1 Samwél 31 - Udél Dwata: Gna Kesfasad ne Lomi Kesfasad

Katay Sol

¹ Yó nmò yó kem Flistin, bud nundug le yó kem sendalù Israél ne gotu le mlóy yó kem sendalù Israél. Tey dê bélê le matay bè yóm kesfatay le bè Bulul Gilbuwa.

² Ktes yó kem sendalù Flistin le Sol ne yó kem ngaen logi ne hnatay le yó kem ngà Sol le Junatan ne Abinadab ne Malkisuwa.

³ Ya tey kesfatay le Sol yó kem Flistin ne gafit le Sol yó kem tau mit boho ne gentì le, ya tey halien.

⁴ Yó udélen ebè yóm tau gel mit klungen, monen, “Dilotem sudengem, tnibóhem ou anì mataye. Là hyuhen ke yó kem tau là temngón ke Dwata yóó yóm hmatay dou, déke hennê le ou.” Okóm là kóen móyô yóm tau gel mit klungen yó, likò mò du. Yó gónó Sol tódô dmilot yóm sudengen ne tódô hneeben.

⁵ Tikóng ton yóm tau mit klungen yóm deng katay Sol, bud diloten se kun sudeng ne tódô hneeben ne masà bè yó klohok Sol.

⁶ Duhen yó, bè yóm kdaw yó segeng le matay le Sol ne yóm tlu kem ngaen logi ne yóm ngà logi gel mit klungen ne tey wen matay bè yó kem sendaluen.

⁷ Timbow ton yó kem tau Israél menwu bè doli yóm Datal Jisriil ne yó kem tau Israél menwu fi dmata kdaw Él Jurdan yóm gotu klóy yó kem sendalù Israél ne yóm deng katay Sol ne yó kem ngaen logi, gotu le mlóy se kul tebel le yó kem benwu le yó. Yó gónóm mon, gotu nled yó kem Flistin yó kem benwu le.

⁸ Hayahen bè yó, lemwót yó kem Flistin mógów le elem blóng yó kem sendalù deng matay, sulék nwa le yó kem nes le ne yó kem ngom le sfatay. Ne ton le deng matay Sol ne yó kem ngaen logi masà le bè yó ta Bulul Gilbuwa.

⁹ Duhen yó, kenleng le kulu Sol ne nwa le oniten. Omin le hemwit kem tau ebè klamang benwu Flistin anì heglalag le yóm deng katay Sol bè gónô yó kem kul dwata ne bè yó kem dumu le Flistin.

¹⁰ Lemwót yóm onit Sol sù le bè gónô yóm dwata libun le boluyen Astarti ne yóm lówóhen tnutuk le bè beng yóm syudad le boluyen Bit-san.

¹¹ Okóm tikóng gungol yó kem tau bè Jabis-gilyad yóm deng nmò le bè Sol yó kem Flistin,

¹² tódô suloy le buteng mógów yó kem sendalù le anì na le e nwa yóm lówó Sol ne lówó yó kem ngaen logi deng tléwéng bè beng bè Bit-san. Omin le mit du ebè kul benwu bè Jabis anì bè yó gónó le mtem yóm lówó le.

¹³ Omin le ma yó kem tiol le ne lebeng le laan yóm koyu tamaris bè yó bè Jabis ne hitu kdaw le mò du fasting.