1 Samwél 20 - Udél Dwata: Gna Kesfasad ne Lomi Kesfasad

Któbóng Junatan ke Dabid

¹ Kewót Dabid bè yó mlóy gu bè Nayut yóm benwu snakuf Rama, nan e hnebel Junatan ne monen mò du, “Tedu deng nmou du? Tedu se salau du? Tedu se deng nmou sidek bè maem ke tô hnatayen ou?”

² Bnalà Junatan se, monen, “Là tahuhen yóm monem yó. Là gbek mà mò du yóm yó abay se gotu tulón mà do yóm kdê tô nmoen, laen dù bnosen béléu baluen ke yó kem leneken. Ke wen tô nmoen béléem là kô bnosen du béléu. Là kóen tahu yóm monem yó.”

³ Ominen wen safà mget nmò Dabid bè Junatan, monen, “Tngón maem yóm tey klinggel keswè te, kaem yó mon nawan, ‘Là kô tulónu du ke Junatan nim ni, déke sidek kegnómen du.’ Okóm tulónu kóm ktahuhen, smafae béléem ne gungol yóm Dwata là matayen, denge tey moni ne bè hatay.”

⁴ Mon Junatan se, “Tnóbóngu uu, balù nô hmoem do.”

⁵ Bnalà Dabid, monen, “Ngem, haya yóm bud kestifun me hligal bè yóm Lomi Bulón ne gele mung mken bè maem. Okóm haya naw hebnos ditu lem bnes efet kifu bè yóm getluhen kdaw.

⁶ Ke hnebel maem ou, tulónem du denge mbal béléem naw mulék ebè benwuhu bè Bitlihim, munge bè yó kem fes lówóhu bè yóm gel kedsù le ebè Dwata ket halay.

⁷ Ke monen, ‘Hyu’ bè yó gónóm temngón du laen dù sidek atulen. Okóm ke lembut, bè yó gónóm temngón du deng hol nô bè nawahen hmatay do.

⁸ Ni hnihu béléem, hol tnóbóngem ou mlan bè yóm deng tehe kesfasad te bè keswè te. Okóm ke deng wen se sidek nmou bè maem tódô uu ne hmatay do, béem blay ou elem tdok maem.”

⁹ Ne yó udél Junatan ebè Dabid, monen, “Là. Là gbeku mò du yóm yó. Deng sana tulónu kóm ne ke deng tngónu natul mà uu.”

¹⁰ Omin Dabid smólók ke Junatan, “Mò tô ketngónu du du ke lenbut maem o?”

¹¹ Ne yó balà Junatan ke Dabid, monen, “Mungi do etu ebè uma.” Tahu se, lemwót le.

¹² Omin Junatan bud mon du mò ke Dabid, “Gungol Dwata nim fasadu kóm ni, yóm Dwata yó kem tau Israél. Lómón ni kemdaw haya duhen ke lewu ni bude stulón ke mà. Bud tngónem he ke tedu kehedemen ebéléem. Ke hyu udélen etahem, bud hetngónu kóm snéen.

¹³ Okóm ke alì lenbut mà uu ne kóyóen ke hnatayen uu, Dwata he hmatay do ke là sebu du kóm anì glóyi. Dwata he tendo nô béléem lómón yóm tehe knóen bè mà.

¹⁴ Bè yóm igou tolo mowil, hol hegfanem béléu yóm kbong nawahem do lómón yóm nawa Dwata ebélê te. Okóm ke mataye

¹⁵ hol bud hegfanem bè yó kem fes lówóhu nim kbong nawa ni.

¹⁶ Ke deng genlà Dwata yóm kdê hohonem, hol béem abay homong genlà do yó kem dou fes lówó bè yó kem fes lówó Sol. Ke yó nmoem, Dwata he angat smolò du béléem.”

¹⁷ Omin Junatan bud hsafà ke Dabid bè yóm kbong nawahen du abay se ke Junatan kun, yóm kbong nawahen ke Dabid lómón kbong nawahen yóm kun knô.

¹⁸ Ne yó bud udél Junatan ebè Dabid, monen, “Haya yóm bud kestifun me hligal bè yóm Lomi Bulón. Bong hnebel mata me uu ke laen dù myón du yóm kóm gónó gel myón bè lemisa.

¹⁹ Hayahen bè yó, ke là tonen kóm milud he khebelen kóm. Ke deng kifu bè yó, mógówi ebè yóm tehe gónóm hebnos mangati bè yó sentu yóm botu luduk.

²⁰ Angate mógów ebè yó se do ne lemtoe tlu hanak bè kilil yóm botu luduk yó, lómón ke wen hnanaku.

