1 Samwél 3 - Udél Dwata: Gna Kesfasad ne Lomi Kesfasad

Ktaba Dwata ke Samwél

¹ Ne ke Samwél kun, yóm ngà tóbóng lówó Dwata, tendo galak bè Ili. Bè yó kem kdaw yó, yóm Dwata tey batul kudélen ebè tau ne mdangan se ke wen htonen.

² Sotu kifu, lemwót Ili tungô lem dfélen bede là buden hol mton.

³ Ne lemwót ke Samwél kun, tungô lem Gónô Dwata moni bè gónón nô yóm Slungan Dwata. Tolo mnóng he yóm solok Dwata bè yó.

⁴ Omin Dwata tmaba ke Samwél, monen, “Ó Samwél, ó Samwél.” Bnalà Samwél se, monen, “Boluyen de?”

⁵ Omin Samwél hboluk btik, mlóy ebè Ili, monen, “Ni ou, gungolu yóm ktabahem do.” Bnalà Ili se, monen, “Là kô tnabahu kóm ngà. Budi mulék ebè gónóm tungô.” Tahu se, bud mulék Samwél ebè yóm gónón tungô.

⁶ Omin Dwata bud tmaba ke Samwél, monen, “Ó Samwél.” Ne bud btik Samwél bud mógów ebè Ili, monen, “Ni ou, gungolu yóm ktabahem do.” Okóm bnalà Ili, monen, “Là, ngà, là kô naw e tmaba kóm. Budi mulék ebè gónóm tungô.”

⁷ Blaem là kô deng tngón Samwél du he yóm nmò Dwata yó abay se là kóen deng hnikót mudél ebéléen.

⁸ Omin Dwata bud tmaba ke Samwél bè getluhen dulék. Bud btik Samwél ne mógów ebè Ili ne monen mò du, “Ni ou, gungolu yóm ktabahem do.” Omin Ili yó he temngón du Dwata tmaba du yóm ngà yó.

⁹ Yó gónó Ili mon du mò ke Samwél, “Budi mulék ebè gónóm tungô. Ke bud tnabahen uu kedeng, monem mò du, ‘Yó ne, Dwata, mudéli. Hnungolen uu yóm tóbóng lówóhem.’ ” Tahu se, bud mulék ebè gónón tungô Samwél.

¹⁰ Bud sut Dwata, bud tmaba lómón yóm gnan, monen, “Ó Samwél, Samwél.” Bnalà Samwél se, monen, “Yó ne, Dwata, mudéli. Hnungolen uu yóm tóbóng lówóhem.”

¹¹ Ne yó bud udél Dwata ebè Samwél, monen, “Ngem, móyón wen tey sidek nmou bè Israél. Ne kdê yó kem tau mungol du nim nmou ni angat le tódô gotu teneng.

¹² Bè yóm kdaw yó, hdohou eta Ili kdê yó kem deng monu gbak ebè yó kem fes lówóhen lenwóten bè yóm gna tulónu du efet kól bè yóm hol sónen.

¹³ Deng gel tulónu ke Ili ne yóm móyón ktafaku yó kem fes lówóhen, yóm tafak laen dù sónen lemwót bè yóm kudél le sidek e tahu yó kem ngaen logi. Deng tngón Ili se yóm nmò yó kem ngaen, okóm là kô dog gel bnólówen kul.

¹⁴ Yó gónóm mon, yó udélu ebè yó kem fes lówó Ili, laen dù dsù le ebéléu duhen ke basa le ebéléu ke tô hkó du nim tey sidek nmò le ni.”

Ktulón Samwél yóm udél Dwata

¹⁵ Ngang Samwél hlilil efet hlafus. Ominen btik, hennasen yó kem bak dól yóm Gónô Dwata. Likò tmulón du ke Ili yóm deng tulón Dwata du.

¹⁶ Okóm tnaba Ili Samwél, monen, “Ó ngà, Ó Samwél.” Bnalà Samwél, monen, “Ni ou.”

¹⁷ Mon Ili mò du, “Tedu se tulón Dwata kóm du? Béem bnos béléu. Dwata tmafak kóm ke là tulónem du do yóm kdê tulónen kóm.”

¹⁸ Tahu se, gotu tulón Samwél ke Ili yóm kdéen, laen dù bnosen du. Yó mon Ili mò du, “Dwata se yó, nmoen yóm hyu béléen.”

¹⁹ Yóm igò Samwél lemnok, tódô seflós Dwata nô béléen ne laen dù bè yó kem gel tulónen lemwót bè Dwata ke là dohoen.

²⁰ Tódô kdê yó kem tau Israél lenwóten bè yóm benwu boluyen Dan, yóm benwu hol fi bwak, efet kól etu bè yóm benwu hol fi leged boluyen Birsiba, gotu temngón du yóm deng kélék Dwata ke Samwél mò tugoden.

²¹ Bè yó bè Silu gónó Dwata tendo hton bè Samwél mlan bè udélen. Ne bè yóm ktulón Samwél du yóm udél Dwata, tódô kdê yó kem tau Israél hmungol du.