1 Samwél 25 - Udél Dwata: Gna Kesfasad ne Lomi Kesfasad

Katay Samwél

¹ Omin Samwél matay ne tódô kdéen tau Israél gotu stifun lemangag du ne lebeng le bè benwuhen bè Rama bè klohok gónóen. Kewót Dabid bè yó, bud mosol ebè yóm benwu laen hol wen tauhen boluyen Maun.

Kebut Dabid ke Nabal

² Bè yó bè Maun, wen tau alì kwasa nô bè yó ne wen tonoken nô bè Karmél. Botong tlu libu ubihahen ne lemibu kambingen. Bè yóm kdaw yó tolo nungusen bul yó kem ubihahen ditu bè Karmél.

³ Yó boluyen Nabal tau semfu gu bè Kalib. Ne yó boluy yehenen Abigil. Tey libun hulung hedem lelen tilob, okóm yóm Nabal tey mahil lembut lelen sidek knawahen bè kem dumun tau.

⁴ Tikóng gungol Dabid ditu bè yóm benwu laen hol wen tauhen yóm tolo khungus Nabal bul yó kem ubihahen,

⁵ yó gónón mdók sfolò bè yó kem tauhen hono lomi lemnok ebè Karmél ne monen mò kul, “Mógów ye ebè Karmél ebè yóm tau boluyen Nabal na ye mbal béléen hlan ye bè yóm dou boluy.

⁶ Mon ye mò du, ‘Dwata he henek nawahem dalang se yó kem fes lówóhem ne heneken snéen yóm kdê nfunem.

⁷ Deng wen tmulón du dou tolo nungusem bul yó kem ubihahem. Yóm tehe keseglomong me bè Karmél yó kem tau gel semgyok ubihahem, là kô hensidek me kul. Ne klawi le nô bè Karmél laen se dù lana bè yó kem ógófem.

⁸ Snólókem yó kem tauhem anì tulón le kóm nim ni. Yó gónóm mon, ke yó dum hyu béléem, hol hegfanem bè yó kem tauhu yóm kehyu kmò, lelen yó he geslà me yóm kwen ken nmoem. Ke yó dum hyu béléem, benlayem mi ken balù kihu nô béléem bè yó, mi kem tóbóng lówóhem dalang se yóm ngaem Dabid.’ ”

⁹ Tahu se, tikóng le kól bè Nabal yó kem tau dók Dabid gotu tulón le du yóm udél ni hlan le bè boluy Dabid, omin le na mangat.

¹⁰ Okóm yó balà Nabal yó kem tau dók Dabid, monen, “Tau du de nim Dabid ni? Tmau du de nim ngà Jisi ni? Ni kmoen ni tey dê tau dók henlóy le ogot le.

¹¹ Mone tô blayu ebè yóm tau là tngónu du gónón lemwót kô yóm mambangu ne élu ne utón deng hnatayu mò hkenu yó kem tau hungusu bul ubiha?”

¹² Duhen yó, bud le beklil mulék yó kem tau dók Dabid yó koni ne gotu tulón le ke Dabid yóm kdê udél Nabal.

¹³ Ne yó mon Dabid ebè yó kem tauhen, “Lumak ye sudeng ye.” Tahu se, gotu lumak le sudeng le yóm igò Dabid lemumak du yóm kun sudeng. Botong tô fat latu tauhen mung du ne lewu latu fen tebel bè yó mò mentey yó kem ngom le.

¹⁴ Okóm wen sotu tóbóng lówó Nabal tmulón du ke Abigil yóm yehen Nabal, monen, “Wen kem tau dók Dabid gu bè yóm benwu laen hol wen tauhen anì na le e mbal bè Nabal, okóm mom hennéen lu.

¹⁵ Igò tey kehyu le ebélê me yó kem tau yó, là kô hensidek le kum. Yóm klawi me nô ditu bélê le lem bnes, laen dù lana bélê me.

¹⁶ Bè ktahuhen, kifu ne kemdaw lómón ke lu yóm beng hmilol kum dalang se yó kem ubiha me.

¹⁷ Ni holi géhél hedem mebel kmò atulem du, yakà wen gbunù yehenem du gomong yó kem fes lówóhen. Tu sónmoen tendo huseng, laen kô mlos mudél ebéléen.”

¹⁸ Tahu se, tódô kendel hebetik Abigil, ma lewu latu botù mambang tahà ne lewu sning kulit ógóf hnok tifas grép ne limu ubiha deng tnétê ne lewu sakù halay deng senla ne lematu hunges bungu grép deng hendaw ne lewu latu hunges bungu fig, ominen gotu hlulón du bè yó kem kudà asnu.

¹⁹ Ne yó monen bè yó kem tóbóng lówóhen, “Gna ye todole kuy.” Okóm là tulónen du ke tuha logihen yóm nmoen yó.

²⁰ Yóm igoen smakay yóm kudà asnuhen mosol ebè yóm sbong, tódô kendel tonen Dabid ne yó kem tauhen, mosol le se kul gu ditu, segeslong le.

²¹ Blaem kóm hanà lomi mon Dabid, “Laen dù muhen yóm gel kbentey tekuy yó kem ógóf Nabal anì laen dù lana bélê le bè yóm benwu laen hol wen tauhen. Deng mom bnalaen sidek yóm hyu deng nmò tekuy béléen.

