1 Samwél 6 - Udél Dwata: Gna Kesfasad ne Lomi Kesfasad

Khulék kem Flistin yóm Slungan Dwata

¹ Yó kegenen deng nô bè benwu yó kem Flistin yóm Slungan Dwata, botong hitu bulónen.

² Lemwót yó kem gel malak bè yó kem Flistin, gotu htaba le yó kem tau gel blóng le ebè yóm kul dwata ne yó kem tau demwata bélê le snólók le bélê le, “Tedu kmò tekuy du yóm Slungan Dwata? Tulón ye kum yóm kmò khulék me du ebè yóm sana kun benwu gónó nô?”

³ Yó balà le kul, mon le, “Ke hulék ye yóm Slungan yóm Dwata yó kem tau Israél là hyuhen ke laen dù hmung ye du. Hmung ye du yóm basa mò bayad salà ye anì teflok yóm des mit hatay deng sut lem blóng tekuy. Ke deng blay ye ne là tefloken yóm des yó, bè yó gónó tekuy temngón du là lemwóten bè Dwata yóm des mit hatay yó.”

⁴ Snólók le, “Basa mò bayad salà du de yóm hwit tekuy ebéléen?” Mon le se, “Lemwót bè yóm ksuten lem blóng ye ne lem blóng yóm limu kem tau hol geta ye yóm des mit hatay, yó kmò ye du hemwit ye limu botù lennged tahu blówón lómón kmoen des tumor ne limu botù tahu blówón lómón kmoen kem ungé deng hmayam yóm benwu ye.

⁵ Nmò ye nim ni mò gónó ye hegfan du yóm kadat ye yóm kul Dwata yó kem tau Israél. Déke bè ni gónón temflok yóm ktafaken tekuy dalang se yó kem dwata ye ne yóm tonok ye.

⁶ Hol bê ye abay hgel kulu ye lómón yóm tehe nmò yó kem tau Idyip ne Faro. Là kô hewót le kul yó kem tau Israél efet dê hlayam mit hatay glumfak le.

⁷ Duhen ni, mò ye klitun lomi ne hedyol ye yóm lewu kem safì lomi mngà, yóm là dengen mlan bè yok okóm knukub ye yó du kem ngà le.

⁸ Nwa ye yóm Slungan Dwata lulón ye ta yóm klitun yó, omin ye hemsù du klohoken yóm kahun gónón nô yóm lennged blówón deng nmò ye mò bayad salà ye. Hógów ye són lu yó kem safì demyol klitun yó, hnénég ye gónó le e mlan.

⁹ Ke smolu le mulék ebè yóm kul benwu bè Bit-sémés, bè yó gónó tekuy temngón du deng Dwata yóm hemwit ebélê tekuy yóm des mit hatay. Okóm ke là, sundu Dwata du yóm hemwit ebélê tekuy yóm des yó tódô kun ksut.”

¹⁰ Tahu se, nmò le yóm tulón le kul yó. Wen lewu safì libun nwa le, leket le bè yóm klitun lomi nmò le ne knukub le yó dum kem ngà le lomi sut.

¹¹ Lulón le bè yóm klitun yó yóm Slungan Dwata, mung du yóm kahun gónó le hemsù yó kem blówón tumor ne kem blówón ungé deng nmò le.

¹² Kewót le bè yó, yó kem safì yó tódô le hekteng smolu mógów ebè Bit-sémés, balù udì ke tô le beklil, okóm tódô senflós le mugem igò le mógów lemwót bè yóm ktebel kem ngà le. Ngang le lemolò kul yó kem tau hol geta bè Flistin efet le kól bè kilil yóm benwu Bit-sémés.

¹³ Uma kóm yó kem tau bè Bit-sémés, tolo le muta halay bè yó bè datal. Timbow le tukong eta tódô ton le yóm Slungan Fasad, ya tey kehligal le bè yóm kton le du.

¹⁴ Lemwót yó kem safì mit klitun, tódô le hlós ebè uma yóm sotu tau boluyen Juswa bè yó bè Bit-sémés ne tódô le htengen mdà klohok yóm tey botu bong nô bè yó. Yó nmò yó kem tau bè yó, nsô le yóm klitun ne dsù le ebè Dwata yóm lewu kem safì mò dsù hkekeb le ebéléen.

¹⁵ Okóm deng eles hekmó yó kem sfu Libay yóm Slungan Dwata ne yóm kahun nô klohoken gónón nô yóm lennged blówón deng nmò le ne hyón le ta yóm tey botu bong yó koni. Bè yóm kdaw yó, wen dsù hkekeb le ebè Dwata yó kem tau bè Bit-sémés ne wen se yó kem dumu gel dsù le.

¹⁶ Tikóng gotu ton yóm limu kem tau hol geta bè Flistin nim kdéen ni, tódô le beklil mulék ebè kul benwu bè Ikrun bè yóm kdaw yó.

¹⁷ Yóm limu kem tumor nmò le bè tahu blówón hwit yó kem Flistin mò bayad salà le bè Dwata, sotu lemwót bè syudad Asdod ne sotu lemwót bè syudad Gasa ne bè syudad Askilun ne bè syudad Gat ne bè syudad Ikrun.

¹⁸ Senged snéen yóm limu kem ungé nmò le bè tahu blówón, bud lemwót bè yóm limu kem syudad nogot yó kem Flistin, gomong yó kem benwu lemnek snakuf le. Yóm botu bong nô bè uma Juswa bè Bit-sémés, yóm gónó le hemyón yóm Slungan Dwata, sana knóen bè yó efet nim kmoen ni mò fen temksì du nim nmò le ni.

Kili le du ebè Kiryat-dyirim yóm Slungan Dwata

¹⁹ Okóm botong hitu folò logi hnatay Dwata bè yó bè Bit-sémés lan le temngel elem yóm Slungan Dwata. Ya tey klangag yó kem dumu tau bè yó lemwót bè khatay Dwata yó kem dumu le.

²⁰ Yó udél yó kem tau bè Bit-sémés, mon le, “Tau du se gembek mdà bè solu Dwata yóm Dwata laen kô dù belenen ni? Gónó tekuy tô e hógów du yóm Slungan Dwata anì glayuk bélê tekuy?”

²¹ Duhen yó, wen tau hógów le ebè yó kem tau bè Kiryat-dyirim, mon le, “Deng hfulék kem Flistin yóm Slungan Dwata. Mógów ye edini na ye e nwa.”