1 Samwél 14 - Udél Dwata: Gna Kesfasad ne Lomi Kesfasad

Kundug Junatan ebè kem tau Flistin

¹ Sotu kdaw bè yó, yó mon Junatan bè yóm logi lomi lemnok gel mit klungen, “Lemwót te ne mógów te etu bè kamfù kem Flistin.” Okóm là kô tulón Junatan du ke maen yóm tô nmoen yó.

² Uma kóm, yó gónó Sol kmamfù laan yóm koyu boluyen pumigrinit bè Migron, là mayuken bè Gibya yóm kun benwu. Wen dô nem latu kwen yó kem sendalù mung du.

³ Sotu bè yó kem tau mung ke Sol duhen Ahidya, tau gel blóng ebè Dwata leseken yóm nes bukay ukol boluyen ifod. Yóm Ahidya ngà Ahitub dumun setwoli Ikabud. Yóm Ahitub ngà Finihas témê Ili yóm tau tehe gel blóng ebè Dwata bè Silu. Laen dù bélê le temngón du yóm deng kewót Junatan.

⁴ Yó lan Junatan mógów ebè kamfù yó kem Flistin mlan gu lem blóng yóm lewu kem léhék lembang boluyen Busis ne Sini.

⁵ Yóm sotu léhék mdà fi bwak smolu ebè benwu Mikmas ne yóm sotuhen mdà fi leged smolu ebè Giba.

⁶ Yó udél Junatan ebè yóm tau mit klungen, monen mò du, “Géhéli, hnusek te kamfù yó kem Flistin là hemtahu bè Dwata yóó. Là tngónem du déke tnóbóngen tu Dwata. Ke tnóbóngen tu, laen kô dù hemseng du bè yóm kehegmoen kut baluen ke tek sónen tu.”

⁷ Ne yó balaen du yóm gel mit ngomen sfatay yó, monen, “Yó sen, kihu nóyô nmoem munge kóm.”

⁸ Omin Junatan mon du mò du, “Yó ne, mógów te etu anì ton le tu.

⁹ Ke yó mon le mò kut, ‘Mangat ye bè yó’ bê te abay hlós na te mangat.

¹⁰ Okóm ke mon le, ‘Hlós ye mneged edini’ omin te yó hlós, yakà yó du ilóen yóm deng keblay Dwata kul elem hólól te.”

¹¹ Tahu se, hegfan le bè yó kem sendalù Flistin. Tikóng ton le lu ya tey kehsag le, mon le, “Tenngel ye dé wen kem Hibru gu ditu, hesut le gu lem yó kem sól gónó le hebnos.”

¹² Omin le tmaba ebè Junatan ne ebè yóm tau mit klungen, mon le, “Mneged ye edini bélê me anì wen dnalang ye.” Ne yó mon Junatan bè yóm dumuhen, “Géhéli ne loloem o, deng blay Dwata lu elem hólól yó kem tau Israél.”

¹³ Omin Junatan kmadaw mneged ebélê le, huli du yóm tau gel mit klungen. Bè yóm kkól le bélê le, tódô gotu hnatay Junatan lu yó kem Flistin lewu le yóm dumuhen.

¹⁴ Wen lewu folò tau hnatay le bè yóm tanay kundug le yó ne wen dô gbut ketiya gónón bulét yóm lówó yó kem tau matay.

¹⁵ Ya tey sidek klangaf kesebwól yó kem kdê sendalù Flistin nô bè kamfù le ne yó kem sendalù nô bè lewà gomong yó kem sendalù deng eles mentey bè lan dalang se yó kem sendalù gel hundug le. Yó nmò Dwata, wen linol bong hwiten elem blóng le, ya tey sidek klikò yóm kdê sendalù Flistin.

¹⁶ Gotu ton yó kem sendalù Sol mentey bè Gibya yóm kun tonok tehe Bindyamin, yóm gotu keseklab le mlóy yó kem sendalù Flistin.

¹⁷ Omin Sol mdók yó kem sendalù mung du, monen, “Nsó ye lu yó kem sendalù tekuy, tenngel ye ke tau du yóm là nóen bè ni.” Tahu se, tikóng nsó le lu ne là ton le kul le Junatan lewu le yóm tau mit klungen.

¹⁸ Omin Sol tmaba ke Ahidya yóm tau gel blóng le ebè Dwata, monen mò du, “Nwitem edini yóm nes ifod.” Bè yóm kdaw yó, lesek Ahidya yóm nes ifod bè solu yó kem tau Israél.

