1 Samwél 5 - Udél Dwata: Gna Kesfasad ne Lomi Kesfasad

Knóen bè kem Flistin yóm Slungan Dwata

¹ Timbow deng gegef kem Flistin yóm Slungan Dwata, nwit le lemwót bè yó bè Ibinisér yóm benwu gónó le sgida efet kól etu bè yóm kul syudad bè Asdod.

² Omin le mit du elem gónô yóm kul dwata kéng boluyen Dagun ne hyón le bè yó klohoken.

³ Hol hlafus hayahen bè yó, tikóng le btik yó kem tau bè Asdod tódô ton le Dagun deng tódô lemokob bè tonok bè solu yóm Slungan Dwata. Omin le bud hdà du bè sana gónón mdà.

⁴ Bud hlafus hayahen bè yó bè yóm bud kebtik le bud ton le Dagun lemokob bè tonok bè solu yóm Slungan Dwata. Deng gotu tfok kuluhen ne yó kem lewu sigelen, tódô le masà bè bak dól. Són lówóhen tebel bè yóm gónón masà.

⁵ Yó gónóm mon, efet nim kmoen ni yó kem tau gel blóng ebè Dagun dalang se yó kem dumu tau bè Asdod, ke gel le husek elem gónô Dagun, gel lenafang le yóm lan bè yóm bak dól yó, là kô ndà le du.

⁶ Ya tey sidek ktafak Dwata kul yó kem tau bè Asdod ne tey sidek kehlikoen kul, dalang se yó kem tau hmilol bè yóm benwu yó. Yó tafaken kul, henwiten lu yóm tey des sidek mit hatay boluyen tumor.Bè yóm kton kem tau bè Asdod du yóm gefet bélê le yó, yó mon le, “Bê tekuy bud sù bè ni yóm Slungan yóm Dwata yó kem tau Israél. Angat tekuy gotu meglà gomong Dagun yóm dwata tekuy.”

⁷ Bè yóm kton kem tau bè Asdod du yóm gefet bélê le yó, yó mon le, “Bê tekuy bud sù bè ni yóm Slungan yóm Dwata yó kem tau Israél. Angat tekuy gotu meglà gomong Dagun yóm dwata tekuy.”

⁸ Duhen yó, gotu htaba le yó kem tau mogot bè Flistin snólók le bélê le, “Tedu kmò tekuy du yóm Slungan yóm Dwata yó kem tau Israél?” Bnalà le se, mon le, “Nwit ye ebè syudad Gat.” Tahu se, nwit le ebè Gat yóm Slungan Fasad yóm Dwata yó kem tau Israél.

⁹ Okóm bè yóm kkólen bè Gat, ya tey bud ktafak Dwata kul yó kem tau bè yóm syudad yó ne tey klikò le. Bud hwiten ebélê le yóm des mit hatay boluyen tumor, ngà duhen tuha gotu gemnóm du.

¹⁰ Duhen yó, bud hwit le ebè syudad Ikrun yóm Slungan Dwata yó, yóm sotu bè yó kem syudad Flistin. Yóm kkólen bè Ikrun, ya tey sidek klangat yó kem tau bè yó, mon le, “Yó gónó le mit du edini yóm Slungan yóm Dwata yó kem tau Israél anì gotu tekuy matay.”

¹¹ Omin le yó bud semtifun yóm kdéen tau mogot bè Flistin, mon le mò kul, “Bud hulék ye kut bè yóm sana kun gónó nô yóm Slungan yóm Dwata yó kem tau Israél anì là hnatayen tekuy.” Bè klamang yóm syudad yó, ya tey sidek klikò le abay se deng wen matay bélê le.

¹² Yó kem tau là matay le, bud gnóm le se kul yóm des tumor ne gefet ditu bè longit yóm tey kkik le.