1 Samwél 2 - Udél Dwata: Gna Kesfasad ne Lomi Kesfasad

Kni Hana bè Dwata

¹ Omin Hana mni bè Dwata, monen, “Tey kehefligalen do Dwata. Ya tey któbóngen dou. Laen dù bud gónóhu myak ne bè yó kem hohonu, tey kligalu ne ni lemwót bè yóm tey któbóng Dwata do.

² Laen dù semnged du yóm kun kólós Dwata. Laen dù dumu Dwata, són uu. Laen dù dumu gónó heklung mkél bè yóm kut Dwata.

³ Tenflok ye ne yóm keheklabak ye ne kehegmón ye. Abay se yóm Dwata, deng gotu tngónen kdéen ne gotu knukumen kdéen nmò tau.

⁴ Deng gotu tenfoken boho yó kem alì kemgis, okóm fen hekgisen yó kem lunog.

⁵ Yó kem tau tehe alì wen ken le, deng le baling bitil. Okóm yó kem tau tehe bitil, deng le gemtu. Yóm libun tehe atil, deng baling dê ngaen. Okóm yóm libun tey tehe wen ngaen, deng mom baling libun tódô sentebel.

⁶ Dwata se gónón lemwót yóm hatay ne bud du se gónón lemwót yóm klowil. Wen se tau hógówen ebè benwu yó kem deng matay ne wen se tau bud hlowilen.

⁷ Bè Dwata se gónón lemwót yóm kélél ne bud du se gónón lemwót yóm kendengen. Wen se tau heglaanen, ne wen se hegetahen.

⁸ Nkayen gu lem kfung yó kem tau élél, nwahen lu gu desenfól yó kem tau laen dù kwa le. Suen lu bè gónó le myón yó kem ngà tau hol geta, bè yóm gónó le myón yó kem tau nadat. Yakà ke Dwata du funen yó kem tud blóngón tonok ne tahen gónón hyón du yóm klamang benwu.

⁹ Gel kenlungen yó kem tau mimón du, okóm yó kem tau mò sidek són le lem gónón kmifu. Laen dù gendeng tau ke mlan bè kun kgis.

¹⁰ Yó kem hmohon ke Dwata angat le gotu meglà. Angat wen leték hwiten ebélê le lemwót gu bè longit. Dwata se angat kmukum du yóm kdéen tau bè klamang benwu. Angat hekgisen yóm kun tau hol geta ne hegmoen yóm kun deng nélék.”

¹¹ Omin le mulék ebè benwu le bè Rama le Ilkana ne Hana. Okóm fen tebel bè yó kun ke Samwél mò tóbóng lówó Dwata mlan bè yóm gel któbóngen ke Ili yóm tau gel blóng ebè Dwata.

Yó kem ngà Ili logi

¹² Wen lewu kem ngà Ili logi bede hono sidek yóm gel nmò le, snonol le Dwata, là kô nadat le du.

¹³ Là kô lolò le du yóm hlolò le yó kem tau gel blóng ebè Dwata. Deng mom yó nmò le ke wen tau demsù ebè Dwata, wen tau dók le mit tbek bong tlu nihihen. Yóm igoen tolo kmodok yóm utón dsù le

¹⁴ lemwót yóm tau dók le yó tenbeken yóm utón nô lem kuleng ne balù nô kbong yóm utón getbeken, yó funen yó kem ngà Ili logi. Tódô kdê yó kem tau Israél demsù ebè Dwata bè yó bè Silu, sal lómón ni nmò le bélê le.

¹⁵ Bud senged se nmò le bè yóm gu laan le là deng hkekeb yóm abù ógóf dsù le ebè Dwata, bud lemwót yóm tóbóng lówó yó kem ngà Ili, mon le bè yóm tau tolo demsù, “Benlayem o utón tolo matak mò tnétê yóm tau gel blóng ebè Dwata. Là henmóyóen du yóm utón deng tnógó, són utón tolo matak.”

¹⁶ Ne ke yó balaen du yóm tau demsù yó, “Kihu kbong nwahen, syan ke na te hkekeb yóm abuen mò ke Dwata.” Yó bud mon yóm tóbóng lówó yó, “Là, géhél blayem ne. Ke là blayem du, tódóe ma.”

¹⁷ Ni se yóm salà yó kem ngà Ili logi alì sidek bè solu Dwata abay se là kô dog nadat le du yóm dsù le ebè Dwata.

¹⁸ Okóm ke Samwél kun, tolo ngà he bede du se tóbóng lówó Dwata. Leseken yóm nes ifod gel lesek yóm tau blóng ebè Dwata.Yóm nes tahà gel leseken, tódô ket halay yéen mò du béléen ne nwiten ebéléen bè yóm gel kmungen ke yehenen demsù ebè Dwata.