¹⁹ Yóm igò Sol stulón yóm tau gel blóng le ebè Dwata yó, sónmoen temnù kesebwól le lemangat yó kem Flistin ditu bè kamfù le. Yó gónó Sol mon du mò ke Ahidya, “Dog smólók bè Dwata ne, lemwót tekuy.”

²⁰ Tahu se, kewót Sol bè yó mung du yóm nem latu kem sendaluen, hlós le etu bè gónó le sgida yó kem Flistin. Bè yóm kkól le ditu, ton le yó kem Flistin gotu le stibó honon lu, botong klangaf le.

²¹ Lemwót yó kem tau Hibru tehe gmung bè yó kem Flistin lel le deng nô bè kamfù le, gotu le bud beklil mung bè le Sol lewu le Junatan ne yó kem dumu tau Israél.

²² Bè yóm kungol le du se kul yó kem dumu sendalù Israél tolo hebnos lem yó kem bulul lemnek bè tonok Ifraim yóm deng gotu klóy yó kem Flistin, gotu le hesut se kul na le e mung bè yó kem tau Israél mit sfatay bè yó kem tau Flistin.

²³ Duhen yó, bè yóm kdaw yó lenwà Dwata yó kem tau Israél lem hólól yó kem Flistin. Ngang le mò du sfatay efet nius le benwu Bit-abén.

Yóm safà Sol

²⁴ Bè yóm kdaw kesgida le yó, gotu le lenmek yó kem tau Israél lemwót bè yóm alì kbitil le lan Sol deng smafà, monen, “Ke wen tau mken kemdaw ni gu laanu là deng gotu meles yó kem hohonu, hol matay yóm tau yó.” Yó gónóm mon, botong sendaw le là mken

²⁵ balù yóm klan le lem dlag gónó le mton du yóm tneb nuhag deng masà bè tonok.

²⁶ Balù kdù le du là kô nmò le du abay se likò le bè yóm deng safà Sol.

²⁷ Okóm kun ke Junatan, là gungolen du kun yóm udél maen ebè yó kem tau. Deng mom yó nmoen, duen lem tneb yóm ngà tuged nogoten ne kenen, ominen yó hyu kegnómen du.

²⁸ Okóm wen sotu tau mton du ne monen mò du, “Deng wen safà maem yó kem sendalù mung du, monen, ‘Ke wen tau mken kemdaw ni, hol matay.’ Yó se gónó le gotu lenmek yó kem tau lan le bitil.”

²⁹ Yó udél Junatan, monen, “Tey sidek nim nmò mà bélê tekuy ni. Ngem, deng hyu kegnómu du lanen deng wen tneb kenu.

³⁰ Milud he kehyuhen ke deng ken yó kem kut tau yóm ken deng negef le bè yó kem hohon tekuy kemdaw ni. Ke yó deng nmò le, temnù he kwenen kem Flistin deng hnatay tekuy.”

³¹ Bè yóm kdaw yó, là kô le gemmò yó kem Flistin. Ngang kem tau Israél kemtes hmatay kul lenwót le bè yó bè Mikmas efet kól etu bè Adyalon. Sónmoen temnù kemek yó kem tau Israél lemwót bè yóm tey sidek kbitil le.

³² Unin kifu, tódô sotu kun heslò ma yóm deng negef le bè yó kem hohon le, ma le ubiha ne ngà safì, omin le tódô kendel métê du ne ken le igoen tolo wen litóen.

³³ Ominen wen tau tmulón du ke Sol, monen, “Ngem, deng le bud gemsalà bè Dwata yó kem tau lan le mken yóm utón tolo nô du litóen.” Mon Sol se, “Tey salà bong yóm yó. Mebel ye botu bong hluy ye edini.”

³⁴ Ne bud mon Sol, “Mógów ye ebè yó kem tau ne mon ye mò kul, ‘Ket sotu mit edini safì duhen ke ubiha ne hnatayen bè ni mò kenen bede hol kóhen litóen. Bê ye abay hegsalà bè Dwata mlan bè kken ye yóm utón tolo nô du litóen.’ ” Tahu se, bè yóm kifu yó ket sotu kun mit safì, omin le hmatay du bè yó.

³⁵ Omin Sol hemdà gónó le demsù ebè Dwata bè yó. Yó se yóm tanay gónó le demsù hdaen.

