1 Samwél 17 - Udél Dwata: Gna Kesfasad ne Lomi Kesfasad

Kbót Gulayat kul sfatay yó kem tau Israél

¹ Yó nmò yó kem Flistin, gotu sentifun le yó kem sendalù le anì na le e mundug sfatay yó kem tau Israél. Sentifun le lu bè Suku yóm benwu udì glem lem Juda. Kmamfù le bè gónón sóól Suku yóm benwu Asika yóm benwu glem lem Ifis-damin.

² Lemwót kul le Sol mung du yó kem sendalù Israél, fen le kmamfù bè Datal Ila ne deng le eles htigel mit sfatay bè yó kem Flistin.

³ Deng le tódô ston ta yó kem tau Flistin yó kem tau Israél ne sket kul mdà bè doli bulul tek són datal blóng le.

⁴ Ominen hewà bè kamfù yó kem Flistin yóm sotu tau alì hulung sfatay boluyen Gulayat lemwót bè Gat. Tey tau tahà, udì duen gónón là gefet bè tlu mitru kegetahen eta.

⁵ Yóm sloungen, nmò le gu bè tembaga futì ne bud tembaga futì se onit bè lówóhen, yó keblat le botong limu folò hitu kilu keblaten.

⁶ Ne wen onit tembaga nô bè tihen, ominen bud wen buyus ukol nmò le bè tembaga téwéngen te kwangen.

⁷ Yóm dol buyusen, lómón keblaten ne kbongen yóm blilu newel bede tahà. Yóm olo tukóen bala tók wen dô hitu kilu keblaten. Ne tukô gna du yóm sotu sendalù fen mit yóm klungen.

⁸ Omin Gulayat mdà bè yó ne mensag ebè yó kem tau Israél, monen, “Tedum tlek nmò ye mdà bè yó kem sendalù Israél? Tek sotuhu se do Flistin, fen ye dê kuy kem hesek Sol. Mélék ye sotu kun mò blau.

⁹ Ke gbeken hmatay do, baling me ghesek bélê ye. Okóm ke ou gemhatay du, yu mò baling hesek me.

¹⁰ Ó kem sendalù Israél nbótu yu kemdaw ni. Mebel ye do mò blau.”

¹¹ Tikóng gungol Sol ne yó kem tau Israél yóm udél yóm tau Flistin yó, ya tey sidek klikò le.

Kdók Jisi ke Dabid ebè kamfù Sol

¹² Yóm Dabid ngà Jisi. Yóm Jisi sotu tau semfu gu bè yóm tehe Ifraim ne nô bè Bitlihim yóm benwu glem lem Juda. Wen wolu ngaen logi ne bè yóm kogot Sol bè Israél deng tey tuha ne kun ke Jisi.

¹³ Lemwót yóm tlu kem ngaen twogu deng le mung ke Sol ebè gida. Yó boluy le, Ilyab yóm twogu bélê le ne Aminadab yóm gewuhen ne Sama yóm getluhen.

¹⁴ Dabid yóm hol són imot bélê le. Deng le mung ke Sol ebè gida yóm tlu twoguhen.

¹⁵ Okóm ke Dabid bè yóm kmoen nmò bè Sol, ket kiwólen semfulék ebè Bitlihim semgyok yó kem ubiha maen.

¹⁶ Botong fat folò kdaw Gulayat tendo mbót kul sfatay yó kem tau Israél, keten hlafus ne keten kimel.

¹⁷ Sotu kdaw, yó mon Jisi mò ke Dabid, “Ó ngà, heslò etedem ditu bè kem twoguhem bè kamfù le nim sóól sakù knuhom ne sfolò botù mambang tahà nii.

¹⁸ Bud nwitem se nim sfolò botu tsis nii ebè yóm kmandér le ne hnénégem ke tedu kmò yó kem twoguhem ne yake wen sulat nwitem gu bélê le mò gónów temngón du ke laen dù hemen le.”

¹⁹ Yó kem twogu Dabid yó, deng le mung ke Sol ne bè yó kem sendalù Israél, kmamfù le ditu bè Datal Ila sfatay le bè yó kem tau Flistin.

²⁰ Tahu se, timbow hol hlafus hayahen bè yó tódô btik Dabid, tebelen bè yóm sotu tau mentey ubiha yó kem ubihahen ominen lemwót, nwiten yóm ken hwit maen du. Yóm kkólen bè kamfù, deng le lemwót ebè yóm gónó le sfatay yó kem sendalù ne gotu le mensag.

