1 Samwél 10 - Udél Dwata: Gna Kesfasad ne Lomi Kesfasad

Ketwél Samwél ke Sol hnolo ilô yóm kbalingen tau hol geta bè Israél

¹ Omin Samwél ma yóm ngà sobuy gónón nô hnolo ulib ne twélen ta kulu Sol, henmung neleken ne monen, “Yó gónów mò du béléem nim ni abay se deng nélék Dwata uu mò malak yó kem tauhen Israél. Uu se mò lemwà kul lem tdok yó kem hohon le menwu hmilol kul. Wen ilô tonem kedeng mò gónóm temngón du yóm deng kélék Dwata kóm mò malak yó kem tauhen.

² Bè yóm kulékem, yó ilô tonem wen lewu tau geslongem moni bè lebeng Rakél bè benwu Silsa nô bè kilil yóm kun benwu Bindyamin. Tulón le kóm yó kem kudà asnu hnebelem deng ton le lu, là bud tnafa nawa maem kul deng mom uu yóm tnafa nawahen, monen, ‘Nô se kun du yóm ngau logi?’

³ Bud kewót ye bè yó efet ye gefet bè yóm koyu ok bè benwu Tabor. Bè yó angat wen tlu tau semlong kuy, kem tau mógów ebè Dwata bè Bétél. Yóm sotu, wen tlu ngà kambing nalaken ne yóm sotu wen tlu mambang tahà nwiten, ominen yóm sotu wen sning kulit ógóf hnok tifas nwiten.

⁴ Hnódó le u ne benlay le uu lewu botù mambang ne henmóyóem.

⁵ Bè yóm kkólem bè yóm kun Bulul Dwata bè Gibya, bè yóm benwu gónó le kmamfù yó kem Flistin wen lumbuk kem tugod Dwata geslongem, lemwót le gu bè yóm gónó le gel demsù ta yóm bulul udì. Wen tey nuni le, wen kenbit le ne wen tamburin le ne wen sloli le ne wen htugod Dwata kul.

⁶ Bè yóm uras yó, tódô sut béléem yóm Tulus Dwata ne tey kehfasangen kóm ne wen htugod Dwata kóm ebélê le. Tódô tenlesen yóm kmò ktauhem.

⁷ Ke deng kól béléem ni kem ilô ni tódô nmoem yóm hyu béléem, yakà nóen béléem Dwata.

⁸ Gnahi etu bè Gilgal, nangatem ou ditu hitu ni. Angate mung kóm ditu demsù ebè Dwata yóm dsù hkekeb ne yóm dsù mit sefyu ebè Dwata. Hol nangatem o efete kól dyó ne tulónu kóm yóm angat nmoem.”

⁹ Timbow deng kestulón le, lemwót Sol tnagaken Samwél. Unihen kmogol ke Samwél, tódô sen-geng hnomi Dwata kehedem Sol ne kdê yó kem ilô tulón Samwél gotu dohò bè yóm kdaw yó.

¹⁰ Timbow le kól bè Gibya le Sol lewu le yóm tau tóbóng lówóhen, wen kem lumbuk tugod Dwata semlong kul. Tódô sut bè Sol yóm Tulus Dwata ne nbuten se kun tmugod ke Dwata.

¹¹ Tikóng ton yó kem tau deng dmilô ke Sol yóm nmoen yó gotu le ssólók, mon le, “Tedu deng gefet béléen yóm ngà Kis ni? Mone baling tô tugod Dwata se kun kô nim Sol?”

¹² Okóm wen sotu tau bè yó malà kul, monen, “Kihu tau ke móyô baling tugod Dwata ne kihu se maen.” Yó se buten yóm gel mon le, “Bud tugod Dwata se kun kô ke Sol?”

¹³ Timbow deng ktugod Sol ke Dwata, ominen hlós ebè yóm gónó le gel demsù ta yóm bulul udì.

