1 Samwél 28 - Udél Dwata: Gna Kesfasad ne Lomi Kesfasad

Ksólók Sol bè yóm libun mton bù

¹ Bè yó kem kdaw yó, gotu sentifun yó kem Flistin yó kem sendalù le anì na le e mit sfatay bè yó kem tau Israél. Yó mon Akis mò ke Dabid, “Nwitem yó kem tauhem, mung ye kum sfatay.”

² Yó mon Dabid mò ke Akis, “El, mung me anì ton matahem yóm nmò me.” Mon Akis se, “Tey hyu. Tnana tolohe mowil, nmou uu mò gel mentey do.”

³ Deng matay ne Samwél. Bè yóm katayen tódô kdê yó kem tau Israél gotu lemangag du ne lebeng le bè yóm kun benwu bè Rama. Ne yó nmò Sol, gotu hdóhen yóm kdê yó kem tau demwata ne kem tau mton bù bè yó bè Israél.

⁴ Lemwót yó kem Flistin gotu le stifun ne kmamfù le bè Suném. Ne lemwót Sol, gotu sentifunen yó kem sendalù Israél fen le kmamfù bè Gilbuwa.

⁵ Tikóng ton Sol yó kem sendalù Flistin, ya tey sidek klikoen, botong setbol kkelen.

⁶ Snólóken bè Dwata ke tedu nmoen, okóm là kô bnalà Dwata du balù bè knahen, duhen ke hlanen bè atù, duhen ke hlanen bè yó kem tugoden, là kô bnalà Dwata du.

⁷ Ne yó mon Sol bè yó kem tóbóng lówóhen, “Mebel ye do libun mton bù anì mógówe ebéléen naw e smólók béléen ke tedu nmou.” Ne yó balà le du yó kem tóbóng lówóhen, mon le, “Wen sotu libun mton bù nô bè Indor.”

⁸ Duhen yó, yó nmò Sol hlingu lemsek nes hkawang ne mógów ebè yóm libun mton bù bè yóm kifu yó, mung du yóm lewu kem tauhen. Bè yóm kkól le, yó monen bè yóm libun yó, “Móyóe stulón bè lóyóf yóm sotu tau deng matay. Yake tnabahem do lóyófen yóm tau bnoluyu anì stulóne du.”

⁹ Okóm yó monen mò du yóm libun mton bù yó, “Mone tô hfatayem o kô? Deng tngónem se kóm yóm deng nmò Sol, gotu hdóhen lu yó kem mton bù ne yó kem tau demwata bè nim benwu ni.”

¹⁰ Okóm smafà béléen Sol hlanen bè boluy Dwata, monen, “Hlanu bè boluy yóm Dwata là matayen nim monu ni, laen dù tau tmafak kóm bè yóm kmoem du nim ni.”

¹¹ Ominen yó mon du yóm libun yó, “Lóyóf tau du se nóyô tnabahem?” Mon Sol se, “Tnabahem do lóyóf Samwél.”

¹² Tikóng ton yóm libun yó lóyóf Samwél tódô lemangat, monen, “Moen ke snukatem o, uu se Sol?”

¹³ Yó monen mò du yóm tau hol geta yó, “Béi abay hlikò. Tedu se tonem?” Bnalà yóm libun, monen, “Tonu lóyóf hewà gu lem tonok.”

¹⁴ Mon Sol, “Kmò ktonem du du?” Mon yóm libun yó, “Tau deng tuha lemsek nes tahà.” Tódô tngón Sol du se Samwél ne tódô hegdufok ebè tonok bè solu Samwél mlan bè kadaten du.

¹⁵ Ne yó udél Samwél ebè Sol, monen, “Moen du ke hnala tnabahem o?” Mon Sol se, “Wen tey gfau. Mit le sfatay bélê me yó kem Flistin ne deng tnagak Dwata o ne là kô bnalaen do ke hlanen bè yó kem tugoden duhen ke bè kna. Yó gónóhu tmaba kóm anì tulónem do yóm nmou.”

¹⁶ Okóm yó balà Samwél du, monen, “Moen se ke snólókem o ke deng tnagak Dwata uu ne ke deng baling hohonen uu?

¹⁷ Deng nmò Dwata béléem yóm deng tehe eles hmonen do. Kóhen béléem yóm kogotem benwu ne blayen bè yóm kóm dumu tau Israél duhen Dabid.

¹⁸ Yó gónó Dwata mò du nim ni lanem là lemolò du yó kem hloloen kóm, duhen yóm là sulék keglaem du yó kem tau Amalikayt.

¹⁹ Haya, angat blay Dwata uu ne yó kem sendalù Israél elem hólól yó kem Flistin. Haya nói béléu bè ni se kóm dalang se yó kem ngaem logi. Ne gotu blay Dwata lu yó kem sendalù Israél elem hólól yó kem Flistin.”

²⁰ Tódô mugod ete tonok Sol. Ya tey sidek klikoen bè yóm tulón Samwél du. Là buden mgel abay se botong sendawen là dog mken ne suloyen buteng.

²¹ Hloni ebè Sol yóm libun mton bù tonen yóm tey sidek klikoen, yó monen mò du, “Ó Sér, tódô nmou yóm hmoem dou baluen ke mataye du.

²² Duhen ni, hnungolem o. Henkenu uu anì budi kemgis bè yóm kulékem.”

²³ Okóm mom kenbê Sol, monen, “Là kóe móyô mken.” Bud nubug le se kul yó kem tau mung du anì mken ne yó gónón btik ne myón bè bangkù.

²⁴ Ominen kendel tmétê yóm ngà safì deng habuen yóm libun mton bù. Ne wen arina nwahen, kendel nmoen mambang yóm laen dù bulung henoken

²⁵ ne kayen bè solu Sol ne bè solu yó kem tau mung du, omin le yó mken. Tikóng deng kken le, omin le lemwót bè yóm kifu yó.