1 Samwél 7 - Udél Dwata: Gna Kesfasad ne Lomi Kesfasad

¹ Tahu se, nwa yó kem tau bè Kiryat-dyirim yóm Slungan Dwata. Nwit le ebè gónô Aminadab ta yóm ngà bulul. Omin le hetfing du ebè Dwata yóm ngà Aminadab logi boluyen Ilisar mò gónó le smigang du.

² Tey kegenen na nô bè Kiryat-dyirim yóm Slungan Dwata yó, botong lewu folò halayen. Bè ni kem halay ni, tey klangag yó kem kdê tau Israél abay se bè kul kehedem du deng bayà Dwata lu.

Kwit Samwél kul gemmò bè gida yó kem tau Israél

³ Yó udél Samwél ebè kdê yó kem tau Israél, monen, “Ke hol tahu lemwót lem but blutut ye yóm bud kesfulék ye ebè Dwata, hol knogol ye ne yó kem tólóng dwata lolò ye dalang se yóm dwata lennged boluyen Astarti. Hogot ye ke Dwata klowil ye ne són du nimón ye. Ke ni se nmò ye, angat lenwaen yu lem hólól yó kem Flistin.”

⁴ Tahu se, gotu kó yó kem tau Israél yóm dwata lennged boluyen Baal ne Astarti. Tek són Dwata bud gónó le e tmaba.

⁵ Omin Samwél bud mon du, “Yu kem kdéen tau Israél, gotu ye stifun bè Mispa naw e hkodu mni bélê ye bè Dwata bè yó.”

⁶ Tahu se, gotu le stifun bè Mispa. Wen él nwa le bè kokol ne kok le bè yó bè solu Dwata ne gotu le fasting bè yóm kdaw yó, benkas le bè Dwata yóm salà le, mon le, “Deng me gemsalà bè Dwata.” Ne bè yó bè Mispa gónó Samwél gel kmukum yó kem tau Israél.

⁷ Timbow gungol yó kem Flistin yóm kestifun le bè Mispa yó kem tau Israél, yó nmò yóm limu kem tau hol geta mogot bè Flistin eles hentigel le yó kem sendalù le anì na le nundug lu. Timbow tngón yó kem tau Israél nim nmò le ni ya tey sidek klikò le.

⁸ Ne yó udél le hkodu bè Samwél, mon le, “Béem tenflok kut mni tóbóng bè yóm sana kut Dwata hol gónó mogot anì lenwaen tekuy lem tdok yó kem Flistin.”

⁹ Duhen yó, wen ngà ubiha tolo tmutù nwa Samwél ne hkekeben lenbotù ebè Dwata mò dsuen ebéléen. Tey kehkoduhen bè Dwata anì tnóbóngen yó kem tau Israél ne bnalà Dwata yóm hnihen yó.

¹⁰ Yóm igò Samwél hkekeb demsù ebè Dwata, mundug se yó kem sendalù Flistin nundug le yó kem tau Israél. Okóm yó nmò Dwata hgelen udélen ebélê le hlanen bè yóm tey leték ne ya tey sidek keslaf yó kem Flistin ne gemmò yó kem tau Israél.

¹¹ Ngang kem sendalù Israél kemtes kul ne hmatay kul lenwót le bè yó bè Mispa efet kól etu bè Bit-kar.

¹² Omin Samwél ma yóm sotu botu bong ne suen bè blóng le benwu Mispa yóm benwu Jisana ne yó boluyen du, Ibinisér. Yó lanen, “botu tóbóng.” Yó mon Samwél, “Efet ni kmoen ni yóm któbóng Dwata kum.”

¹³ Yó gónóm mon, là kô le bud gemmò yó kem Flistin ne là bud le mundug ebè benwu yó kem tau Israél. Yóm klawi Samwél mowil tendo wen lan Dwata hemseng kul yó kem Flistin.

¹⁴ Yó kem benwu deng nled yó kem Flistin gotu bud mulék ebè yó kem tau Israél, lenwóten bè yóm benwu moni bè Gat efet kól etu bè Ikrun. Ne bud mulék ebélê le snéen yó kem dumu benwu tehe nled yó kem Flistin. Ne bud menek snéen lem blóng yó kem tau Israél ne yó kem tau Amurayt.

¹⁵ Yóm klawi Samwél mowil, tódô henlósen kmukum lem blóng yó kem tau Israél.

¹⁶ Ket halayen hmalak yó kem benwu bè Israél na a kmukum, hegnahen bè Bétél tmodol Gilgal, ominen bè Mispa.

¹⁷ Ominen yó semfulék ebè yóm kun benwu bè Rama nan e bud kmukum bè yó. Ne wen gónó le demsù ebè Dwata hdà Samwél bè yó bè Rama.