²¹ Omin le ssolu ne sbantak le sfatay yó kem sendalù Israél ne yó kem sendalù Flistin.

²² Yó nmò Dabid, tebelen bè yóm tau gel mogot ken yóm nwiten ne mlóy etu bè gónó le nô yó kem twoguhen nan e snólók yóm mò kmò le.

²³ Yóm igoen stulón kul hewà se Gulayat yóm tau alì hulung sfatay lemwót bè Gat, bud nbóten sfatay yó kem tau Israél lómón yóm tehe gna nmoen. Ne gungol Dabid.

²⁴ Bè yóm kton yó kem tau Israél ke Gulayat, tódô le gotu mlóy lemwót bè tey sidek klikò le.

²⁵ Ne yó mon yó kem sendalù Israél bè Dabid, “Tonem kô yóm tau alì tahà bong sut gu ditu yóó? Yóm tendo mbót tekuy sfatay. Deng wen fasad Sol, yóm tau gembek hmatay du angat wen tey ofol blayen du, lelen bud hyehen du du he yóm ngaen libun. Ne sotun, là kô hbayaden du bwis yóm maen ne yó kem fes lówóhen.”

²⁶ Omin Dabid mudél ebè yó kem tau mdà klohoken, monen mò kul, “Tedu se ofolen yóm tau gemhatay du yóm Flistin yóó ne ke kóhen bélê tekuy kem tau Israél yóm gónó tekuy myak nii? Tmau du se nim Flistin là hemtahu bè Dwata nii, tô nwiten sfatay yó kem sendalù yóm Dwata là matayen?”

²⁷ Ne bud tulón le ke Dabid yóm tehe tulón le du, mon le, “Tahu se yóm deng gungolem. Yó se angat ofol yóm tau gemhatay du.”

²⁸ Okóm gungol Ilyab yóm twogu Dabid, yóm kestulón Dabid bè yó kem tau yó ya tey sidek kebuten du, yó monen mò du, “Moen du ke nói bè ni? Tau du se hbenteyem yó kem ubiha là wen ditu bè yóm benwu laen hol wen tauhen? Tngónu se yóm tey kehegmónem ne yóm sidek gel nô lem hendemem. Yó nógówem olom temngel sfatay.”

²⁹ Bnalà Dabid se, monen, “Tedu deng nmou du? Olohu smólók néen.”

³⁰ Ominen kmogol yóm twoguhen ne bud beklil ebè yóm sotu tau ne bud senged snólóken béléen ne bud senged se balà le du.

³¹ Ominen wen tau tmulón du ke Sol yó kem udél Dabid ne yó gónó Sol htaba du.

Khatay Dabid ke Gulayat

³² Bè yóm kkól Dabid bè Sol, yó mon Dabid mò du, “Béem htafa nawam, ou mit du sfatay yóm tau yóó.”

³³ Ne yó balà Sol ke Dabid, monen, “Là kô gbekem mit du sfatay yóm Flistin yóó, yakà tolohi lomi tau. Ne yóm tau yó, sendalù deng hónô mung bè gida lemwót bè hanà klomihen tau.”

³⁴ Okóm yó udél Dabid ebè Sol, monen, “Yóm dou gel nmò, gel sen-gyoku ubiha mà ne ke wen liyun duhen ke bér tô kemfô kul

³⁵ sal gel ktesu, ominu mogul du ne bud nwahu gu lem baken yóm ubihahu. Ke tô nékéten ou tódô kenfóu bè blugalen, ngangu mogul du efet matay.

³⁶ Ni se deng nmou bè yó kem liyun ne bè yó kem bér ne ni se bud nmou bè yóm Flistin là temngón ke Dwata yóó, yakà deng nbóten kul sfatay yó kem kun sendalù yóm Dwata là matayen.

³⁷ Deng lenwà Dwata o lem knugu yó kem liyun ne dalang se bè yó kem bér ne bud lenwaen o snéen lem hólól yóm Flistin yóó.” Omin Sol mon du mò ke Dabid, “Yó ne, lemwóti. Dwata he mung kóm.”

³⁸ Omin Sol hesek du ke Dabid yóm kun gel lesek bè sgida. Wen yóm sloung tembaga futì suen bè kuluhen ne wen yóm onit tahà suen bè kfuhen.

³⁹ Tilów lesek Dabid ne lemumak sudeng tahà, ominen tô tilów mógów bede là gbeken du abay se là deng knalam leseken du. Yó monen mò ke Sol, “Là gbeku mit du ebè gida nim ni, là deng knalamu du.” Ne gotu nlusen.