³⁶ Omin Sol bud mon du mò kul, “Bud nundug tekuy lu yó kem Flistin kifu ni, hnatay tekuy lu efet hlafus ne hol béen abay wen sotu tebel tekuy bélê le.” Mon le se, “Nmoem sen yóm hyu béléem.” Okóm yó udél yóm tau gel blóng le ebè Dwata, monen, “Na tekuy smólók bè Dwata.”

³⁷ Tahu se, nahen smólók bè Dwata Sol, monen, “Nundug me lu kô yó kem Flistin? Angat blayem lu elem hólól yó kem tau Israél kô?” Okóm laen dù balà Dwata du bè yóm kdaw yó.

³⁸ Omin Sol tmaba yó kem genlal malak yó kem sendalù, monen mò kul, “Yu kem malak yó kem sendaluu, mógów ye edini. Hnebel tekuy ke salà du yóm deng gmò tekuy kemdaw ni.

³⁹ Safau hlanu bè boluy yóm Dwata là matayen yóm Dwata gel lemwà yó kem tau Israél, yóm tau gemsalà tódô hnatay kmò du. Baluen ke Junatan, yóm hol dou ngà.” Okóm balù sotu ke wen tau malà du.

⁴⁰ Omin Sol bud mon du bè yóm kdéen tau Israél, “Mdà ye bè yó ne fen me mdà tofi dini kum lewu me yóm ngau Junatan.” Ne yó balà le ke Sol yó kem tau, mon le, “Tódô nmoem yóm hyu béléem.”

⁴¹ Omin Sol mni bè Dwata, monen, “Ó Dwata yóm Dwata yó kem tau Israél, hol hegfanem bélê me ke tau du yóm gemsalà bélê me. Wen kô salà tonem bélê me lewu me Junatan duhen ke bè yó kem dumu tau nô bè ni?” Ne bè yóm kmò le yóm atù, Sol lewu le Junatan yóm gemsalà, sundu kem dumu tau du.

⁴² Omin Sol bud mon du, “Bud ye mò atù bélê me lewu me yóm ngau Junatan.” Ne Junatan yóm gwa le.

⁴³ Omin Sol smólók ke Junatan, monen mò du, “Tulónem do yóm deng nmoem?” Ne tulón Junatan du, monen, “Deng wen udì tneb duu bè tukô yóm tugedu ne kenu. Mataye du kô yóm yó?”

⁴⁴ Yó mon Sol mò du, “Tahu se, matayi. Dwata he hol hmatay do ke là matayi, Junatan.”

⁴⁵ Okóm yó udél le ebè Sol yó kem tau, mon le, “Hyu kô ke matay Junatan igoen du hegmò yó kem tau Israél kemdaw ni? Là hyuhen. Safà me bè yóm Dwata là matayen, balù sotu balu wek Junatan ke wen tódô du, yakà du yóm tnóbóng Dwata mò du yóm tey hentaw deng nmoen kemdaw ni.” Duhen yó, lenwà yó kem tau Junatan ne là matayen.

⁴⁶ Ominen yó, là bud ktes Sol kul ne yó kem Flistin. Ne yó kem dù Flistin bud le mulék ebè yóm kul benwu.

Tendo kegmò Sol bè yó kem hohonen

⁴⁷ Bè yóm kogot Sol bè Israél, yó nmoen mit sgida bè yó kem benwu hohon le hmilol kul, duhen yó kem tau Muab ne yó kem tau Amun ne yó kem tau Idom ne bè yó kem tau hol geta bè Suba ne bè yó kem tau Flistin. Ne sal gel gemmò bélê le.

⁴⁸ Tey gel khotuhen gelen bè yóm gel kwiten sgida, botong là kô le gemmò yó kem tau Amalikayt. Sal gel lenwaen yó kem tau Israél bè yó kem tau tehe gel mundug kul.

⁴⁹ Yó boluy yó kem ngà Sol logi, duhen Junatan ne Isbi ne Malkisuwa. Yó boluy yóm lewu kem ngaen libun, twogu duhen Mirab ne yóm twoli duhen Mikal.

⁵⁰ Yó boluy yehen Sol, Ahinuam yóm ngà Ahimaas libun. Yó boluy yóm kmandér bè yó kem sendaluen yóm sotu dumun setwoli boluyen Abnér yóm ngà Nér mà dì Sol.

⁵¹ Yóm Kis kun mà Sol ne yóm Nér kun mà Abnér, hono kem ngà Abil logi.

⁵² Bè yóm kun kdaw Sol, sónmò le sgida yó kem tau Israél ne yó kem tau Flistin. Ke wen logi Israél ton Sol lóbô ne kemgis, sal henbalingen mò sendaluen.