1 Samwél 27 - Udél Dwata: Gna Kesfasad ne Lomi Kesfasad

Knô Dabid lem blóng yó kem Flistin

¹ Okóm ke Dabid, yó hendemen, “Angat wen kdawen hnatay Sol ou. Mom hyu ke mlóye etu bè benwu kem Flistin. Ke ni nmou là bud hnebel Sol dou bè ni bè benwu Israél. Laen dù hemenu ditu.”

² Tahu se, kewót Dabid bè yó, mung du yóm nem latu kem tauhen, mógów le ebè Akis yóm tau hol geta bè benwu Gat ngà Mauk logi.

³ Bè yó gónó le menwu bè Gat, kun benwu nogot Akis. Ket tau Dabid, gotu nwit le kem kul fes lówó. Nwit Dabid snéen yóm lewu yehenen, Ahinuam yóm libun lemwót bè Jisriil ne Abigil yóm libun lemwót bè Karmél tehe yehen Nabal.

⁴ Tikóng wen tmulón du ke Sol yóm deng klóy Dabid ebè Gat, là bud hnebelen du ne.

⁵ Sotu kdaw, yó mon Dabid mò ke Akis, “Ke yó dum hyu béléem, yake wen sotu benwu udì gónó me nô. Là hyuhen ke nô me béléem bè ni bè yóm kóm syudad.”

⁶ Duhen yó, bè yóm kdaw yó sù Akis lu bè yóm sotu benwu udì boluyen Siklag. Lenwóten bè yóm kdaw yó efet nim kmoen ni, nfun yó kem tau hol geta bè Juda yóm benwu Siklag.

⁷ Yó kegen Dabid nô bè benwu yó kem Flistin, sfalay bud fat bulón.

⁸ Yó nmò Dabid ne yó kem sendaluen, tendo nundug le yó kem tau Gisurayt ne tau Girsayt ne tau Amalikayt, kem tau sana menwu moni bè Sur efet kól etu ebè Idyip.

⁹ Ket benwu nundug Dabid balù sotu tau ke wen tebelen du logi duhen libun, gotu hnatayen. Gotu nwahen yó kem ubiha le ne yó kem safì le ne yó kem kudà asnu le ne yó kem kamél le ne kem nes le. Ominen yó mulék ebè Akis.

¹⁰ Ke gel snólók Akis Dabid, “Gónóm gu mundug kemdaw ni du?” Yó gel balà Dabid du, monen, “Nundugu yó kem tau bè Juda fi leged.” Sotu kdaw, bud monen, “Nundugu yó kem tau Jiramilayt.” Sotu kdaw, bud monen, “Nundugu yó kem tau Kinayt.”

¹¹ Gotu hnatay Dabid lu yó kem logi dalang se libun anì laen dù bélê le mógów ebè Gat mò tmulón du ke Akis yóm tahu nmoen. Ni se yóm tendo nmò Dabid bè yóm klawihen nô bè benwu yó kem Flistin.

¹² Tey ksalig Akis ke Dabid ne yó hendemen, “Bè nim gel nmoen ni gónón deng mutó nawa le du yó kem kun dumu Israél. Yó gónóm mon, angat hlós baling tóbóng lówóhu bè yóm klawihen mowil.”