1 Samwél 11 - Udél Dwata: Gna Kesfasad ne Lomi Kesfasad

Kegmò Sol bè yó kem tau Amunayt

¹ Timbow móyónen sbulón bè yó lemwót Nahas yóm tau hol geta bè benwu Amun, nalaken yó kem sendaluen na le e nundug yó kem tau Israél nô bè syudad Jabis glem lem Gilyad. Okóm yó kem tau Israél menwu bè Jabis hkodu le bè Nahas, mon le mò du, “Miti sbilà bélê me anì mogot me béléem.”

² Okóm yó balà Nahas kul, monen, “Mite sbilà bélê ye okóm wen hnihu bélê ye. Lensitu doli mata kwanan ye mò gónóhu hemyak yóm kdéen tau Israél.”

³ Yó balà le du yó kem tmuha bè Jabis, mon le, “Benlayem mi hitu kdaw anì hógów me tau bè klamang Israél. Ke laen dù dumu me mò tmóbóng kum, yó ne heglaan me bélê ye.”

⁴ Tahu se, tikóng le kól bè Gibya bè yóm kun benwu Sol yó kem tau dók le yó koni, gotu tulón le yó kem tau bè yó yóm udél le ebélê le yó kem tau Amun ne ya tey sidek kkik yó kem tau.

⁵ Uma kóm ke Sol kun, yó he kkólen gu bè dnaduhen malak safì ominen smólók, “Tedu gfà le ni du? Moen ke kdê le gotu mkik?” Duhen yó, gotu tulón le du yóm tulón yó kem tau lemwót bè Jabis.

⁶ Timbow gungol Sol yóm tulón le, tódô sut béléen yóm Tulus Dwata ne ya tey sidek kebuten.

⁷ Wen lewu safì hnatayen, ominen gotu mólól du ne hwiten yó kem tau dóken ebè kdéen benwu glem lem Israél, yó udél hmungen du, monen, “Ke wen tau là móyóen mung ke Sol ne Samwél ebè gida, lómó angat kmou yó kem safì le lómón kheneku nim safì nii.” Tahu se, lemwót le. Ne yó nmò Dwata bè yó kem tau gónó le e solu, gotu le likò ne gotu le ssotu yóm kdê le ne gotu le mung.

⁸ Tikóng deng gotu sentifun Sol lu bè Bésék, botong tlu latu libu logi lemwót bè Israél ne tlu folò libu logi se lemwót bè Juda.

⁹ Yó tinok le yó kem tau mit tulón lemwót bè Jabis, mon le, “Tulón ye yó kem dumu ye bè Jabis-gilyad gu laanen là deng gtungu kdaw haya deng lenwà me yu ne.” Tikóng gungol yó kem tau bè Jabis yóm yó, ya tey kehligal le.

¹⁰ Ne yó bud udél yó kem tau Jabis ebè yó kem tau Amun hohon le, mon le, “Haya, heglaan me bélê ye, tódô nmò ye bélê me yóm kuy kóyô.”

¹¹ Okóm kifu bè yó, nólól Sol bè tlu lumbuk yó kem tauhen. Bè yóm hanà tolo minal mwas tódô hnusek le yóm kamfù yó kem tau Amun ne gotu hnatay le lu efet kemdaw. Gotu le sekla yó kem dù mowil bélê le, sotu kun mlóy.

¹² Omin le mudél ebè Samwél yó kem tau Israél, mon le, “Nô se lu du yó kem tau deng mon du là hyuhen ke Sol yóm tau hol geta bélê tekuy? Nit ye lu edini bélê me dé na me hnatay lu.”

¹³ Okóm yó balà Sol kul, monen, “Laen dù tau hnatay ye kemdaw ni yakà ni du yóm kdaw kehewà Dwata yó kem tau Israél.”

¹⁴ Omin Samwél mon du mò kul, “Géhél tekuy mógów ebè Gilgal na tekuy bud nolu sulék Sol bè yóm kbalingen tau hol geta bélê tekuy.”

¹⁵ Tahu se, gotu le mógów ebè Gilgal yóm kdê le ne bè yó bè solu Dwata bè Gilgal, wen kuruna suub le bè kulu Sol henbaling le mò tau hol geta bélê le. Bè yó bè solu Dwata gónó le demsù yóm dsù mit sefyu bè Dwata ne ya tey kehligal Sol bè yóm kdaw yó, dalang se yóm kdéen tau Israél.