²² Dwata he hol tmafak do ke wen dù logi mò nmò béléen hlafus haya.”

²³ Bè yóm kton Abigil ke Dabid tódô kendel kmó ta kudà asnuhen, hegdufok ebè tonok bè solu Dabid.

²⁴ Hegdungul bè tihen ne monen mò ke Dabid, “Ó Sér, tek sotuhu mbô du yóm tey salà me béléem. Ke yó dum hyu béléem, hol hnungolem nim tulónu kóm.

²⁵ Hol béem abay snolò do yóm tey sidek nmò Nabal. Wen ungelen, yó se lan yóm boluyen. Okóm yóm kógów le ebélê me yó kem tau dókem, là kô tonu kul.

²⁶ Duhen ni, Sér, Dwata se deng hemseng kóm anì là melesi ne là hnatayem yó kem hohonem. Ne nim udélu ni hlanu bè yóm Dwata là matayen ne taman mowili se kóm, yó kem hohonem ne yó kem tau matul mò sidek béléem, Dwata he hol heskél kul ke Nabal.

²⁷ Ne ni, henmóyóem nim basahu kóm dalang se yó kem tauhem.

²⁸ Hol hnifótem ou ke deng wen sidek nmou béléem. Dwata he angat hembaling kóm tau hol geta kkólen bè yó kem angat lugodem, yakà tendo wen gónón hesfatay kóm. Ne laen kô dù sidek deng tonen béléem bè yóm klawihem mowil.

²⁹ Baluen ke senktes hnatay le uu yó kem hohonem, tey kofinen kóm yóm sana kóm Dwata hol gónó mogot, lómón kesegyok tau yóm kimu alì mebtes alì legenen. Okóm yóm kul klowil yó kem hohonem, angat tódô lana lómón tódô klana yóm botu ke ubat bè hasut.

³⁰ Ke deng hendohò Dwata yóm kdê deng fasaden kóm ne ke deng henbalingen uu tau hol geta bè Israél,

³¹ laen dù genselem, abay se là dengi meles ne là hmatayi tau hkawang. Ne ke deng nmò Dwata béléem ni kem tey hyu ni, hol béem abay klifót ou.”

³² Yó balà Dabid ke Abigil, monen, “Tey megdóyón yóm Dwata yóm Dwata yó kem tau Israél, yóm deng hógów kóm na a semlong do kemdaw ni.

³³ Slamat bè Dwata bè yóm tey khulungem hedem. Dwata he hol muyag kóm lemwót bè yóm deng kehsengem do kemdaw ni anì là melese ne là hmataye tau.

³⁴ Dwata se deng hemseng do anì là hensideku kóm. Ke là hetlasik senlongem do, laen dù logi mò nmò bè Nabal ke mowil hlafus haya, yakà deng safau du bè yóm Dwata là matayen.”

³⁵ Omin Dabid hemmóyô yó kem basahen du, ne monen mò du, “Muléki ebè gónóem, Dwata he henek nawahem. Deng gungolu yóm monem ne nmou yóm nóyóem.”

³⁶ Tikóng kól bè gónô Abigil tódô glohen Nabal, wen tey ken bong nmoen, hol lómón ke du yóm sotu tau hol geta. Tey klengelen, yó gónó Abigil là tagad tmulón du du yóm deng keston le Dabid efet hlafus haya.

³⁷ Tikóng hlafus bè yó, bè yóm deng kehetngón Nabal, gotu tulón Abigil du yóm kdéen. Tódô mugod Nabal, là bud gekdolen du lówóhen.

³⁸ Timbow deng dô sfolò kdawen miwes bè yó, tey kehleed Dwata des Nabal ne matay.

Kyehen Dabid ke Abigil

³⁹ Timbow gungol Dabid yóm deng katay Nabal, yó udélen, monen, “Megdóyón yóm Dwata, du se fen meles ke Nabal bè yóm sidek deng nmoen béléu. Deng henseng Dwata o anì là melese. Deng guta Nabal ne balà yóm nmoen.” Omin Dabid kendel mdók tau ebè Abigil anì snólók le ke móyô myehen ke Dabid.

⁴⁰ Timbow le kól bè Karmél bè gónô Abigil yó kem tau dók Dabid yó koni, tulón le ke Abigil, mon le, “Hógów Dabid mi edini béléem anì nwit me uu mò yehenen.”

⁴¹ Tódô hegdufok ebè tonok Abigil, monen, “El, móyóe se mò heseken mò molob ti yó kem tóbóng lówóhen.”

⁴² Tódô kendel htifes Abigil ne wen limu libun tóbóng lówóhen mung du, ominen smakay kudà asnu mung bè yó kem tau dók Dabid ne baling yehen Dabid.

⁴³ Wen gna yehen Dabid boluyen Ahinuam, libun lemwót bè Jisriil ne sedwey le yóm lewu le.

⁴⁴ Blaem yóm yehen Dabid boluyen Mikal yóm ngà Sol, deng mom hyehen Sol bè yóm sotu tau lemwót bè Galim boluyen Palti ngà Lais logi.