1 Samwél 24 - Udél Dwata: Gna Kesfasad ne Lomi Kesfasad

Kehewà Dabid ke Sol

¹ Bè yóm kulék le Sol gu bè yóm kesgida le yó kem Flistin, wen tmulón du deng bud kól Dabid bè yóm benwu laen hol wen tauhen boluyen In-gidi.

² Yó gónó Sol bud lemwót mógów ebè In-gidi. Wen tlu libu sendalù mgélék bè klamang Israél nwiten na le e hnebel Dabid ne yó kem tauhen bè yó kem botu gónó le gel nô yó kem kambing lem bnes.

³ Tikóng kól bè yóm labat hilol lan gónó le gel hemsù ubiha ke kifu, wen kilib bè yó ne husek elemen Sol anì mebel solu. Blaem hol ditu lem yóm kilib yó gónó le hebnos le Dabid ne yó kem tauhen.

⁴ Yó boyong le ke Dabid yó kem tauhen, mon le, “Deng duhen ni ne yóm kdaw tehe mon Dwata mò kóm, ‘Blayu elem hólólem yóm hohonem ne tódô nmoem yóm kóm kóyô béléen.’ ” Kewót Dabid bè yó, hganag holo ebè Sol, wen udì dnólóhen bè kilil nesen.

⁵ Okóm là menek kegnóm Dabid du yóm deng kdólóhen nes Sol.

⁶ Yó monen bè yó kem tauhen, “Tódô tngón Dwata là hyuhen yóm nmou ni. Lómón ke deng hensideku yóm tau deng tenwél hnolo, igoen du yóm tau deng kun nélék Dwata.”

⁷ Duhen yó, tey kbólów Dabid yó kem tauhen anì là hnatay le ke Sol. Kewót Sol bè yóm kilib yó ne hlós ebè yóm gónón e solu.

⁸ Omin Dabid hewà se kun lem yóm kilib yó tnabahen Sol, monen, “Ó dou gónó mogot.” Tikóng binguy Sol, tódô tonen Dabid hegdufok ebè tonok bè kadaten du.

⁹ Omin Dabid mon du mò ke Sol, “Moen du ke gel hnungolem yó kem tau mon du mò kóm tô hensideku uu?

¹⁰ Tódô kóm mata se mton du kemdaw ni yóm là ktahuhen. Deng blay Dwata uu elem hólólu ditu lem kilib. Ne wen kem tauhu mon du mò dou, hnatayem ne. Okóm là. Mom lenwau u. Yó monu mò kul, ‘Là glefu hemsidek du yóm tau deng kun nélék Dwata.’

¹¹ Ngem, hnénégem nim nô lem hólólu. Deng dnólóhu bè kilil yóm nesem okóm là kô hnatayu kóm. Bè ni se gónóm temngón du laen dù hendemu ke tô hnatayu uu ne laen se dù deng salà nmou béléem, balù yóm tendo kdulokem do anì ghatayem o.

¹² Dwata he kmukum kut. Déke tnafaken u bè yóm tô nmoem béléu. Okóm béléu do, là kô gbeku du ke tô hensideku uu.

¹³ Lómón yóm gel mon le, ‘Són yóm tau sidek kehedemen yóm tau gel mò du yóm sidek.’ Duhen yó, hol hentahuhem nim monu ni, là kô gbeku du ke hensideku uu.

¹⁴ Tau du de yóm tô nalu hnatay yóm tau hol geta bè Israél? Tau du de yóm tô ktesen? Lómón tô ktesen ohu deng mlef, duhen ke ktesen yóm kutu.

¹⁵ Dwata he kmukum kut ke mahil du bélê te mò du yóm tedeng ne Dwata he tmafak yóm tau wen salaen. Du he mfi do ne angat lenwaen o lem tdokem.”

¹⁶ Timbow deng kudél Dabid ebè Sol omin Sol tmaba ebè Dabid, monen, “Uu kô ngau Dabid yóm mudél yó?” Omin Sol mkik.

¹⁷ Bud monen mò ke Dabid, “Uu se hyu sentahu, deng mom bnalaem hyu yóm sidek tô nmou béléem.

¹⁸ Deng htonem do kemdaw ni yóm tey kehyuhem, là kô hnatayem dou igò Dwata deng hemsù dou lem tdokem.

¹⁹ Tmau du se gembek hewà du yóm hohonen ke deng nô lem hólólen? Dwata he malà kóm bè yóm tey hyu deng nmoem béléu kemdaw ni.

²⁰ Ne ni, deng gtukulu ne uu se angat tau hol geta bè Israél ne angat tey mbegel yóm benwu Israél bè yóm kogotem du.

²¹ Duhen ni, smafai béléu hlanem bè boluy Dwata, ke dengi tau hol geta hol béem abay hnatay do yó kem fes lówóhu kkólen bè yó kem sfuhu anì là lana boluyu.”

²² Tahu se, smafà Dabid. Omin Sol yó mulék ebè gónóen. Okóm kul le Dabid ne yó kem tauhen, bud le semfulék ebè yóm gónó le hebnos.