1 Samwél 29 - Udél Dwata: Gna Kesfasad ne Lomi Kesfasad

Kekbê kem Flistin ke Dabid

¹ Lemwót yó kem Flistin, gotu sentifun le yó kem sendalù le bè yóm benwu boluyen Afék ne lemwót se kul yó kem tau Israél fen le kmamfù bè yóm sfut él bè Jisriil.

² Bè yóm igò le stodol mógów yóm limu kem tau hol geta bè yó kem Flistin, wen se bélê le malak bè latuhen ne wen se malak bè libuhen. Fen le huli kul le Dabid ne yó kem tauhen, mung le ke Akis.

³ Yó mon yó kem kmandér bè yó kem sendalù Flistin, “Tedu nmò le bè ni se kul ni kem Hibru nii?” Ne tulón Akis kul, monen, “Du se Dabid, mlóy gu bè Sol bè Israél. Deng mukas sfalayen ne nô béléu ne lenwóten bè yóm ktagaken ke Sol efet ni, laen dù sidek tonu béléen.”

⁴ Okóm tey sidek kebut le du yó kem kmandér bè yó kem sendalù Flistin, yó udél le ebéléen, mon le, “Hulékem ebè yóm benwu gónóm hemsù du. Là hyu kmungen tekuy ebè gida nim tau ni. Ke deng tekuy sfatay, moen kun ke deng mom hnohonen tekuy? Déke hnatayen yó kem sendalù tekuy anì bud mulék nawa ebéléen yóm tau hol geta.

⁵ Igoen ni se yóm Dabid tehe utóm lingón yó kem libun madal bè Israél, mon le, ‘Bè libuhen kun hnatay Sol, fen bè sfolò libuhen kun hnatayen Dabid.’ ”

⁶ Omin Akis htaba ke Dabid ne monen mò du, “Safau bè yóm Dwata yó kem tau Israél, uu se yóm tau gsalig deng tngónu. Ke béléu do móyóe ke mungi do sfatay, okóm là móyô yó kem dumuhu tau hol geta bè Flistin.

⁷ Yó gónóm mon, muléki ne béem abay nmò yóm là hyuhen bélê le.”

⁸ Ne yó udél Dabid ebè Akis, monen, “Tedu se deng sidek nmou du? Sidek du se deng tonem béléu du nbuten bè yóm tanay kkólu béléem efet ni? Moen ke là hyu kmungu sfatay bè yó kem hohonem, uu se yóm dou gónó mogot yóm tau hol geta?”

⁹ Yó balà Akis ke Dabid, monen, “Tngónu se yóm tey kehyuhem. Bè ktonu kóm, lómón tói hógów Dwata. Okóm yó kem kmandér bè yó kem sendalù Flistin là kô le móyô ke mungi bélê le ebè gida.

¹⁰ Duhen ni, hanà minal mwas hlafus haya géhél ye lemwót ne yó kem tauhem.”

¹¹ Tahu se, hlafus hayahen bè yó btik Dabid ne yó kem tauhen, mulék le ebè benwu yó kem Flistin. Ne lemwót yó kem sendalù Flistin, hlós le ebè Jisriil.