1 Samwél 19 - Udél Dwata: Gna Kesfasad ne Lomi Kesfasad

Tô khatay Sol ke Dabid

¹ Yó udél Sol ebè Junatan ne ebè yó kem tóbóng lówóhen, monen, “Hol hnatay ye Dabid.” Okóm ke Junatan kun, lemwót bè yóm ktilob keswè le Dabid,

² yó gónón tmulón du ke Dabid yóm atul maen, monen mò du, “Tô nalu hnatay mà uu. Haya hlafus mebeli gónóm e hebnos ditu lem bnes bè yóm gónón laen dù tau mton kóm.

³ Lemwót do, nwitu mà bè yóm gónóm seblà nô ne tulónu ke mà yóm gbak béléem. Ominu bud tmulón du kóm yóm udélen etahem.”

⁴ Hlafus hayahen bè yó, tey dê hyu tulón Junatan ke maen gbak bè Dabid, monen mò du, “Yake béen wen sidek nmoem bè yóm tóbóng lówóhem Dabid abay se laen dù sidek nmoen béléem se kun. Deng tey dê gónón tmóbóng kóm hono bè kóm kehyu.

⁵ Deng hamaen klowilen bè yóm khatayen ke Gulayat yóm tau Flistin alì bong, ne yó se buten gónó Dwata hegmò kul yó kem tau Israél. Deng tonem se yó ne tey kehligalem. Moen se ke tô hnatayem yóm tau laen dù salaen béléem? Ne laen kô dù lasunem hmatay du.”

⁶ Ne tahu se, hnungol Sol yóm udél Junatan ebéléen ne smafà, monen, “Hlanu bè boluy yóm Dwata là matayen, là kô hnatayu ke Dabid.”

⁷ Kogolen bè yó, tnaba Junatan Dabid ne gotu tulónen du yóm sentulón le maen. Ominen mit ke Dabid ebè Sol ne bud nô bè yó Dabid bè gónô Sol lómón yóm gnan.

⁸ Là legenen bè yó bud le sgida kem tau Israél yó kem Flistin. Nalak Dabid yó kem sendaluen bè yóm kesfatay le yó. Ya tey kwit Dabid kul sfatay yó kem Flistin ne tódô le gotu mlóy.

⁹ Okóm sotu kdaw yóm igò Sol tolo myón bè gónóen wen buyus nogoten, ne bud kól béléen yóm tulus sidek hwit Dwata. Ne nô bè yó Dabid, tolo nunihen bè Sol yóm kun gel kenbit.

¹⁰ Bud ndek Sol buyus Dabid, okóm semya Dabid ne mteg bè beng yóm buyus yó. Ne tódô mlóy Dabid bè yóm kifu yó.

Kehewà Mikal ke Dabid

¹¹ Bè yóm kifu yó, wen kem tau dók Sol ebè gónô Dabid mò mentey du anì tô hnatay le bè yóm kehlafusen bè yó. Okóm yó nmò Mikal yóm yehenen nseben Dabid, monen mò du, “Ke là mlóyi kifu ni, hlafus haya matayi.”

¹² Duhen yó, wen hloyol Mikal bè tembó beng mò lan Dabid kmolos anì glóy.

¹³ Omin Mikal ma yóm dwata lennged ne heflililen bè gónó le tungô, nmoen kumuen ne wen kama bul kambing suen bè kuluhen ne ominen lemimun du.

¹⁴ Tikóng le kól bè yó, yó kem tau tô hekfô Sol ke Dabid, yó mon Mikal mò kul, “Wen desen.”

¹⁵ Timbow tulón le ke Sol yó bud mon Sol mò kul, “Nwit ye edini, mung du gónón tungô anì hnatayu.”

¹⁶ Tikóng le husek elem gónô Dabid yó kem tau dók Sol yó, són ton le hlilil yóm dwata lennged wen kama bul kambing bè kuluhen.

¹⁷ Yó mon Sol mò ke Mikal, “Moen ke snukatem o, kóem hlóyem yóm hohonu?” Bnalà Mikal se, monen, “Yó monen mò do, ke là tnóbóngu du hnatayen o kun.”

¹⁸ Okóm ke Dabid, deng sana hlayuk mógów ebè Rama nan e ston ke Samwél ne gotu tulónen ke Samwél yóm kdê deng nmò Sol béléen. Omin Samwél mit du ebè Nayut, ne bè yó gónó le nô.

¹⁹ Tikóng tulón le ke Sol yóm knô Dabid bè Nayut yóm benwu snakuf Rama,bud wen kem sendalù dóken mò kemfô du. Okóm bè yóm kkól yó kem tau dók Sol yó, ton le Samwél ne yó kem dumuhen tugod Dwata tolo le tmugod udél Dwata. Yó nmò yóm Tulus Dwata bè yó kem tau dók Sol, gotu le bud gbót tmugod udél Dwata se kul.

²⁰ Bud wen kem sendalù dóken mò kemfô du. Okóm bè yóm kkól yó kem tau dók Sol yó, ton le Samwél ne yó kem dumuhen tugod Dwata tolo le tmugod udél Dwata. Yó nmò yóm Tulus Dwata bè yó kem tau dók Sol, gotu le bud gbót tmugod udél Dwata se kul.

²¹ Tikóng bud gefet bè Sol yóm deng nmò le yó, bud wen kem sendalù dóken bud senged snéen nmò le bè yóm kkól le bud le tmugod udél Dwata se kul. Efet tlu dulék Sol hógów sendalù, bud senged snéen nmò le.

²² Hol sónen tódô Sol mógów ebè Rama ne gdek bè yóm tey kokol bong bè Siku. Ominen smólók, monen, “Nô se kul du le Samwél lewu le Dabid?” Wen mon du mò du, “Nô le bè Nayut yóm benwu snakuf Rama.”

²³ Kewót Sol bè yó, mógów ebè Nayut. Yóm igoen nô bè lan, yó bud nmoen béléen yóm Tulus Dwata yóm igoen mógów, tódô bud tmugod udél Dwata se kun efet kól bè Nayut.

²⁴ Gotu kóhen nesen, sendawen ne suloyen buteng hlékê te tonok, tmugod udél Dwata bè yó bè solu Samwél. Yó gónó le mon du yó kem tau, “Sotu tugod Dwata kô kun yóm Sol?”