⁴⁰ Ominen lemwót, nwiten yóm tugeden gel semgyok ubiha. Kól bè yóm él mlel, tódô mulut limu botu mló ne suen lem yóm sning kulit gel nwiten ne kulóngen yóm hasuten, ominen mifal etu bè Gulayat.

⁴¹ Omin Gulayat semlong ke Dabid, tukô gna du yóm tau gel mit klungen.

⁴² Timbow gtukul ton Gulayat Dabid, ya tey kehnéen du abay se hanà lomi tau ne tey logi knóón, lelen tilob klówóhen.

⁴³ Ne yó udélen ebè Dabid, monen, “Ohuhe kô ke miti edini tuged?” Ominen hemmulà ke Dabid hlanen bè boluy yó kem kun dwata.

⁴⁴ Yó bud udélen htê ebè Dabid, monen, “Yó mógówi edini sen anì hkenu bè yó kem onuk koyu ne bè yó kem ógóf lóbô lem bnes ungedem.”

⁴⁵ Yó balà Dabid du se kun, bede bud htê, monen, “Bè yóm kwitem do sfatay, wen sudengem ne wen kem buyusem. Okóm dou, nwitu u sfatay mlan bè boluy yóm Dwata laen dù là gbeken du, yóm Dwata yó kem sendalù yó kem tau Israél, yóm deng hnangkag nbótem sfatay.

⁴⁶ Kemdaw ni, blay Dwata uu elem hólólu ne hnatayu uu, kenlengu kuluhem. Ominu bemlay du bè yó kem onuk koyu ne bè yó kem ógóf lóbô lem bnes yóm lówóhem, dalang se lówó yó kem dumu sendalù Flistin mung béléem matay. Bè ni gónó le temngón du yóm kdéen tau bè klamangen benwu wen Dwata yó kem tau Israél.

⁴⁷ Ne gotu tngón le snéen là mlanen bè sudeng ne là mlanen bè buyus yóm kehewà Dwata yó kem tauhen. Bè yóm kesfatay me ni, Dwata mit du ne gotu blayen yu elem hólól me.”

⁴⁸ Tikóng hloni ebè Dabid Gulayat anì nan e tô hnatay, tódô kendel senlong Dabid.

⁴⁹ Nwahen yóm botu nô lem sningen ne balahen yóm hasuten, ominen hmowik du ebè Gulayat bè blóng uyóhen ne tódô gebeng. Tódô gdouf bè tonok Gulayat.

⁵⁰ Duhen yó, gemmò Dabid bè yóm Flistin yó mlan bè olo botu hasut, hnatayen baluen ke laen dù sudengen.

⁵¹ Omin Dabid mlóy ebè Gulayat, lekadang tahen ne tódô diloten sudeng Gulayat ne klengen kuluhen. Tikóng ton yó kem Flistin yóm deng katay yóm tau alì hulung mit sfatay bélê le, botong le tódô gotu mlóy.

⁵² Omin le gotu mensag yó kem sendalù Israél ne sendalù Juda ktes le yó kem Flistin. Ngang le kemtes kul efet kól bè Gat ne efet kól etu bè bak tikeb yóm benwu Ikrun. Tódô hgasà lemolò lan lówó kem Flistin matay ne kem Flistin hnalì lemwót bè Saraim efet kól bè Gat ne bè Ikrun.

⁵³ Omin le tódô bud beklil semfulék yó kem sendalù Israél, ne gotu negef le yó kem tebel bè kamfù yó kem Flistin.

⁵⁴ (Nwit Dabid kulu Gulayat ebè Jirusalim. Lemwót yó kem ngomen sfatay, henyuhen lem kamfuen.)

⁵⁵ Bè yóm kewót Dabid mit sfatay ke Gulayat snólók Sol Abnér yóm kmandér bè yó kem sendaluen, “Ó Abnér, tau du maen yóm logi yóó?” Bnalà Abnér se, monen, “Là kô tngónu du, Sér.”

⁵⁶ Mon Sol se mò du, “Yake snólókem ke tau du maen.”

⁵⁷ Timbow mulék ebè kamfù Dabid kogol yóm deng khatayen ke Gulayat, omin Abnér mit du ebè Sol igò Dabid kmulóng kulu Gulayat.

⁵⁸ Ne yó snólók Sol béléen, “Tau du de maem, Tò?” Bnalà Dabid se, monen, “Yó mau, Jisi, sotu tóbóng lówóhem lemwót bè Bitlihim.”