¹⁴ Tikóng ton mà dien Sol snólóken, “Gónóm deng gu du?” Bnalà Sol se, monen, “Hnebel me yó kem kudà asnu deng lana. Okóm là kô ton me kul. Yó gónó me mógów ebè Samwél anì na me e snólók gónó le nô.”

¹⁵ Ne yó mon mà dien mò du, “Tedu se tulón Samwél kóm du?”

¹⁶ Bnalà Sol, monen, “Yó monen mò do, deng ton le lu ne kun yó kem kudà asnu hnebel me.” Okóm là kô tulón Sol du ke mà dien yóm deng ketwél Samwél du hnolo bè yóm kbalingen tau hol geta.

Kbaling Sol tau hol geta

¹⁷ Là legenen bè yó, gotu htaba Samwél lu yóm kdéen tau Israél anì gotu le stifun bè solu Dwata bè Mispa.

¹⁸ Ne tulónen kul yóm udél lemwót gu bè Dwata yóm Dwata yó kem tau Israél, monen, “Yu kem tau Israél, deng lenwau yu gu bè Idyip ne deng lenwau yu lem tdok yó kem tau Idyip ne lem tdok yóm kdéen benwu hemgnok kuy.

¹⁹ Okóm ni, deng mom kenbê ye o yóm kuy Dwata, yóm deng lemwà kuy bè yó kem gónó ye glayam ne bè yó kem gónón mgel bélê ye. Deng mom mon ye, ‘Là. Hyu ke wen tau hol geta bélê me.’ Duhen ni, mdà ye bè solu Dwata mlan bè ket tbong ye ne bè ket ktol ye.”

²⁰ Tahu se, gotu htaba Samwél bè yó bè solu Dwata yóm sfolò lewu kem tbong Israél ne yóm kun tbong Bindyamin yóm nélék Dwata.Ominen mit du bè solu Dwata yóm kdéen ktol semfu gu bè Bindyamin ne lugod Matri yóm bud nélék Dwata. Ominen lemwót bè lugod Matri nélék Dwata Sol yóm ngà Kis. Tikóng tô hnebel le là ton le du.

²¹ Ominen mit du bè solu Dwata yóm kdéen ktol semfu gu bè Bindyamin ne lugod Matri yóm bud nélék Dwata. Ominen lemwót bè lugod Matri nélék Dwata Sol yóm ngà Kis. Tikóng tô hnebel le là ton le du.

²² Omin le smólók ke Dwata, mon le, “Gónón nô se kun du?” Bnalà Dwata lu, monen, “Nô bè ni, hebnos tekwang yó kem lulón yóó.”

²³ Omin le yó mlóy ebè Sol na le e nangay elem blóng yó kem tau. Tikóng hdà le, tahà se kun senta yóm kdê dumu tau Israél.

²⁴ Ne yó udél Samwél ebè yó kem kdéen tau, monen, “Ni se yóm tau deng nélék Dwata. Laen dù bè yó kem tau Israél mkél du.” Ne gotu le mensag yóm kdê tau, mon le, “Hol tahà he ktauhen yóm tau hol geta.”

²⁵ Omin Samwél gotu tmulón du yó kem tau yóm kun kwalis yóm tau hol geta ne yóm kun nmò. Ominen gotu smulat du bè klatas lenulun ne hlasaen bè yó bè solu Dwata. Ominen gotu hulék kul yóm kdéen tau.

²⁶ Dalang se ke Sol, mulék se kun ebè gónóen bè Gibya ne wen se kem tau tendól Dwata lem hendem le anì móyô le mung béléen, hono kem tau alì mbegel bè sfatay.

²⁷ Okóm wen kem tau bè yó fen gel hesbeweg benwu mudél sidek eta Sol, mon le, “Tô kegbeken lemwà tekuy du yóm tau ni?” Ne tey kehnê le du ne là kô le dog mit ebéléen yóm mò basa le du. Okóm tódô henek Sol.