1 Samwél 23 - Udél Dwata: Gna Kesfasad ne Lomi Kesfasad

Kofin Dabid yóm benwu Kila

¹ Sotu kdaw, wen tmulón du ke Dabid deng le mundug ebè Kila yó kem Flistin, tódô le mnagaw yó kem halay bè yó kem gónó kmusu.

² Yó gónó Dabid na smólók ke Dwata, monen, “Nundugu lu kô yó kem Flistin yó?” Yó balà Dwata ke Dabid, monen, “Yó ne lemwóti, nundugem yó kem Flistin, lenwaem yó kem tau bè benwu Kila.”

³ Okóm yó mon le mò ke Dabid yó kem tauhen, “Balù bè ni bè Juda tey klikò me. Sélétem mon ne ke ditu bè Kila na e tô mundug yó kem tey sendalù Flistin.”

⁴ Omin Dabid bud smólók ke Dwata. Ne yó balà Dwata du, monen, “Yó ne lemwóti ebè Kila. Blayu elem hólólem yó kem Flistin hohonem.”

⁵ Tahu se, lemwót le Dabid ebè Kila, mung du yó kem tauhen na le e nundug yó kem Flistin. Tey wen hnatay le bélê le ne gotu nwa le yó kem ógóf le. Ne lenwà Dabid yó kem tau bè Kila.

⁶ Bè yóm klóy Abyatar yóm ngà Ahimélék ebè Dabid, eles nwiten yóm ifod gónó le gel smólók ke Dwata. Bè yóm kmungen ke Dabid ebè Kila, deng bud eles nwiten yóm ifod yó.

⁷ Ne bud wen tmulón du ke Sol yóm deng knô Dabid bè Kila ne yó mon Sol, “Tey hyu ni, deng blay Dwata Dabid elem hólólu, tódô du htofus knóen lem nim syudad slibut beng ni.”

⁸ Duhen yó, gotu htaba Sol yóm kdê sendaluen anì na le e snibut nundug bè Kila Dabid ne yó kem tauhen.

⁹ Okóm tikóng tngón Dabid yóm katul Sol du yó, yó monen mò ke Abyatar yóm tau blóng ebè Dwata, “Nwitem edini yóm ifod anì tngón te yóm kóyô Dwata bélê te.”

¹⁰ Omin Dabid smólók ke Dwata, “Ó Dwata yóm Dwata yó kem tau Israél, deng gungolu lemwót bè yóm knóu bè ni gónó Sol mundug ebè ni bè Kila nan e genlà nim syudad ni.

¹¹ Hlus le o elem hólólen kô ni kem tau bè ni bè Kila? Mundug ebè ni kô Sol lómón yóm deng gungolu? Ó Dwata yóm Dwata yó kem tau Israél, henkoduhu béléem, hol tulónem do.” Ne yó balà Dwata du, monen, “Angat mundug.”

¹² Ne yó bud snólók Dabid, monen, “Angat blay le o elem hólól Sol kô ni kem tau bè Kila gomong yó kem tauhu?” Mon Dwata se, “El, blay le yu.”

Kehebnos Dabid bè yóm benwu laen hol wen tauhen

¹³ Kewót Dabid bè yó bè Kila ne wen dô nem latu tauhen mung du mógów le tmimbul kihu gónó le e solu. Tikóng tngón Sol yóm deng klóy Dabid, yó gónón là dohò mógów ebè Kila.

¹⁴ Lemwót ke Dabid, tódô hebnos bè yó kem bulul lemnek bè benwu laen hol wen tauhen boluyen Sif. Ket kdaw Sol mebel ke Dabid okóm là kô blay Dwata du elem hólólen.

¹⁵ Sotu kdaw, yóm igò Dabid tolo nô bè Hurés yóm sotu benwu glem lem yóm benwu laen hol wen tauhen boluyen Sif, gungolen mógów ebè yó Sol anì nan e hnatay.

¹⁶ Kewót Junatan bè yó yóm ngà Sol logi, hnebelen Dabid bè Hurés ne tey ketgelen du bè yóm khofinen bè Dwata.

¹⁷ Ne yó monen mò ke Dabid, “Béi abay hlikò, là kô ghatayen kóm mà. Uu se angat tau hol geta bè Israél ne smugunge béléem. Balù mà, deng eles tngónen se kun nim ni.”

¹⁸ Omin le bud hmomi du bè solu Dwata yóm deng senfasad le bè yóm keswè le. Omin Junatan mulék ne fen tebel bè yó kun ke Dabid bè Hurés.

¹⁹ Okóm lemwót yó kem tau bè Sif mógów le ebè Sol bè Gibya ne tulón le du, mon le, “Hebnos bélê me Dabid ditu bè Hurés, nô bè ngà bulul Hakila fi leged bè yóm benwu Jisimun.

²⁰ Ke móyói kemfô du, mosoli ebélê me bè yóm kdaw hyu béléem anì kenfô me.”

²¹ Ne yó balà Sol kul, monen, “Dwata he muyag kuy bè yóm któbóng ye do.

²² Bud ye mulék, na ye hol bud hnénég tahu gónón nô ne ke tau du deng mton du bè yó, yakà teyen hulung hebnos yóm tau yó.

²³ Senket tenngel ye yóm kdê gónón gel hebnos ne bud ye semfulék edini ke deng hol gtukul ye gónón nô anì munge kuy. Ke tolo nô bè yóm benwu yó tódô lenngebu klamang Juda mebel du.”

²⁴ Kewót le bè yó, yó kem tau Sif mulék le, gna le bè Sol. Okóm kul le Dabid ne yó kem tauhen, deng le bud mili etu bè yóm benwu laen hol wen tauhen boluyen Maun, nô lem yóm datal boluyen Araba fi leged yóm benwu Jisimun.

²⁵ Tikóng tngón Dabid yóm kebel le Sol du ne yó kem sendaluen, yó gónón bud hlayuk bè yó, hlós ebè yóm botu bong nô lem yóm benwu laen hol wen tauhen boluyen Maun ne bè yó bud gónón hebnos. Tikóng gungol Sol tódô senflósen hmebel du.

²⁶ Lemwót le Sol ne yó kem sendaluen, mlan le bè doli bulul ne fen le nô bè doli yóm bulul yó kul le Dabid ne yó kem kun tau, henlóy le Sol. Timbow tô gafit le Sol ne yó kem sendaluen Dabid ne yó kem tauhen,

²⁷ kendel wen tau msut bè Sol ne wen tulónen du, monen, “Géhéli mulék, deng nundug kem Flistin benwu tekuy.”

²⁸ Duhen yó, là bud ktes Sol ke Dabid, bud semfulék nan e mit sgida bè yó kem Flistin. Yó gónó le moluy du Botu sentagak yóm benwu yó.

²⁹ Bud kewót Dabid bè yó, hebnos ditu bè In-gidi.