1 Samwél 4 - Udél Dwata: Gna Kesfasad ne Lomi Kesfasad

Kegef kem Flistin yóm Slungan Dwata

¹ Deng gotu glalag bè kdê yó kem tau Israél yóm udél Dwata hlanen bè Samwél. Uma kóm bè yó kem kdaw yó tolo le sgida yó kem tau Israél ne yó kem Flistin. Lemwót yó kem sendalù Israél kmamfù le bè Ibinisér ne fen le kmamfù bè Afik kul yó kem Flistin.

² Lemwót kem Flistin, nundug le yó kem tau Israél ne là kô le gemmò yó kem sendalù Israél, botong fat libu sendalù matay bélê le.

³ Tikóng le mulék ebè kamfù le yó kem dù sendalù Israél, yó mon yó kem tau malak kul, “Moen du ke là hegmò Dwata tekuy bè yó kem Flistin kemdaw ni? Yake nwa tekuy bè Silu yóm Slungan Fasad anì mung bélê tekuy Dwata ne lenwaen tekuy lem hólól yó kem hohon tekuy.”

⁴ Tahu se, wen kem tau hógów le ebè Silu mò mangay yóm Slungan Fasad yóm Dwata laen dù là gbeken du, yóm nô lem blóng hafak yó kem hógów Dwata boluy le sirubim. Bè yóm kwit le du yóm Slungan Dwata yó, mung yó kem lewu ngà Ili logi, Hufni ne Finihas.

⁵ Timbow kól bè kamfù yóm Slungan Fasad nwit le yó, ya tey kehsag yó kem tau Israél lemwót bè yóm tey kligal le, botong megsinsig tonok.

⁶ Timbow gungol kem Flistin yóm alì kehsag kem tau, yó mon le, “Tedum alì hensag le bè kamfù le yó kem Hibru yó?” Tikóng tngón le yóm deng kkólen bè kamfù kem Hibru yóm Slungan Dwata

⁷ gotu le likò, mon le, “Deng wen kem dwata kól bè kamfù le. Hatay tekuy, là kô deng wen hnikót sut bélê tekuy he ke lómónen ni.

⁸ Hatay tekuy. Tau du se tô gembek lemwà tekuy lem tdok yó kem dwata laen dù là gbeken du yó? Ni se yó kem dwata tehe heglumfak yó kem tau Idyip yóm tey glumfak mit hatay bè yóm tehe knô kem tau Israél bè yóm benwu laen hol wen tauhen.

⁹ Hbegel ye, kem Flistin. Hol ye hlogi anì là baling tekuy ghesek bè yó kem Hibru lómón yóm deng keghesek le bélê tekuy. Sfatay kuy bélê le, hol ye hlogi.”

¹⁰ Tahu se, tey kwit le sfatay bè yó kem tau Israél yó kem Flistin ne là kô le bud gemmò yó kem tau Israél. Botong tlu folò libu sendalù matay bélê le. Yó kem dù mowil, gotu le mlóy mulék ebè kamfù le.

¹¹ Botong gegef yó kem Flistin yóm Slungan Dwata ne hnatay le yó kem lewu ngà Ili logi, Hufni ne Finihas.

Katay Ili

¹² Bè yóm kdaw yó, wen sotu tau semfu gu bè Bindyamin mlóy ebè Silu gu bè yóm gida yó, song gefet bè yó deng kimel. Gotu kenséen nesen ne bnulusen kfung ta kuluhen mò gónón hegfan du yóm tey sidek klangagen.

¹³ Bè yóm kkólen bè yó, tolo myón Ili bè yóm gónón gel myón kilil lan, nangaten yóm tulón gbak bè yóm kesgida le abay se tey sidek ktafa nawahen yóm Slungan Dwata. Bè yóm ksut yóm tau yó, gotu tulónen yóm gfà le ne ya tey kkik yó kem tau bè klamang yóm benwu yó.

¹⁴ Timbow gungol Ili yóm kkik le, ominen smólók, monen, “Tedum alì nkik le ni?” Tódô kendel heslò mógów ebè Ili yóm tau mit tulón yó, gotu tulónen du kdéen.

¹⁵ Deng syóm folò wolu ne halay Ili ne là buden hol mton.

¹⁶ Yó tulónen ke Ili yóm tau yó, monen, “Kewótu gu lem gida nim kógówu ni, mlóye gu ditu.” Snólók Ili, monen, “Mò kmoen se ditu, Tò?”

¹⁷ Yó balaen du yóm tau mit tulón yó, monen, “Gotu le mlóy bè yó kem Flistin yó kem tau Israél. Hilu libuhen kem sendalù Israél deng matay. Gomong matay yó kem lewu ngaem logi, Hufni ne Finihas. Ne deng gegef yó kem Flistin yóm Slungan Dwata.”

¹⁸ Bè yóm ktulónen du yóm tau yó yóm deng kegef le yóm Slungan Dwata, tódô mugod blékê Ili bè yóm gónón myón klohok bak tikeb. Lemwót bè yóm deng ktuhahen lelen tey mabù, tfok liholen bè yóm klugoden ne matay. Yó kegen Ili malak bè Israél, botong fat folò halay.

¹⁹ Blaem tolo mlutut towu Ili, yehen Finihas ne móyónen sut yóm bnututen. Tikóng gungolen se kun yóm deng kegef le yóm Slungan Dwata ne yóm deng katay tuónen ne yóm bud katay tuha logihen, tódô henmung kmuleng blututen ne mung matay bè yóm ksut blututen.

²⁰ Bè yóm móyón kehtohen yó mon le mò du yó kem libun tmóbóng du, “Béi hlikò, logi ngaem.” Okóm là kô kenmónen du, balù udì ke bnalaen.

²¹ Bè hol sónen nahen nmò boluy yóm ngaen sut yó, boluyen du Ikabud. Yó lanen, “Deng tnagak Dwata ne Israél.” Yó gónón lómón yó boluyen yóm ngaen lemwót bè yóm deng kegef le yóm Slungan Dwata ne yóm katay tuónen ne katay tuha logihen.

²² Yó hol són udélen, monen, “Deng tnagak Dwata ne Israél, yakà deng negef le du yóm Slungan Dwata.”