1 Samwél 30 - Udél Dwata: Gna Kesfasad ne Lomi Kesfasad

Khatay Dabid yó kem tau Amalikayt

¹ Timbow deng tlu kdawen bè yó bè yóm kkól le Dabid ne yó kem tauhen bè benwu le bè Siklag, tódô ton le deng nundug yó kem tau Amalikayt yóm benwu Négéb ne deng gotu ntem le yóm benwu Siklag snakufen.

² Gotu negef le yó kem libun ne yó kem ngà ne yó kem dumu tau nô bè yó, okóm laen dù hnatay le bélê le.

³ Tikóng ton Dabid ne yó kem tauhen yóm tey kegbà yóm benwu le ne yóm deng kegef le yó kem fes lówó le

⁴ ya tey kkik le efet laen dù bud gel le.

⁵ Gomong negef le snéen yóm lewu kem yehen Dabid, Ahinuam yóm libun lemwót bè Jisriil ne Abigil yóm libun tehe yehen Nabal lemwót bè Karmél.

⁶ Tey glumfak bong nim glumfak Dabid ni abay se tey sidek khééten bè yó kem tauhen yóm deng kegef le yó kem yehen le ne yó kem ngà le. Yó hendem le tô sentudà le botu Dabid anì matay. Okóm tey ketgelen ke Dabid yóm kun Dwata hol gónó mogot.

⁷ Omin Dabid mudél ebè Abyatar yóm tau gel blóng le ebè Dwata, monen mò du, “Nwitem do edini yóm nes ifod gónó tekuy temngón du yóm kun kóyô Dwata.” Tahu se, nwit Abyatar ebéléen.

⁸ Omin Dabid smólók ke Dwata, “Ktesu lu kô ni kem tau mundug ni? Angat gutahu lu kô?” Ne yó balà Dwata du, monen, “El, ktesem lu. Angat gotu bud gwa ye yóm kdê deng negef le bélê ye.”

⁹ Tahu se, kewót le Dabid bè yó mung du yóm nem latu kem tauhen, ngang le mógów efet le kól bè yóm él boluyen Bisor.

¹⁰ Ne wen lewu latu bélê le tebel bè yó, là gbek le mifal du yóm él yó lemwót bè yóm alì sidek kliteg le. Fen fat latu hlós mung ke Dabid.

¹¹ Wen bè yó kem sendalù Dabid mton yóm sotu tau Idyip bè yó bè uma ne nwit le ebè Dabid. Wen ken blay le du mò kenen ne wen se él mò ninumen.

¹² Bud blay le du sóól hunges yóm bungu fig ne lewu hunges bungu grép deng hendaw abay se deng tlu butengen laen dù ken ne él gtoben.

¹³ Ne yó mon Dabid mò du, “Tmau du tau hol geta bélê ye? Gónóm gu lemwót de?” Ne yó balaen du yóm tau yó, monen, “Tauhe Idyip, heseken ou yóm sotu tau Amalikayt. Deng tlu butengen ni ne tmebel do abay se wen desu.

¹⁴ Lomi me kól mundug yó kem tau Kiritayt bè benwu Négéb yóm benwu glem lem Juda, yóm tonok gónó le nô yó kem tbong Kalib ne lomi ntem me yóm benwu Siklag.”

¹⁵ Ne yó mon Dabid mò du, “Gbekem kô mit do ebélê le ni kem tau mundug ni?” Yó balaen du yóm tau yó, monen, “Nwitu u ebélê le, okóm holi smafà do mlan bè boluy Dwata, hol béem abay hnatay ou duhen ke hulékem ou ebè yóm ogotu.”

¹⁶ Tahu se, nwiten Dabid yóm tau Idyip yó ebè yóm gónó le kmamfù yó kem tau Amalikayt. Bè yóm kkól le Dabid bè yó ne yó kem tauhen, tolo le sekla yó kem tau Amalikayt, sekla le mken ne minum lel le madal lemwót bè yóm tey kligal le bè yóm alì kwen yó kem negef le bè yó kem Flistin ne bè benwu Juda.

¹⁷ Tódô nundug Dabid lu mung du yó kem tauhen, suloy le buteng mò du sfatay efet bud kifu hayahen bè yó. Laen dù bè yó kem tau Amalikayt gewà, tek són yóm fat latu kem lomi lemnok smakay kamél.

¹⁸ Gotu bud nwa Dabid yóm kdê deng negef yó kem tau Amalikayt, gomong lenwaen yóm lewu kem yehenen.

¹⁹ Laen dù lana udì duhen bong, ngà logi duhen ngà libun. Yóm kdéen deng negef le gotu bud nwit Dabid mulék.

²⁰ Kem ubiha ne kem safì, gotu negef Dabid lu snéen. Yóm igò kem tau Dabid mit kul yó kem ógóf yó, yó udél le, mon le, “Ke Dabid funen mò ofolen.”

²¹ Tikóng le kól bè Él Bisor le Dabid, senlong le lu yóm lewu latu kem sendaluen tehe tebel bè yó alì miteg, tey kehligal Dabid bè yóm bud ktonen kul.

²² Okóm wen bè yó kem tau Dabid sidek kehedem le, yó mon le, “Là mung le tekuy, bê tekuy abay numun lu bè yó kem deng gwa tekuy. Hulékem ebélê le yó kem yehen le ne kem ngà le, ominem hewót kul.”

²³ Okóm yó mon Dabid mò kul, “Bê, kem dumuhu setwoli. Bê tekuy abay sen-glom yóm deng blay Dwata bélê kuy. Deng tnóbóngen tekuy Dwata anì laen dù hemen te ne deng hegmoen tu bè yó kem hohon tekuy.

²⁴ Tau du se tô hmungol du yóm udél ye yó? Yóm umun yóm tau mógów ebè sfatay tódô senged bè umun yóm tau fen tebel mentey yó kem ngom tekuy.”

²⁵ Lenwóten bè yóm kdaw yó, yó se udin hlolò Dabid yóm kdê tau Israél ne efet nim kmoen ni sana klolò le du.

²⁶ Timbow le kól bè Siklag le Dabid, lemwót yó kem dumu deng negef le hwiten ebè yó kem ween malak bè Juda. Yó udél hmungen du, monen, “Ni se basahu kóm lemwót bè yó kem deng negef me bè yó kem tau hohon Dwata.”

²⁷ Yó bud henwiten, duhen yó kem tau malak bè yó kem benwu deng gónó Dabid mlan duhen yóm benwu Bétél ne Ramut-négéb ne Jatir

²⁸ ne bè yó kem tau malak bè Aror ne bè Sifmut ne bè Istimuwa

²⁹ ne bè Rakal ne bè yó kem tau malak bè yó kem benwu bè Jiramil ne bè benwu yó kem tau Kinayt

³⁰ ne bè Hurma ne bè Burasan ne bè Atak

³¹ ne bè Hibron ne bè kdê yó kem dumu benwu deng gónó le mlan le Dabid ne yó kem tauhen.