²¹ Ominu mdók yóm ngà logi mung do mò bud ma du béléu yóm hanak yó. Ke monu mò du, ‘Yó hanak nô fi dini bè yóm gónóm mdà’ bè yó gónóm temngón du ne gungol yóm Dwata là matayen, laen dù hemsidek kóm.

²² Okóm ke monu mò du, ‘Budi etu he, nô ditu hanak sentuhem’ uka wóyón géhéli lemwót, deng Dwata yóm hógów kóm.

²³ Ne Dwata he hemlós du nim deng senfasad te ni, yakà deng gungolen.”

²⁴ Tahu se, hebnos Dabid ditu bè uma. Ne bè yóm kdaw kestifun le hligal bè Lomi Bulón, myón bè lemisahen yóm tau hol geta ne mken.

²⁵ Myón bè yóm sana kun gónó gel myón moni bè beng, myón smolu ebéléen Junatan ne myón klohoken Abnér ne laen dù myón du yóm kun gónó myón Dabid.

²⁶ Okóm laen dù mon Sol bè yóm kdaw yó. Yó hendemen, “Déke deng wen gónón là mólós bè solu Dwata Dabid ne là hyu kmungen bè nim kehligal ni.”

²⁷ Okóm hayahen bè yó bud senged, laen dù tau tonen myón bè yóm kun gónó myón Dabid. Yó gónón smólók ke Junatan, “Moen ke là mungen mken bè ni yóm ngà Jisi nbuten ekimel?”

²⁸ Bnalà Junatan, monen, “Deng mbal béléu mógów ebè Bitlihim kun.

²⁹ Móyô mung bè yóm kedsù le ebè Dwata yó kem fes lówóhen. Kóyô twoguhen ke hol nô bè yó se kun, yó gónów hewót du. Ni se gónón là nô bè ni.”

³⁰ Ya tey sidek kebut Sol ke Junatan, monen mò du, “Uu se ngà yóm libun mgel kulu, alì matù. Ilóem ofo kóm kô ke là tngónu du yóm deng kegfihem bè Dabid? Yóm deng nmoem yó, henyakem knóem ne henyakem yéem.

³¹ Taman tolo mowil talak tonok yóm ngà Jisi yó, là kói mogot benwu se kóm. Yó gónóm mon, hangayem edini na hnatay.”

³² Okóm yó balà Junatan ke maen, monen, “Moen ke tô hnatay? Tedum kat salaen du?”

³³ Omin Sol dmikót buyusen nan e ndek Junatan tô hnatayen. Bè yó ne gónó Junatan dmilô du yóm hol kóyô Sol hmatay ke Dabid.

³⁴ Tódô hebkó mdà Junatan, tnagaken yóm lemisa botong kebuten ne sendawen là mken lemwót bè ksidek kegnómen du bè yóm sidek nmò maen bè Dabid.

³⁵ Hlafus hayahen bè yó lemwót Junatan mógów ebè uma nan e ston ke Dabid, lómón yóm deng sentulón le. Wen ngà logi nwiten mung du mò semtifun yó kem hanaken.

³⁶ Ne yó monen bè yóm ngà logi yó, “Mlóyi anì tonem yó kem hanak letou.” Tahu se, lemwót mlóy yóm ngà logi yó, omin Junatan lemtò du tukô gnahen yóm hanak.

³⁷ Tikóng móyón gefet bè yóm hanak yóm ngà logi yó, tmaba Junatan, monen, “Tu nô sentuhem yóm hanak.

³⁸ Heflóngi, hgéhéli, béem feng nangat.” Tahu se, nwa yóm ngà yó kem hanak ne bud nwiten ebè amohen.

³⁹ Là kô tngónen du yóm ngà yó lan yóm nmoen, tek són Junatan temngón du lewu le Dabid.

⁴⁰ Omin Junatan bemlay du bè yóm ngà yó yóm bohohen ne yó kem hanaken ne monen mò du, “Nwitem mulék etu bè syudad.”

⁴¹ Timbow deng lemwót yóm ngà, omin Dabid hewà gu bè yóm gónón hebnos moni bè yóm botu luduk. Botong tlu dulék Dabid mtud kuluhen bè tonok bè solu Junatan bè yóm tey kadaten du. Bè yóm keskef le senged kul mkik ne ya tey dlumu Dabid. Omin le yó skó.

⁴² Yó són udél Junatan ebè Dabid, monen, “Tenngelem kógówem Dabid, Dwata he mung kóm ne Dwata he tmóbóng kut anì là gbà yóm deng kesfasad te hlan te bè boluyen, yóm kmon te du, ‘Dwata he tendo nô lem blóng te kkólen bè yó kem angat lugod te efet kól bè laen dù sónen.’ ” Omin Dabid lemwót ne fen mulék ebè syudad ke Junatan.