1 Samwél 26 - Udél Dwata: Gna Kesfasad ne Lomi Kesfasad

Kehewà Dabid ke Sol

¹ Wen kem tau lemwót bè Sif mógów le ebè Sol bè Gibya, tulón le du, mon le, “Deng hebnos bè yóm sotu bulul udì bè Hakila Dabid, bè kilil yóm benwu laen hol wen tauhen.”

² Duhen yó, kewót Sol bè yó mógów ebè yóm benwu laen hol wen tauhen bè Sif na le e hnebel Dabid ne wen tlu libu sendalù alì mgélék bè Israél nwiten.

³ Bè yó gónó Sol kmamfù bè kilil yóm lan bè yóm bulul udì bè Hakila moni bè Jisimun. Okóm ke Dabid kun, tolo nô bè yóm benwu laen hol wen tauhen. Bè yóm kungol Dabid du yóm khebel Sol du bè yó

⁴ yó gónón mdók tau mò hmilung du ke tahu deng kól bè yó Sol. Ne tahu se, nô bè yó.

⁵ Omin Dabid mógów ebè yóm gónón seblà kmamfù Sol bè yóm kifu yó ne tonen tolo tungô lem kamfuen lewu le Abnér yóm ngà Nér kmandér bè yó kem sendalù Sol. Gotu le slibut masà hilol le yó kem sendalù bede deng le gotu tungô.

⁶ Omin Dabid smólók ke Ahimélék yóm tau Hitayt ne Abisay ngà Siruwa, dumun setwoli Juab, monen, “Tau du mung do edlem bè kamfù Sol?” Bnalà Abisay, monen, “Munge kóm.”

⁷ Tahu se, lemwót Dabid lewu le Abisay ebè kamfù le Sol bè yóm kifu yó. Bè yóm kkól le ditu, ton le tolo tungô Sol lem kamfù le ne mteg bè tonok klohok kuluhen yóm buyusen. Lemwót le Abnér ne yó kem dumu sendalù gotu le tungô hilolen.

⁸ Yó boyong Abisay ke Dabid, monen, “Deng tahu blay Dwata elem hólólem yóm hohonem kemdaw ni. Ni, hlusem o anì tbeku du yóm buyusen yóó anì mtool ebè tonok. Tek suléku tembek du là bud hewuhu du ne.”

⁹ Okóm yó balà Dabid ke Abisay, monen, “Béem abay hensidek, yakà tnafak Dwata du yóm tau hmatay yóm tau deng kun nélék.

¹⁰ Tódô tulónu kóm ktahuhen hlanu bè boluy yóm Dwata là matayen, Dwata se angat hmatay du hlanen bè des duhen ke bè gida.

¹¹ Okóm là móyô Dwata ke ou hmatay du yóm tau hol geta deng kun nélék. Okóm olo te ma yó dém buyus mteg bè kuluhen ne yóm gónóhen gel hemsù él mò ninumen, omin te lemwót.”

¹² Tahu se, nwa Dabid yóm buyus mteg bè kulu Sol ne yóm gónón gel hemsù él, omin le yó lemwót. Laen kô dù tau dmemen du yóm nmoen yó, duhen ke wen bélê le btik abay se deng henga Dwata lu.

¹³ Omin le Dabid mneged eta yóm bulul udì stimbang bè yóm gónó le kmamfù le Sol efet le malù mayuk bélê le.

¹⁴ Ominen tmaba ebè yó kem sendalù ne ebè Abnér yóm ngà Nér, monen mò kul, “Ó Abnér, btiki.” Bnalà Abnér, monen, “Tau tmaba yóó?”

¹⁵ Ne yó mon Dabid ke Abnér, “Igoem logi se kóm. Laen kô dù mkél kóm bè klamang Israél. Moen se ke là bnenteyem du yóm tau hol geta bélê ye? Deng wen tau hmusek du anì nan e tô hnatay.

¹⁶ Là kóen hyu yóm nmoem ni. Safau bè boluy yóm Dwata là matayen, bang ye knóón matay uu ne yó kem sendaluem abay se là bnentey ye du yóm tau hol geta bélê ye yóm tau deng kun nélék Dwata. Temngeli hmilol, nô se buyus yóm tau hol geta bélê ye? Ne nô se yóm gónón gel hemsù él nô klohok kuluhen?”

¹⁷ Tódô dilô Sol yóm udél Dabid, ne yó monen, “Uu kô ngau Dabid yóm mudél yó?” Bnalà Dabid, monen, “El, ou se ni, dou gónó mogot.

¹⁸ Moen du ke tendo ktesem o? Tedu deng nmou béléem du? Wen kô deng nmou sidek?

¹⁹ Duhen ni, dou gónó mogot, hol hnungolem udél yóm tóbóng lówóhem. Ke Dwata se yóm mdók kóm anì hnatayem o, hyu ke wen dsuu ebéléen anì henmóyóen. Okóm ke kul kóyô kem tau, Dwata he hol tmafak kul yóm kdê le deng matul do. Abay se deng lohem ou bè yóm dou benwu ne yó gónów là bud gnô lem blóng yó kem dou dumu ne gónów là bud tmaba ebè Dwata bè yó lómón yóm sana dou gel nmò.

²⁰ Yó gónóm mon, béem abay hdanag litóu bè ni bè tólóng benwu, yakà mayuken bè kun Gónô Dwata. Igoen uu se yóm tau hol geta bè Israél, kóem ktesem ni dum ou lómón ke ktesem ngà kutu ne lómón ke ktesem yóm onuk bnes gel nô lem bulul.”

²¹ Ne yó mon Sol, “Denge gemsalà se ni. Ó ngau Dabid, semfuléki edini. Là bud nifis hnatayu kóm ne, yakà teyen mebtes béléem yóm dou klowil bè nim kdaw ni. Tey ungel yóm nmou béléem. Tey sidek nim nmou ni.”

²² Ne yó balà Dabid du, monen, “Ni buyusem, tau hol geta. Hógówi edini sotu sendaluem mò ma du.

²³ Dwata he bemlay ofol bè yóm tau tedeng nmoen ne bè yóm kteneben. Deng blay Dwata uu elem tdoku kemdaw ni, okóm là kô hnatayu kóm abay se uu yóm tau hol geta deng kun nélék Dwata.

²⁴ Tey mebtes béléu yóm klowilem kemdaw ni, yake hol lómón yó se kebtesen bè Dwata yóm dou klowil. Dwata he hol lemwà do bè kdê yó kem glumfaku.”

²⁵ Omin Sol mon du mò ke Dabid, “Dwata he muyag kóm, Ngà. Tey dê he angat nmoem ne angat tey wen uléken.” Duhen yó, hlós ebè yóm kun gónó e solu Dabid ne fen mulék ebè gónóen ke Sol.