là kô hegfan me du hkawang yóm kfasang blay Krays kum. Són gónó me hegfan du, són bè yó kem tau smonol du.

⁹ Mom hyu nawa me gemnóm du ke wen gónó me lunog, syan ke kemgis ye yó dum kuy. Duhen yó, yó gel hni me bélê ye bè Dwata anì baling ye gulit.

¹⁰ Yó gónóhu gna hemwit sulat ebélê ye ni gu laan tekuy là deng bud ston anì laen dù gónóhu tmafak kuy soke kól dyó lem blóng ye. Yó hol muhen yóm kfasang blay Krays dou mò gónóhu tmóbóng kuy bè kehtahu ye. Sundu yó du muhen ke mò gónóhu hemsidek kuy.

¹¹ Duhen yó, kem dumuhu setwoli, hol ye gel hgulit. Hol hnungol ye ni kem hlauhu kuy ni. Hol sensotu ye kut nawa ye. Bê ye bud hesgólól kehedem ye. Ke ni se nmò ye, beyen bélê ye Dwata. Du se gónón lemwót yóm kesbong nawa ne yóm kenek nawa.

¹² Sok ye gel stifun yóm kdê ye bè yó, hol ye gel sfódó.

¹³ Tódô kdê ni kem tau hemtahu bè ni, tey gel kólóm le kuy.

¹⁴ Yó hem gónó tekuy mogot Jisas Krays hol tendo tmóbóng kuy, ne tendo gfan bélê ye he yóm kbong nawa Dwata kuy, ne yóm knóen bélê ye yóm Tulus Dwata.