1 Samwél 18 - Udél Dwata: Gna Kesfasad ne Lomi Kesfasad

Kélés nawa Sol ke Dabid

¹ Timbow deng kestulón le Dabid Sol, omin le ston Junatan, yóm ngà Sol logi ne tódô le kendel sfulung yóm lewu le ne tey tilob keswè le.

² Nbuten bè yóm kdaw yó, sù Sol bè yó Dabid bè gónô bongen ne là bud hlusen du mulék ebè gónô maen.

³ Lemwót bè yóm tey kbong nawa Junatan ke Dabid, wen fasad mget nmoen duhen yóm klaen dù tul sónen yóm keswè le.

⁴ Tódô nlusen yóm nes lafin ta yóm nes leseken ne blayen ke Dabid, mung du oniten ne sudengen ne bohohen ne hileten.

⁵ Balù nô hógów Sol ke Dabid bè yóm kesgida le, sal gel gemmò Dabid. Yó gónó Sol mélék du mò kmandér bè yó kem sendaluen. Yóm hmò Sol ke Dabid yó, tey kehligal le du yó kem sendaluen kkólen bè yó kem dumu sendalù wen glal le.

⁶ Bè yóm sotu kulék le gu bè gida yó kem sendalù Israél bè yóm khatay le yó kem Flistin, senlong le Sol bè lan yó kem libun bè ket benwu bè Israél, ya tey kehligal le semngal lel le madal, nuni le yóm tamburin ne yó kem dumu gel nuni le.

⁷ Yóm igò le madal yó sngal le, “Bè libuhen kun hnatay Sol, fen bè sfolò libuhen kun hnatay Dabid.”

⁸ Ya tey sidek kebut Sol, monen, “Moen ni du? Hfun le ke Dabid sfolò libu ne tek bè libuhen dou. Angat du nmò le tau hol geta kedeng.”

⁹ Nbuten bè yó ne yóm tendo kélés nawa Sol ke Dabid.

¹⁰ Hayahen bè yó, wen tulus sidek hwit Dwata mò malak ke Sol ne tendo hesbewegen kudél Sol lem gónóen lómón yóm tau lengel matahen. Yó nmò Dabid hunihen béléen yóm gel kenbiten lómón yóm sana kun gel nmò.

¹¹ Okóm bè yóm kdaw yó, wen buyus nogot Sol. Yó nmò Sol deken ke Dabid yóm buyusen, yó hendemen, “Anì mtool ebè beng Dabid.” Okóm semya Dabid ne mlóy. Sotu kdaw bud tô dek Sol ke Dabid yóm buyusen, okóm bud semya.

¹² Ya tey sidek klikò Sol ke Dabid abay se tngónen yóm deng ktagak Dwata du ne tngónen snéen yóm deng knô Dwata bè Dabid.

¹³ Duhen yó, là buden móyô Sol ke bud nô bè yó Dabid, yó gónón mò du kmandér bè yó kem lemibu sendalù. Tahu se, Dabid yóm fen malak kul bè yóm gel kesgida le.

¹⁴ Bè yóm ket nmò Dabid hono hyu abay se nô béléen Dwata.

¹⁵ Tikóng dilô Sol nim ni mom bud temnù he klikoen ke Dabid.

¹⁶ Okóm kdê yó kem tau bè Israél ne bè Juda, tey kbong nawa le ke Dabid abay se tey hulung malak yó kem sendalù bè gida.

Kehyehen Sol du ke Dabid yóm ngaen libun

¹⁷ Sotu kdaw, yó mon Sol mò ke Dabid, “Ni se ngau twogu libun boluyen Mirab mò yehenem. Okóm hol béi hlikò bè yóm kehwitu kóm ebè gida ne holi hlóbô mit kut sfatay bè yó kem kun kesgida Dwata.” Abay se yó hendem Sol, “Kem Flistin he fen hmatay du, là hyuhen ke ou.”

¹⁸ Yó balà Dabid ke Sol, monen, “Tmau do de ne tedu de hol kmò yó kem dou fes lówó bè Israél ke tô towu yóm tau hol geta?”

¹⁹ Okóm bè yóm kdaw tô kesyehen le Dabid Mirab, deng mom sana hyehen Sol ke Adriyél yóm tau lemwót bè Mihula.

²⁰ Wen sotu ngà Sol libun boluyen Mikal, tey óyóen ke Dabid. Ne bè yóm ktulón le du ke Sol nim ni tey kehyu nawan.

²¹ Yó hendemen, “Ni yóm sotu lan hmolot ke Dabid anì hnatay yó kem Flistin.” Okóm yó udélen ebè Dabid, monen, “Bud wen se kmò klanen anì gtowuhu uu.”

²² Omin Sol mdók yó kem tóbóng lówóhen anì lifut tulón le ke Dabid, mon le, “Tey kóyóen kóm yóm tau hol geta, bud senged se kum. Yake henmóyóem ne yóm ktowuhen kóm.”

²³ Tahu se, tikóng tulón yó kem tóbóng lówó Sol ke Dabid nim ni, yó balà Dabid kul, monen, “Là kô gbeku du smunggud ke Sol. Tauhe élél se do ne tau laen dù boluyen.”

²⁴ Tikóng bud tulón le ke Sol yóm udél Dabid yó

²⁵ yó bud monen mò kul, “Tulón ye ke Dabid là kóe mni béléen sunggud, olon lematu kulit tukô botò tau Flistin mò gónóhu gembeles bélê le yó kem hohonu.” Okóm yó hol nô bè nawa Sol anì hnatay le Dabid yó kem Flistin.

²⁶ Tikóng tulón yó kem tau tóbóng lówó Sol ke Dabid nim ni, tey kehyu nawa Dabid yóm angat kbalingen towu yóm tau hol geta. Gu laanen là deng hto yóm mò ken bè lówóhen,

²⁷ lemwót Dabid nalaken yó kem tauhen na le e hmatay lewu latu Flistin ne nwit le ebè Sol yóm kulit tukô botò le. Omin Sol hyehen du ke Dabid yóm ngaen libun Mikal.

²⁸ Timbow dilô Sol yóm alì knô Dwata bè Dabid ne yóm tey kbong nawa Mikal du,

²⁹ mom bud temnù klikoen ke Dabid ne baling hohonen efet kól bè sónen.

³⁰ Bè yóm gel kuluk yó kem sendalù Flistin, tey wen gendeng Dabid senta yó kem dumu sendalù genlal Sol. Duhen yó, tey tótól bè klamangen yóm kun boluy Dabid.