1 Samwél 13 - Udél Dwata: Gna Kesfasad ne Lomi Kesfasad

Kesgida le kem tau Israél yó kem Flistin

¹ Yóm kbaling Sol tau hol geta bè Israél, hanà tlu folò he halayen. Ne yó kegenen kmamal bè Israél, botong fat folò lewu halayen.

² Wen tlu libu sendalù nélék Sol bè yó kem sendalù Israél ne lemwót yó kem dumu gotu huléken lu. Lemwót yóm lewu libu bè yó kem sendalù deng néléken yó koni mò mung du ebè Mikmas ne ebè yó kem bulul lemnek bè benwu Bétél. Ne yóm lemibu fen hmungen yóm ngaen Junatan ebè benwu Gibya, yóm tonok kun ólól tehe Bindyamin.

³ Kogolen bè yó, lemwót Junatan nundugen yóm kamfù yó kem Flistin bè Giba ne gemmò bélê le. Ne gefet bè yó kem dumu Flistin nim ni. Yó gónó Sol mdók tau anì huni le yóm hanga ógóf mò taba sendalù bè klamang Israél anì eles le htifes bè gida.

⁴ Ominen heglalag du bélê le yóm deng kegbà le kamfù yó kem Flistin bè Giba. Lemwót bè yóm nmò le Junatan yó, deng mom milud kutó nawa kem Flistin kul yó kem tau Israél. Ne yó gónó le gotu stifun yóm kdéen sendalù Israél, ston le ke Sol bè Gilgal.

⁵ Ne gotu le stifun se kul yó kem Flistin na le e gnida yó kem tau Israél, botong tlu libu klitun tók nit bè gida nwit le ne nem libu tau smakay kudà mung kul, ne yóm kwen yó kem sendalù le lómón kwen le helek bè kilil mohin. Yó nmò le mneged le ebè Mikmas, fi dmata kdaw Bit-abén ne bè yó gónó le kmamfù.

⁶ Timbow ton yó kem tau Israél yóm tey kwen yó kem hohon le mundug kul, ya tey sidek kónó nawa le. Wen se bélê le hebnos bè yó kem kilib ne lem sol ne lem blóng yó kem botu ne lem yó kem kilib gónó le lembeng tau matay ne wen se hebnos lem sol él deng kti.

⁷ Ne yó kem dumu, fen le mlóy mifal Él Jurdan etu bè tonok snakuf Gad ne Gilyad. Lemwót ke Sol kun, tolo nô bè Gilgal mung du yó kem sendaluen. Ya tey sidek klikò le, botong le kenkel.

⁸ Yó nmò Sol, nangaten bè yó yóm hitu kdaw tehe kesbuteng le Samwél. Okóm là géhélen sut bè Gilgal Samwél. Lemwót yó kem sendalù Sol deng mom ninut tnagak le Sol.

⁹ Yó gónó Sol mon du bè yó kem tau, “Mit ye do edini yóm dsù gel hkekeb ne yóm dsù mit sefyu bè Dwata.” Tahu se, mit le ebéléen. Ne tódô du demsù du bè Dwata yóm dsù hkekeb yó.

¹⁰ Timbow deng kedsuen, sut se Samwél. Lemwót Sol hnódó senlongen.

¹¹ Yó mon Samwél mò ke Sol, “Tedu deng nmoem ni du?” Bnalà Sol, monen, “Tikóng tonu yóm deng gotu kestagak le do yó kem sendalù, lelem là dog sut bè yóm deng kesbuteng te ne deng le gotu kmamfù bè Mikmas yó kem Flistin,

¹² yó mon nawahu, ‘Angat nundug le o bè ni bè Gilgal yó kem Flistin yó lelu là deng mni tóbóng bè Dwata he do.’ Ne yó gónów tódô mubug knóu demsù ebè Dwata.”

¹³ Bnalà Samwél, monen, “Nungeli, là kô dog loloem du yóm deng hloloen kóm yóm sana kóm Dwata hol gónó mogot. Ke deng loloem, laen kô dù nan e són yóm kogotem bè Israél kkólen bè yó kem angat lugodem.

¹⁴ Okóm ni, là gfuhen yóm kogotem benwu. Deng wen tau ton Dwata, yóm hol nô bè nawahen mimón du. Deng du se néléken mò hogoten yó kem tauhen abay se là loloem du yóm hloloen kóm.”

¹⁵ Kewót Samwél bè yó bè Gilgal hlós ebè yóm kun gónó e solu. Kewót Sol se kun hlós ebè Gibya yóm benwu glem lem yóm tonok kun ólól yóm tehe Bindyamin, mung du yó kem dù sendaluen na le e senlong yó kem dumu sendalù le. Nsó Sol yó kem dù sendaluen mung du, tek nem latu kwen le.

¹⁶ Bè yó bè Giba yóm ngà benwu moni bè Gibya gónó le kmamfù le Sol, mung du Junatan yóm ngaen ne yó kem sendaluen. Yóm benwu yó glem lem yóm kun tonok tehe kun ólól Bindyamin. Ne fen le kmamfù bè Mikmas kul yó kem Flistin.

¹⁷ Ne yó nmò le wen tlu lumbuk sendalù hundug le yó kem tau Israél. Yóm sotu lumbuk mundug etu ebè Ufra bè tonok Sual.

¹⁸ Ominen yóm gewuhen mundug etu fi desdef ebè Bit-horon. Ne yóm getluhen mundug le ebè yóm benwu nô bè kilil yóm tonok le, bè yóm gónón mfatu senta Datal Sibuyim smolu ebè yóm benwu laen hol wen tauhen.

¹⁹ Bè yóm kdaw yó, bè klamang Israél laen kô dù tonem tau msól bè yó abay se yó mon yó kem Flistin, “Déke mò le sudeng ne buyus yó kem tau Israél.”

²⁰ Ke gel htelem le bak dadu le ne songkul le ne beyung le ne galab le yó kem tau Israél, tódô ditu bè kem Flistin gónó le hsól.

²¹ Lelen yó he tey mebtes kehbayad le kul ke wen hsól le.

²² Yó gónóm mon, bè yóm kdaw le sgida yó, tek són Sol lewu le Junatan yóm mogot sudeng ne buyus, fen là kul yó kem sendalù nalak le.

²³ Yó bud nmò yó kem Flistin, wen kem tey lumbuk sendalù bud hógów le mò mentey bè yóm lan ebè Mikmas.