1 Samwél 21 - Udél Dwata: Gna Kesfasad ne Lomi Kesfasad

Kehlóy Dabid ke Sol

¹ Kewót Dabid bè yó, mógów ebè yóm benwu boluyen Nob nan e hnebel Ahimélék yóm tau gel blóng le ebè Dwata bè yó. Bè yóm kton Ahimélék du ya tey klikoen botong kenkel, snólóken “Moen ke mógówi sotu? Moen ke laen dù tau mung kóm?”

² Ne yó mon Dabid mò ke Ahimélék, “Wen hógówen do yóm tau hol geta ne monen mò do béen wen tau tnulónu bè nim kógówu ni. Ne yó kem tauhu, deng wen sentulón me mò gónó me ston.

³ Na, wen kô kenem kut bè ni? Yake benlayem ou limu botù mambang tahà duhen ke wen dumu ken nô béléem bè ni.”

⁴ Ne yó balaen ke Dabid yóm tau blóng ebè Dwata yó, monen, “Laen dù mambang hkawang nô béléu bè ni, són yóm mambang deng dsù ebè Dwata. Blayu kóm nim ni ke là deng wen sentungô le libun yó kem tauhem.”

⁵ Ne yó balà Dabid yóm tau blóng ebè Dwata yó, monen, “Béem htafa nawam. Ke gel wen nógów me, là kô me gel semtungô libun baluen ke nô kihu nógów me hyu ke hol me hólós. Sélétem mon ni dum kógów me ni.”

⁶ Tahu se, lemwót bè yóm klaen dù dumu ken bè yó, tódô blay yóm tau blóng ebè Dwata ke Dabid yóm mambang deng sù le bè solu Dwata lem Gónóen, yóm mambang lomi nwa le ta yóm lemisa Dwata ne bud gel tles le du yóm mambang hanà kinì lomi nmò.

⁷ Blaem bè yóm kdaw yó, nô bè yó Dóg yóm tau Idom geta bè yó kem tau semgyok ógóf Sol. Yó nmoen bè yó, mung bè yóm gel lolò le bè yóm khólós le.

⁸ Omin Dabid smólók ke Ahimélék, “Wen buyusem bè ni kô duhen ke sudeng? Là dog nwitu du yóm dou abay se tey meslò yóm kdóken do yóm tau hol geta.”

⁹ Yó balà Ahimélék du, monen, “Són olo nô béléu són sudeng Gulayat yóm Flistin tehe hnatayem bè Datal Ila. Yó hnunges nes, nô sentu yóm nes ifod gel lesek yó kem tau blóng ebè Dwata. Ke móyói nwahem abay se laen dù bud dumu ngom sfatay bè ni.” Mon Dabid se, “Blayem do sen. Laen dù bud dumu sudeng ke mkél bè nim sudeng ni.”

¹⁰ Kewót Dabid bè yó bè yóm kdaw yó henlóyen Sol, mógów etu bè yóm tau hol geta bè Gat boluyen Akis.

¹¹ Okóm yó mon yó kem genlal Akis, “Dabid sem ni du, yóm tau hol geta bè Israél. Igò sem du du yóm tehe gónó le semngal madal bè lan, ‘Bè libuhen kun hnatay Sol ne botong bè sfolò libuhen kun hnatay Dabid.’ ”

¹² Gungol Dabid nim udél le ni ne botong likò, déke wen nmò Akis béléen.

¹³ Yó nmoen, hlingu tau lengel mata tendo kmulés bè bak tikeb yóm gónô bong lel iwolen moyos bè bngeten.

¹⁴ Duhen yó, yó mon Akis bè yó kem tóbóng lówóhen, “Tenngel ye dé yóm tau lengel mata yóó. Moen ke nwit ye edini béléu?

¹⁵ Tey deng dê ne tau lengel mata nô bélê tekuy bè ni. Moen se ke bud nwit ye edini bè gónóu nim sotu tau ni?”