2 Kurin 10 - Udél Dwata: Gna Kesfasad ne Lomi Kesfasad

Kbalà Pol yó kem tau hemkéng yóm khógów Dwata du

¹ Ou se Pol yóm mudél ebélê ye ni. Deng gungolu wen se bélê ye mon du kun, “Tey yóm Pol, gel mudél hdana ke nô bè ni. Kulel kehwiten udél des ke nô bè benwu mayuk.” Okóm bè nim gna udél hwitu ebélê ye ni, là desen, mom hlanu bè yóm tey kganag nawa Krays.

² Yó udélu ebélê ye, yake hol tenles ye kmò ye anì là gungol ye du yóm udél des soke kól dyó. Là kóe likò mudél kul yó kem tau gel mon du bè yóm gel nmò me lem blóng ye kun, hol me mkél bè kul kehedem yó kem tau te tonok.

³ Tahu se, tau me te tonok, okóm bè yóm kmò kwit me sfatay bè yó kem tolok sekban nwit le, là lemwóten bè kehedem tau te tonok.

⁴ Yóm ngom sfatay nwit me se kum, là kóen lemwót bè kgis tau te tonok. Okóm tódô lemwót bè kun kfasang Dwata, yó gónó me mseng du yóm kul ktolok. Bè yóm gel kwit le kum skaf mon, botong là bud gbek le malà kum.

⁵ Dalang se yó kem tau hegmón hemkéng ke Dwata, gbek me malà kul anì laen dù gmò le. Bè yóm kbalà me kul yó, botong tenles le kehedem le, ne baling le tau mimón ke Krays.

⁶ Ke deng gotu hegfan ye yóm kimón ye du yóm hlolò me kuy yó, yó he kógów me edyó. Ne ke tolo wen dumu tau là mimónen, yó he ktafak me kul.

⁷ Bélê ye kuy, són yóm gel ton ye ta yóm gel snolò ye. Wen se tau bélê ye bè yó kun mon du du kun hógów Krays. Yake nan hol hendem dé yóm tau yó, abay se mi snéen kem tau hógów Krays.

⁸ Balù yóm deng tô kegedlug ktulónu du yóm kwen kwalis me lemwót bè yóm gónó tekuy mogot, laen kô gónóhu myak du se. Abay se nim kwalis me ni, yó muhen mò lan me hbegel kuy bè kehtahu ye. Là kô yó du muhen ke gónó me gembà kuy.

⁹ Bê ye hendem ke yó muhen yóm sulatu ebélê ye ke hewóhu kuy.

¹⁰ Wen se gel mon du kun, “Tey des udélen yóm Pol ke bè sulat. Okóm ke suyó tekuy du, tey tau lunog, là hulungen mudél.”

¹¹ Yóm tau mon du yóm yó, hyu ke eles tngónen laen dù gónón stólóng yóm deng mon me mò kuy bè sulat me bè yóm tolo knô me bè ni, ne yóm angat nmò me béléen sok tekuy ston bè yó.

¹² Yó kem tau alì heklabak lem blóng ye bè yó, là kô gsenged me kul, là kô me gomong bélê le se kum. Tey le tau là hulung hedem se kul. Ofo kul mon du ke són lu temngón du yóm hyu, ne gsengel nawa le du yóm kul ktau bè yóm klolò le du yóm kul kehedem yó.

¹³ Okóm bélê me kum du, là kô na me e nmò du uléhen yóm gel tulón me kuy, són gel tulón me yóm deng hmò Dwata kum, gomong lemen yóm deng nmò me lem blóng ye.

¹⁴ Lemwót bè yóm kgomong ye lemen, laen kô dù gónó me mulé du yóm hmò Dwata kum bè yóm tehe kógów me ebélê ye mò mit yóm Tulón Hyu gbak ebè Krays.

¹⁵ Là kô me megsalù du kum yóm nmò deng gendeng dumu tau, yóm nmò là hmò Dwata du kum. Okóm lemwót bè yóm kgomong ye lemen yóm hmò Dwata kum, yó dé hendón me bélê ye ke hol mbegel yóm kehtahu ye, ne ke nan hol bud temnù yóm kmò me nmò lem blóng ye, syan ke là nulé me du yóm deng hmò Dwata kum.

¹⁶ Ke deng mbegel yóm kehtahu ye, omin me yó he bud na a hetngón du yóm Tulón Hyu ebè yó kem dumu benwu sentu ye. Ke yó nmò me, là kô hen-gled me du kum yóm kul nmò kem dumu tau ke mò tô gónó me megsalù.

¹⁷ Lómón yóm deng monen bè Sulat Dwata, yó monen, “Ke wen tau tô hton salù, yake yó dém nmò gónón mogot yóm hol saluen.”

¹⁸ Mom hyu dé yóm tau ke gónón mogot fen dmóyón du. Béen du fen dmóyón du yóm kun knô.