1 Samwél 12 - Udél Dwata: Gna Kesfasad ne Lomi Kesfasad

Kudél Samwél ebè yó kem tau Israél bè yóm són kalaken kul

¹ Omin Samwél yó mudél ebè yóm kdéen tau Israél, monen, “Deng nmou bélê ye yóm hmò ye do ne deng wen se tau hol geta mò malak kuy.

² Ne ni, du ne mò malak kuy là bud ou du. Ke béléu do, denge tey tuha ne deng bukay weku ne yó kem ngau logi mò tebel bélê ye. Nbutu malak kuy hanae tolo ngà he efet deng ni ne.

³ Ni, mdae bè solu Dwata ne bè solu yóm tau hol geta deng néléken. Tulón ye do kun ke deng wen bélê ye gónów mnagaw safì? Deng wen kô bélê ye gónów mnagaw kudà asnu? Deng wen kô lenugihu bélê ye? Deng wen kô tau hen-gnoku? Deng wen kô gel nwahu mò wa nawa? Hol tulón ye do anì bud huléku ebélê ye.”

⁴ Yó balà le du yó kem tau, mon le, “Là. Là kô deng lenugihem kum ne là se deng hen-gnokem kum. Laen du deng nwahem bélê me mò wa nawa.”

⁵ Ne yó udél Samwél ebélê le, monen, “Yó fen temksì kuy kemdaw ni bè yóm klaen dù salà deng nmou bélê ye, duhen Dwata ne yóm tau hol geta deng kun nélék.” Ne yó balà le du yó kem tau, mon le, “Dwata se fen temksì du.”

⁶ Yó bud udél Samwél ebè yó kem tau, monen, “Tahu se, Dwata temksì du, yóm Dwata tehe mélék ke Musis lewu le Aron ne tehe hewà yó kem tehe fù ye gu bè Idyip.

⁷ Ne ni, tódô ye henek mdà bè ni bè solu Dwata yóm igou heftulón du bè nawa ye yóm kdê deng gendeng Dwata bélê ye dalang se bè yó kem tehe fù ye ekni.

⁸ Yóm tehe kógów le Jakub ne yó kem fes lówóhen ebè Idyip ekni, tey kehsidek le kul yó kem tau Idyip ne yó gónó le alì hkodu mni tóbóng bè Dwata ne yó gónó Dwata tehe hógów ke Musis lewu le Aron mò lemwà kul gu bè Idyip ne suen lu ta nim tonok ni.

⁹ Okóm yó kem tehe fù ye yó deng mom klifót le yóm sana kul Dwata hol gónó mogot ne yó gónó Dwata hemlus kul elem tdok Sisira, yóm kmandér bè yó kem sendalù Jabin yóm tau hol geta bè benwu Hasor ne bud hlusen lu elem tdok yó kem Flistin ne elem tdok yóm tau hol geta bè Muab.

¹⁰ Omin le yó bud hkodu mni bè Dwata anì tnóbóngen lu. Yó udél le ebè Dwata, mon le, ‘Ó Dwata, deng me gemsalà béléem abay se deng knogol me uu ne deng me mom tmaba ebè yóm dwata lennged boluyen Baal ne bè Astarti. Okóm ni, ke hol lenwaem mi bè yó kem hohon me ne són uu ne bud gónó me e tmaba.’

¹¹ Ne yó nmò Dwata anì gewà ye bè yó kem hohon ye ne baling menek kbenwu ye, hógówen Gidyun, tmodol Barak, ominen Jifta ne tmodol huli duhen ou.

¹² Okóm timbow ton ye yóm móyón keglà Nahas kuy yóm tau hol geta bè benwu Amun, mógów ye ebéléu ne yó mon ye mò do, ‘Móyô me ke wen tau hol geta mò malak kum.’ Yó se udél ye igoen Dwata se yóm tau hol geta senflósen malak kuy.

¹³ Ni sii yóm tau hol geta deng kuy nélék, yóm deng hni ye. Deng blay Dwata kuy yóm deng hni ye yó.

¹⁴ Duhen ni, ke tendo wen klikò ye ke Dwata ne ke nimón ye yóm hmoen kuy ne ke hnungol ye yóm udélen ebélê ye ne ke là nulé ye du yó kem hloloen kuy ne ke són Dwata lolò ye, dalang se yóm tau hol geta bélê ye angat menek kbenwu ye.

¹⁵ Okóm ke nulé ye yó kem hlolò Dwata kuy ne là dog hnungol ye du angat tey ktafaken kuy lómón se bè yó kem tehe fù ye ekni.

¹⁶ Duhen ni, tódô ye henek mdà bè ni bè yóm sana kuy gónó mdà, tenngel ye yóm tey tennga nmò Dwata ni.

¹⁷ Tngón ye kóó ni se yóm bulón muta alì kinì kdaw. Okóm ni mnihe bè Dwata anì lemték ne kmulón kemdaw ni. Bè yó he gónó ye temngón du yóm tey kegsalà ye bè Dwata bè yóm kni ye béléen tau hol geta mò malak kuy.”

¹⁸ Tahu se, mni bè Dwata Samwél ne tódô heték Dwata gu bè longit bè yóm kdaw yó ne tey kehkulónen du. Tódô kdê yó kem tau mdà bè yó ya tey sidek klikò le ke Dwata ne bè Samwél.

¹⁹ Yó udél le hkodu bè Samwél yóm kdê le, mon le, “Mnihi bélê me bè yóm sana kóm Dwata hol gónó mogot anì là matay me. Yakà deng mom bud tennù me yóm kdê salà me lan me mni bè Dwata tau hol geta mò malak kum.”

²⁰ Yó bud udél Samwél ebélê le, monen, “Bê ye abay hlikò. Balù yóm deng tey kegsalà ye bè Dwata, hol bê ye abay bud knogol Dwata ne hol hewót ye lem but blutut ye yóm klolò ye du.

²¹ Bê ye abay bud semfulék tmaba ebè yó kem dwata kéng laen dù muhen. Là gbek le tmóbóng kuy ne là gbek le lemwà kuy abay se tahu laen dù mu le.

²² Yóm Dwata, là kô nan e tódô bayà kul yó kem kun tau deng nélék. Ke bayaen lu henyaken yóm kun boluy. Tey kehyu nawahen bè yóm kehbalingen kuy mò kun tau.

²³ Ke béléu do, ke là henlelu du mni bélê ye bè Dwata, salau bè Dwata se yó ne là kóe móyô mò du yóm yó. Ne henlelu tmolok du kuy yóm lan hyu ne yóm lan tedeng mò lolò ye.

²⁴ Okóm yake hol wen klikò ye ke Dwata ne hol ye hteneb lemolò du. Hol hendem ye yó kem tey hyu deng nmoen bélê ye.

²⁵ Okóm ke henlós ye mò sidek angat ye meglà, dalang se yóm tau hol geta bélê ye.”