1 Samwél 15 - Udél Dwata: Gna Kesfasad ne Lomi Kesfasad

Keglà Sol yó kem tau Amalikayt

¹ Sotu kdaw, yó mon Samwél mò ke Sol, “Tehe hógów Dwata o anì tenwélu u hnolo, uu mò tau hol geta bè yó kem tauhen Israél. Duhen ni, hol hnungolem yóm udél lemwót gu bè Dwata.

² Ni se udél lemwót bè yóm Dwata laen dù là gbeken du, monen, ‘Tnafaku ne yó kem tau Amalikayt lemwót bè yóm deng tehe kesfatay le bè yó kem tau Israél bè yóm tehe kewót le gu bè Idyip.

³ Duhen ni, nundug ye lu yó kem tau Amalikayt yó, gotu genlà ye yóm kdê nfun le, béen wen tebel ye. Gotu hnatay ye lu yó kem logi ne kem libun, dalang se kem ngà ne kem ngà hanà hulô, kkólen bè kem safì ne ubiha ne kamél ne kudà asnu le.’ ”

⁴ Tahu se, gotu sentifun Sol yóm kdê sendaluen bè Tilaim. Wen lewu latu libuhen yó kem sendalù lemwót bè Israél ne sfolò libu sendalù lemwót bè Juda.

⁵ Kewót Sol bè yó hlós ebè syudad Amalikayt ne na le na hmékét bè yó bè sbong.

⁶ Wen udél hwit Sol ebè yó kem tau Kinayt, monen, “Hlayuk ye lem blóng yó kem tau Amalikayt, déke gomong ye matay bélê le. Abay se bè yóm tehe kewót le gu bè Idyip yó kem tau Israél, tey tilob kmò ye ebélê le.” Tahu se, gotu le mdó yó kem tau Kinayt.

⁷ Gotu hnatay Sol yó kem tau Amalikayt lemwót bè yó bè benwu Habila efet kól etu bè Sur yóm benwu fi dmata kdaw Idyip.

⁸ Kenfóen Agag yóm tau hol geta bélê le bede là hnatayen du. Okóm gotu hnatay le lu sudeng yóm kdéen tau.

⁹ Okóm fen hlowil Sol ne yó kem sendaluen Agag, dalang se yó kem hyu bè yó kem ubiha ne safì ne yóm ngà safì mabù ne ngà ubiha alì mabù, yóm kdê hyu klówóhen. Són olo hnatay le són yóm wen óngóhen.

Kkogol Dwata ke Sol

¹⁰ Ominen wen udél Dwata ebè Samwél, monen,

¹¹ “Tey kegselu yóm kmou ke Sol tau hol geta bélê ye. Deng knogolen o ne là bud nimónen du yó kem hlolou du.” Tey sidek kegnóm Samwél du ne tódô suloyen buteng hkodu mni bè Dwata.

¹² Tikóng hlafus hayahen bè yó, tódô temkifu btik Samwél nebelen Sol. Okóm wen mon du mò du, “Deng mógów ebè Karmél Sol nan e hemdà bè yó yóm botu tahà mò gónó le madat du, ominen hlós ebè Gilgal.”

¹³ Omin Samwél kemtes ke Sol, ne yó mon Sol mò du, “Dwata he muyag kóm. Deng nmou yó kem hlolò Dwata do.”

¹⁴ Okóm yó mon Samwél mò du, “Moen se ke wen udél ubiha ne udél safì gungolu?”

¹⁵ Bnalà Sol, monen, “Nwa le lu gu bè yó kem tau Amalikayt. Gotu nwa le yóm ubiha mabù ne safì mabù mò dsù le lu ebè yóm sana kóm Dwata hol gónó mogot. Okóm yó kem dumu hnatay me lu.”

¹⁶ Mon Samwél se mò ke Sol, “Botongen yó ne udélem. Hnungolem yóm udél Dwata ebéléu ebuteng.” “Boluyen de?” mon Sol.

¹⁷ Ne yó mon Samwél mò du, “Balù yóm tehe kmonem du olohi tau leneken, okóm sana kélék Dwata kóm mò tau hol geta bè yó kem tau Israél. Dwata tehe mélék kóm ne wen hnolo hetwélen te kuluhem.

