1 Samwél 8 - Udél Dwata: Gna Kesfasad ne Lomi Kesfasad

Kni kem tau Israél du bè Samwél anì wen tau hol geta mogot kul

¹ Timbow deng tuha Samwél, nmoen fen kmukum bè Israél yó kem ngaen logi.

² Yó boluy yóm ngaen twogu duhen Juwél ne yóm twoli duhen Abidya. Lu fen kmukum bè Birsiba.

³ Okóm ni kem ngaen ni, là kô lolò le du yóm kun kmò kkukum mà le. Són hendem le ke gmuta le filak. Gel nwa le ke wen blay le kul mò wa nawa le ne là tedeng kkukum le.

⁴ Yó gónóm mon, gotu le stifun yóm kdéen tuha malak bè Israél ne mógów le ebè Samwél bè Rama,

⁵ yó mon le mò ke Samwél, “Ngem, dengi tuha ne yó kem ngaem là kô lolò le du yóm kóm kmò. Duhen ni, méléki tau mò tau hol geta bélê tekuy lómón yó kem tólóng benwu wen tau hol geta bélê le.”

⁶ Okóm là kóen hligal Samwél bè nim hni le ni, yó nmoen mni bè Dwata.

⁷ Ne yó balà Dwata du, monen, “Hnungolem yóm kdê udél le ebéléem yó kem tau. Là kô uu du yóm deng kenbê le, kaem ou yóm kenbê le mò mogot kul.

⁸ Tódô lenwóten bè yóm kdaw tehe kehewau kul bè Idyip efet nim kmoen ni yóm tendo kekbê le do lel le tmaba ebè yó kem tólóng dwata. Ne ni, bud nmò le béléem yóm deng gel nmò le béléu.

⁹ Yó gónóm mon, hnungolem lu okóm hol hgetem bélê le yóm eles hetgamahem kul. Tulónem kul yóm angat kmoen bélê le ke wen tau hol geta mogot kul.”

¹⁰ Duhen yó, gotu tulón Samwél bè yó kem tau yóm udél Dwata ebélê le bè yóm kni le tau hol geta mò mogot kul.

¹¹ Yó monen mò kul, “Ni se angat nmoen bélê ye yóm tau hol geta. Angat hwiten ebè gida yó kem ngà ye logi, sotu bélê le mò mit klitun tók gel nit sfatay ne yó kem dumu mò hsakayen kudà ne wen mò mlóy tukô gna yó kem klitun tók.

¹² Wen se bélê le néléken mò malak lemibu tau ne wen se mò malak limu folò tau. Wen se bélê le mò hdaduhen bè tonoken ne wen se mò hutahen. Lemwót yó kem dumu, fen hmoen lu suk nit sfatay ne dumuhen fen hmoen ngom yóm klitun tók nit bè gida.

¹³ Lemwót yó kem ngà ye libun, fen le mò béléen yóm hboo alì tilob boohen ne wen se mò fen tmógó ken béléen ne mò mambang béléen.

¹⁴ Angat nwahen yóm tonok ye alì hyu bè kdéen, dalang se yóm gónó ye gel hmulu grép ne gónó ye gel hmulu koyu ulib, gotu blayen ebè yó kem genlalen.

¹⁵ Angat nwahen yóm gesfolò yóm gel nuta ye kkólen bè yó kem bungu grép ye, gotu blayen bè yó kem genlalen ne bè yó kem tóbóng lówóhen.

¹⁶ Angat nwahen yó kem tóbóng lówó ye, logi duhen libun ne yóm alì hyu bè yó kem safì ye ne kudà asnu ye, gotu nwahen mò kun mò hmoen nmò.

¹⁷ Angat gotu nwahen snéen yóm gesfolò yó kem ógóf ye ne angat ye baling tau mò heseken.

¹⁸ Ne bè yóm kdaw yó, angat tey sidek kehkodu ye bè Dwata lemwót bè yóm deng nmoen bélê ye nim tau hol geta deng hni ye ni. Okóm là kô bnalà Dwata kuy bè yóm kdaw yó.”

¹⁹ Okóm là kô hnungol le ke Samwél yó kem tau deng mom yó mon le, “Là. Yó hol kóyô me ke wen yóm tau hol geta mogot kum

²⁰ anì skél me bè yóm kdê dumu benwu, wen tau hol geta mogot kum ne mò malak kum ebè gida ne mò mit sfatay bè kem hohon me.”

²¹ Tikóng deng gotu gungol Samwél yóm kdê udél yó kem tau, ominen bud tmulón du ke Dwata.

²² Yó balà Dwata ke Samwél, monen, “Nmoem yóm nóyô le, benlayem lu tau hol geta mò mogot kul.” Tahu se. Omin Samwél hulék kul ebè yó kem kul benwu yóm kdê le.