1 Samwél 9 - Udél Dwata: Gna Kesfasad ne Lomi Kesfasad

Keston le Sol Samwél

¹ Wen sotu tau alì wen kendengenen boluyen Kis, semfu gu bè yóm tehe Bindyamin. Yóm Kis ngà Abyér, téméen Siror, fuen Bikurat, fuyen Alfiya.

² Wen ngaen logi boluyen Sol, tey ngà logi knóón laen dù mkél du bè yó kem tau Israél. Tey tahà se kun senta yó kem dumuhen.

³ Sotu kdaw lana yó kem kudà asnu Kis. Yó mon Kis bè yóm ngaen Sol, “Nebelem kut yó kem kudà asnu lana, miti sotu bè yó kem tóbóng lówó te.”

⁴ Tahu se, wen sotu nwit Sol bè yó kem tóbóng lówó le ne tódô lenngeb le yó kem bulul lemnek bè tonok Ifraim, omin le hlós ebè yóm benwu boluyen Salisa mebel du yó kem kudà asnu okóm là kô ton le kul. Omin le bud hmalak yóm benwu Salim okóm là kóen nô bè yó, yó kem hnebel le. Omin le bud hmalak yóm tonok kun snakuf Bindyamin, bud senged là ton le kul.

⁵ Tikóng le kól bè yóm benwu boluyen Suf, yó mon Sol bè yóm tóbóng lówóhen, “Na te mulék, déke là bud kudà asnu du tnafa nawa mà, deng mom tu lewu te.”

⁶ Okóm yó balaen du yóm tóbóng lówóhen yó, monen, “Tagad he. Bè nim benwu ni wen sotu tau Dwata menwu bè ni. Tey kadat le du yó kem tau abay se kdê yó kem gel eles tulónen sal dohò. Mógów te etu béléen, déke angat tulónen kut gónó le nô yó kem kudà asnu hnebel te.”

⁷ Omin Sol mon du bè yóm tóbóng lówóhen yó, “Ke mógów te ebéléen, tedu se tô blay te du? Balù sem ken te, deng gotu ne laen dù mò nwit te ebéléen yóm tau Dwata yó. Tedu se tô nwit te ebéléen du?”

⁸ Yó bud balaen ke Sol yóm tóbóng lówóhen yó, monen, “Wen sotu ngà blówón bukay nô béléu. Blay te du nim ni anì tulónen kut gónó le nô yó kem kudà asnu hnebel te.”

⁹ (Bè yóm kdaw yó bè kem tau Israél, ke wen tô snólóken bè Dwata yóm sotu tau, yó gel monen, “Lemwót tekuy, mógów tekuy ebè yóm tau gel wen hton Dwata du.” Yó se tehe gel taba le yóm tau tugod Dwata.)

¹⁰ Ne yó mon Sol bè yóm tóbóng lówóhen, “Yó sen, lemwót te.” Tahu se, mógów le ebè yóm ngà benwu gónón nô yóm tau Dwata.

¹¹ Bè yóm igò le tolo mneged bè yóm ngà bulul bè yóm benwu yó, wen kem ngà libun geslong le mangay él ne snólók le lu, “Nô bè ni kô yóm tau gel wen hton Dwata du?”

¹² Bnalà yó kem ngà libun yó, mon le, “El, nô bè ni. Tódô ye hlós etu bè bak tikeb yóm benwu me. Hanà lomi kól koni nan e nalak yó kem tau demsù ta yóm bulul udì.

¹³ Ke deng ye kól bè yóm bak tikeb, angat ton ye gu laanen là deng lemwót eta yóm bulul udì nan e mken bè yó. Là kô le tagad mken yó kem tau deng tinok le ke là dengen kól bè yó se kun na a mni bélê le bè Dwata bè yóm dsù le. Heslò ye anì gafit ye.”

¹⁴ Tahu se, hlós le mneged ebè yóm benwu yó le Sol. Yóm kkól le bè yó, tódô sut Samwél hewà gu ditu tô mneged eta yóm bulul udì.

¹⁵ Blaem bè yóm kdaw gu laan Sol là deng gdek, eles stulón ke Samwél Dwata, monen,

¹⁶ “Haya lómón ni uras, wen tau hógówu ebéléem lemwót bè tonok Bindyamin. Tenwélem hnolo ta kuluhen anì du mò malak yó kem tauhu Israél. Du angat lemwà kul lem tdok yó kem Flistin, yakà deng tonu du yóm alì keglayam le yó kem dou tau ne deng gungolu yóm kni le tóbóng béléu.”

¹⁷ Timbow ton Samwél Sol, yó mon Dwata mò du, “Ni se yóm tau deng tulónu kóm. Du angat malak yó kem dou tau.”

¹⁸ Omin Sol hloni ebè Samwél bè bak tikeb yóm benwu yó ne monen mò du, “Ó Sér, tngónem kô kóm gónón seblà nô gónô yóm tau gel wen hton Dwata du?”

¹⁹ Bnalà Samwél se, monen, “Ou se yóm tau hnebelem. Gnahi do eta yóm bulul udì bè yóm gónô gel demsù na te slomong mken bè yó. Hlafus haya ktulónu du kóm yóm nô lem hendemem, ominu hulék kóm.

²⁰ Bong yó kem kudà asnuhem deng lana tlu butengen ni, béen bud tafa nawahem kul, deng ton le lu. Ni wen tulónu kóm, uu ne yó kem fes lówó maem, bélê ye gónón mefet nawa yóm kdéen tau Israél.”

²¹ Bnalà Sol, monen, “Olohe tau semfu gu bè Bindyamin se do, mi yóm tbong alì udì bè Israél ne yóm dou fes lówó alì glaan bè kdê yóm kum gónó gu semfu. Moen ke lómón ni udélem ebéléu?”

²² Omin Samwél mit ke Sol lewu le yóm tóbóng lówóhen ebè yóm dfél bong gónó le stifun ne hyónen lu bè tfod yóm lemisa mò gónón hegfan yóm kadaten kul senta yó kem dô tlu folò tau deng tinok le.

²³ Ne yó mon Samwél bè yóm tau tmógó, “Nwitem edini yóm utón deng blayu kóm ne deng monu mò kóm htólóngem.”

²⁴ Tahu se, nwit yóm tau tmógó yó yóm haha utón deng htólóngen ne suen bè solu Sol. Yó mon Samwél mò ke Sol, “Yó ne, kenem. Deng htólóngu nim ni mò kóm bè nim kestifun ni mung bè ni kem tau deng tinoku.” Tahu se, slomong le mken Samwél ne Sol bè yóm kdaw yó.

²⁵ Timbow le deng mulék gu bè yóm gónó le stifun ta bulul bè yóm kedsù le, omin Samwél mit ke Sol ebè yóm gónó hnos ta ketef gónóen ne hentifesen béléen yóm mò gónóhen tungô bè yó.

²⁶ Hol minal mwas bè yó tnaba Samwél Sol, monen, “Ó Sol, btiki ne muléki.” Tahu se, btik Sol ne slomong le Samwél ebè lan.

²⁷ Tikóng le kól bè kilil yóm benwu yó, yó mon Samwél mò ke Sol “Hegnahem yóm tau tóbóng lówóhem. Feni tebel bè ni kóm, wen tulónu kóm lemwót bè Dwata.” Tahu se, gna yóm tau tóbóng lówó Sol yó.