¹⁹ Yóm nes tahà gel leseken, tódô ket halay yéen mò du béléen ne nwiten ebéléen bè yóm gel kmungen ke yehenen demsù ebè Dwata.

²⁰ Gu laan le là deng mulék le Ilkana lewu le tuha libunen ebè benwu le, na hni Ili lu bè Dwata ne monen mò kul, “Dwata he bud bemlay kuy ngà mlan bè nim libun ni mò tles nim ngà deng blayen ebè Dwata.” Omin le yó mulék.

²¹ Tahu se, tey któbóng Dwata ke Hana bud wen ngà blayen du, tlu logi ne lewu libun. Okóm ke Samwél, tódô lenoken bè solu Dwata.

²² Okóm ke Ili kun, deng tey tuha ne, ne deng gel gungolen yóm kdê nmò yó kem ngaen logi bè yó kem tau Israél. Deng tngónen snéen yóm kekleyek le yó kem libun mò nmò bè bak dól yóm Gónô Dwata.

²³ Yó monen mò kul, “Deng gel gungolu bè yó kem tau Israél yóm sidek nmò ye. Moen ke nmò ye ni kem sidek ni?

²⁴ Tenflok ye mò du ni kem ni, kem ngà. Tey sidek yóm udél gel gungolu sensból yó kem tau Dwata.

²⁵ Yóm sotu tau ke gemsalà bè dumun tau, gbek Dwata fen kmukum du. Okóm yóm tau ke gemsalà bè Dwata, tau du se kmukum du?” Okóm yó kem ngà Ili logi, là kô hnungol le ke mà le abay se deng eles hendem Dwata ne yóm khatayen kul.

²⁶ Okóm ke Samwél kun, sónmoen minut lemnok. Ne lemwót bè yóm hyu gel nmoen tey hyu nawa Dwata ebéléen dalang se yó kem dumu tau.

Yóm eles hetgama Dwata yó kem fes lówó Ili

²⁷ Sotu kdaw, wen tau Dwata sut bè Ili ne tulónen du yóm udél Dwata ebéléen, monen, “Bè yóm tehe keghesek yóm fuem Aron bè yóm tau hol geta bè Idyip, dalang se yó kem fes lówóhen, tehehe hegfan bélê le.

²⁸ Bè kdê yó kem tbong Israél, kun fes lówó yóm fuem yó yóm néléku mò demsù ebéléu bè yóm dou gónô demsù, mò mtem ebéléu insinsu ne mò lemsek nes ifod bè soluhu. Ne benlayu lu kwalis ma yóm kul ólól bè yóm gel dsù le ebéléu yó kem tau Israél, yóm dsù gel hlan le bè ofi.

²⁹ Na, moen se ni du ke deng mom sen-glom ye yó kem dsù le ebéléu yó kem tau, dalang se yó kem tódô gel blay le ebéléu, yóm deng hmou kul? Moen du, Ili, ke bong nadatem yó kem ngaem mkay sentahu? Lel ye deng mabù bè yó kem utón mgélék deng nwa le bè ket dsù le ebéléu yó kem dou tau.

³⁰ Yó gónóm mon, ni se udél Dwata yóm Dwata yó kem tau Israél, monen, ‘Deng tehe fasadu kóm, laen dù sónen yóm keseblóng le tau ebéléu yó kem fes lówóhem kkólen bè yó kem angat lugodem.’ Okóm ni, là ne. Olohu madat yó kem tau madat do ne kóhu yó kem tau kembê do.

³¹ Nmou són le yó kem fes lówóhem anì là bud le tau blóng ebéléu. Tódô kdê yó kem logi lomi lemnok bè fes lówóhem angat le gotu tódô matay bè yóm hanà klomi le tau ne laen dù bélê le kól tuha.

³² Angat tey sidek kegnómem du yóm igoem mton yóm angat tey kehyu klowil blayu yó kem tau Israél. Okóm laen dù logi bè yó kem fes lówóhem angat tahà ktauhen.

³³ Bede wen sotu hlowilu bè fes lówóhem mò blóng tau ebéléu, bede senflósen mkik ne langag bè yóm klawihen mowil. Bong yó kem dumu fes lówóhem angat le matay bè sudeng.

³⁴ Ne ni se ilóem du ktahu yóm monu, sotu kdaw angat le segeng matay yóm lewu kem ngaem logi Hufni ne Finihas.

³⁵ Angat wen sotu tau néléku mò blóng tau ebéléu, tau teneb béléu ne nimónen yóm kdê hlolou du. Angat hwenu yó kem sfuhen ne bè kun fes lówó gónón lemwót yó kem tau blóngu ebè yó kem tau hol geta deng néléku. Yóm keseblóng le yó laen kô dù sónen.

³⁶ Ominen yó kem dù lugodem tebel angat le mtud bukol béléen, lel le mni filak béléen duhen ke ken, mon le, ‘Benlayem o nmò mung bè yó kem tau demsù anì wen kenu.’ ”