¹⁸ Ne deng wen hmò Dwata kóm, monen mò kóm, ‘Lemwóti nam e gotu genlà lu yó kem tau Amalikayt tendo gel mò sidek, efet deng gotu hnatayem yó kem kdê le.’

¹⁹ Na, moen se ni du ke là nimónem ke Dwata? Moen du ke alì heslò negef ye yóm kul nfun ne deng mom nmò ye yóm là hmò Dwata du kuy?”

²⁰ Yó udél Sol ebè Samwél, monen, “Deng nimónu Dwata ne deng nmou yóm hmoen do. Deng negefu Agag yóm tau hol geta bè yó kem tau Amalikayt ne deng sulék genlau yó kem tau Amalikayt.

²¹ Okóm yó kem sendaluu, wen ubiha ne safì nwa le, yóm alì hyu bè kdê yó kem ógóf ne nwit le edini bè Gilgal mò dsù le ebè yóm sana kóm Dwata hol gónó mogot.”

²² Ne yó balà Samwél du, monen, “Mahi du du yóm gónó Dwata hligal, yóm dsù hkekeb te ne yóm dumu dsù te kô, duhen ke bè yóm kimón te du? Kaem kimón ke Dwata yóm bong muhen senta yóm dsù hkekeb. Kaem yóm khungol te du, bong muhen senta yóm ubiha mabù dsù te ebéléen.

²³ Yóm smonol ke Dwata hol lómón ksideken yóm gel nmò yóm tau mton bù. Ne yóm keheklabak hol lómón ksideken yóm tau tmaba ebè dwata kéng. Duhen yó, lemwót bè yóm deng kekbéem yóm hmò Dwata kóm, gónó Dwata kembê kóm mò tau hol geta.”

Kni Sol seflifót

²⁴ Ne yó udél Sol ebè Samwél, monen, “Denge gemsalà bè Dwata. Là nimónu du yóm hmoen do ne dalang se yóm hloloem do abay se likoe bè yó kem sendalù, tódô lolou yóm kul kóyô.

²⁵ Okóm ni hkoduhe béléem, hnifótem yóm salau ne mungi do tmaba ebè Dwata.”

²⁶ Bnalà Samwél Sol, monen, “Là munge kóm. Lemwót bè yóm deng kekbéem yóm hmò Dwata kóm, deng kenbê Dwata uu snéen mò tau hol geta bè Israél.”

²⁷ Timbow beklil lemwót Samwél, tô nafas Sol bè tukô nesen ne ksê.

²⁸ Ne yó mon Samwél mò du, “Lómón ni se deng nmò Dwata béléem. Nim kdaw ni deng kensê Dwata béléem yóm kgetahem bè benwu Israél, blayen bè yóm tau hyu sentahem.

²⁹ Hol knóón yóm kul Dwata yó kem tau Israél, là kóen mò kéng ne là gel tenlesen du hendemen abay se là mkélen bè tau tonok, gel megetles kehedemen.”

³⁰ Bnalà Sol, monen, “Denge gemsalà. Okóm yake htonem yóm kadatem do bè solu yó kem tmuha gel malak ne bè solu yó kem tau Israél. Mungi do mulék anì bud te tmaba ebè yóm sana kóm Dwata hol gónó mogot.”

³¹ Tahu se, mung du mulék Samwél ne tmaba ebè Dwata Sol.

Khatay Samwél ke Agag

³² Omin Samwél mon du, “Nwitem edini Agag yóm tau hol geta bè yó kem tau Amalikayt.” Tahu se, yóm kkól Agag bè yó balù udì ke wen klikoen, yó mon nawan, “Tahu là hnatay le do.”

³³ Okóm yó mon Samwél mò du, “Lemwót bè sudengem, deng tey dê libun laen dù bud ngà le logi. Ne ni, laen dù bud ngaen se kun yóm kóm yê.” Omin Samwél hmatay ke Agag bè yó bè solu Dwata bè Gilgal, tódô gotu heneken lówóhen.

³⁴ Kewót Samwél bè yó mulék ebè gónóen bè Rama ne fen mulék ebè gónóen bè Gibya ke Sol.

³⁵ Kewóten bè yó ne là kóen bud mógów ebè Sol Samwél efet katayen, okóm sana tendo klangag Samwél du. Tey keblat nawa Dwata bè yóm kmoen ke Sol tau hol geta bè Israél.