1 Samwél 16 - Udél Dwata: Gna Kesfasad ne Lomi Kesfasad

Ketwél Samwél ke Dabid hnolo mò ilô yóm kbalingen tau hol geta bè Israél

¹ Yó udél Dwata ebè Samwél, monen, “Geblaen yó ne yóm klangagem ke Sol. Deng kóhu yóm kegetahen bè Israél. Okóm ni, nlemem hnolo ulib yóm hanga ógóf, mógówi etu bè Bitlihim bè yóm tau boluyen Jisi menwu bè yó. Yakà deng wen sotu néléku bè yó kem ngaen mò angat tau hol geta bè benwu ye.”

² Okóm yó mon Samwél, “Tedu de mò kmou du? Ke angat gungol Sol, déke tódô hnatayen o.” Ne yó balà Dwata du, monen, “Miti sotu safì libun ebè Bitlihim, yóm là dengen mngà ne tulónem yó kem tau bè yó, monem, ‘Mógówe edini naw e demsù ebè Dwata.’

³ Tinokem Jisi bè yóm kedsuem, toloku kóm he yóm angat nmoem. Tenwélem do hnolo yóm tau toloku kóm.”

⁴ Tahu se, nimón Samwél yóm hlolò Dwata du yó. Bè yóm kkólen bè Bitlihim, senlong yó kem tmuha malak bè yó bede tey sidek klikò le. Snólók le, “Laen dù sidek du kô yóm kógówem ni?”

⁵ Bnalà Samwél se lu, monen, “Laen dù sidek du. Yó nógówu naw e demsù ebè Dwata, hfólós ye knô ye anì mung ye do demsù.” Omin Samwél stulón ke Jisi anì hfólósen knóen dalang se yó kem ngaen anì mung le du bè yóm kedsuen.

⁶ Bè yóm kkól le bè gónô demsù ton Samwél Ilyab yóm ngà Jisi twogu, yó mon nawan, “Deng duhen ni yóm tau mdà bè ni yóm nélék Dwata mò tau hol geta.”

⁷ Okóm yó mon Dwata mò ke Samwél, “Béem tenngel yó dum keklóónen logi ne yóm ktahaen, sundu du yóm néléku. Yóm dou kélék là mkélen bè kélék tau. Yóm tau, són olo tonen yóm gfan ta, okóm yóm dou tenngel yóm nô lem nawahen.”

⁸ Omin Jisi tmaba yóm sotu ngaen boluyen Aminadab ne nwiten ebè solu Samwél. Okóm yó mon Samwél mò du, “Là. Sundu du yóm deng nélék Dwata.”

⁹ Omin Jisi bud mit ke Sama bè solu Samwél, okóm yó mon Samwél, “Là. Sundu du snéen yóm deng nélék Dwata.”

¹⁰ Bud senged snéen nmò Jisi, efet gotu nwiten ebè Samwél yó kem hitu ngaen logi. Ne yó mon Samwél, “Laen dù bélê le deng nélék Dwata.”

¹¹ Omin Samwél smólók ke Jisi, “Tek sónen ni ne kô yó kem ngaem logi?” Bnalà Jisi se, monen, “Wen he duen yóm hol són imot bélê le, okóm tolo hótób kem ubiha.” Mon Samwél se mò ke Jisi, “Yake hangayem, là tagad tekuy mken ke là dengen kól bè ni.”

¹² Tahu se, hangay Jisi. Yóm ngà logi ni, tey knóón lelen tilob klówóhen ne ligal lem uyóhen. Ne yó mon Dwata mò ke Samwél, “Du se yóm deng néléku, tenwélem hnolo ta kuluhen.”

¹³ Tahu se, nwa Samwél yóm hnolo ulib nwiten ne twélen ta kulu Dabid yóm igoen mdà lem blóng yó kem dumuhen setwoli. Ne lenwóten bè yóm kdaw yó, tey kalak Tulus Dwata ke Dabid efet kól bè katayen. Kewót Samwél bè yó mulék ebè Rama yóm hol kun benwu.

Kmò Dabid nmò bè Sol

¹⁴ Lenwóten bè yó ne, tnagaken Sol yóm Tulus Dwata ne wen tulus sidek hwit Dwata ebéléen mò tendo sembeweg du.

¹⁵ Ne yó mon le mò du yó kem tau gel tóbóng lówóhen, “Ngem, deng senbewegen uu yóm tulus sidek lemwót bè Dwata.

¹⁶ Ke hyu béléem, mebel me béléem tau hulung huni du yóm gel kenbiten. Ke bud kól béléem yóm tulus sidek, gbek nim tau ni kembit du béléem anì bud mulék hyu kegnómem du.”

¹⁷ Tahu se, yó mon Sol mò kul, “Mebel ye do yóm tau alì hulung huni du yóm gel kenbiten nwit ye edini béléu.”

¹⁸ Ominen sotu bè yó kem tóbóng lówóhen mon du, “Ditu bè Bitlihim, wen tau menwu ditu boluyen Jisi ne wen ngaen logi alì hulung huni du yóm gel kenbiten. Là olon du yó he là mahilen likò, hulung mit sfatay lelen hulung mudél. Tey knóón ngà logi ne tendo nô béléen Dwata.”

¹⁹ Duhen yó, wen kem tau dók Sol etu bè Jisi. Yó udél hwiten kul, monen, “Hwitem do edini yóm ngaem logi gel mentey ubiha boluyen Dabid.”

²⁰ Tahu se, hwit Jisi Dabid ebè Sol. Wen ngà kambing hwiten du mung bè yóm kudà asnu lemulón ken ne wen sning kulit hnok tifas grép hwiten ebè Sol.

²¹ Tikóng kól bè Sol Dabid, tódô hlós mò nmò béléen bè yó. Tey kbong nawa Sol du ne nmoen mò mit klung béléen ebè gida.

²² Omin Sol hemwit udél ebè Jisi, monen, “Suem dini ne béléu Dabid abay se hligale du yóm gel nmoen.”

²³ Lenwóten bè yó, ke bud kól bè Sol yóm tulus sidek hwit Dwata, gel nwa Dabid yóm gel kenbiten ne nunihen bè Sol. Ominen tmagak ke Sol yóm tulus sidek ne bud mulék hyu kegnómen du.