1 Kurin 9 - Udél Dwata: Gna Kesfasad ne Lomi Kesfasad

Kun kwalis yóm tau hógów Dwata

¹ Béléu dou, laen kô dù bud gónóhu gfét ne bè yó kem gna gel lolò tekuy. Ou se sotu hógów Dwata, ne deng tehe tódô hegfan béléu yóm gónó tekuy mogot Jisas. Ne lemwót bè yóm hmoen dou gónó ye baling tau hemtahu béléen.

² Balù yóm là kehtahu le du yó kem dumu tau yóm kélék Dwata dou mò hógówen, là kô henkéng ye du kuy. Lemwót bè yóm deng kessotu ye bè yóm gónó tekuy mogot, yó gónón hol gfan yóm deng khógów Dwata do.

³ Ke wen tau gel hemkéng du yóm khógówen dou, ni se mò kbalau kul.

⁴ Ke nawaw hlowil bè yó kem tau gónóhu gel tmolok, wen kwalisu mò du.

⁵ Ne ke deng wen yehenu, wen kwalisu mit du bè yóm kógówu lómón yóm kul gel nmò yó kem dumu tau gel hógów Jisas, ne yó kem dumun setwoli yóm gónó tekuy mogot, dalang se ke Pitér.

⁶ Tedu tô kmò kehedem ye du? Tek són mi Barnabas kô hgel kmikis mò lowil me bè yóm ktolok me lem blóng ye?

⁷ Tulón ye dou kun, deng wen sendalù mung bè gida kô ke tlek kun mebel mò gastuhen? Ne bè yóm tau gel mò hulu, là dog kenen du ne kô yóm gel nutahen? Dalang se yóm tau semgyok ógóf, là dog wen kem ofolen du ne kô yó kem ógóf sen-gyoken? Là kô yó du. Sal gel wen ofolen du yóm kun leniteg yóm tau.

⁸ Là són du bè nim kmò tau ni koni gónó ye temngón du nim ni. Okóm deng sana monen bè hlau Musis snéen.

⁹ Yakà deng gesfala tekuy du yóm hlau yó ekni, yóm monen, “Ke dmadu yóm safì, bê ye abay hnungus.” Bè nim udél Dwata ni, là olon bè safì du gónón e gbak.

¹⁰ Okóm ebélê tekuy se hol gónón e gbak. Yó gónóm mon, bè yóm kmò le nmò yó kem tau dmadu ne yó kem tau muta, bong hendón le ke wen ofol le du yóm nmò le yó.

¹¹ Lómón ni se yóm kum nmò lem blóng ye. Hol lómón ke deng hulu me yóm udél Dwata lem blóng ye, ne laen kô dù sónen yóm kehyuhen bélê ye. Yó gónón là layab ke hlowil me se bélê ye, abay se nuta me bungu yóm kum leniteg.

¹² Ke wen kwalis le hlowil bélê ye yó kem dumu tau tmolok lem blóng ye, milud he yó dum kum. Okóm là dog kem ktes me du ne kum yó dum yó. Tódô hyu nawa me hembala du ne yó kem mgel gel sut bélê me anì laen dù gónón gseng yóm Tulón Hyu gel nwit me gbak ebè Krays.

¹³ Deng hónô tngón ye se bè yó kem tau gel mò nmò bè Gónô Dwata, són bè yó se gónó le mowil. Ne dalang se yó kem tau gel demsù ebè Dwata bè yó, wen se kul mdengen ólól bè yóm utón gel hedsù le kul ebè Dwata.

¹⁴ Senged snéen yóm hloloen tekuy yóm gónó tekuy mogot ekni gbak ebè yó kem tau mit du yóm Tulón Hyu. Deng monen hyu ke yó kem tau gónó le tmolok fen lemowil kul.

¹⁵ Balù yóm kwen kwalisu hlowil bè yó kem tau gónóhu gel tmolok, ewenem yó, là dog kem nólómu du bélê le. Là kô yó du gónóhu smulat ebélê ye nim ni ke mò udélu hélé mni bélê ye. Mom hyu nawahu ke tódô kem hatayu kenusu, olo ke tô wen hnihu bélê ye. Là móyóe du ke wen nmou mò gónón gseng yóm Tulón Hyu nwitu.

¹⁶ Bè yóm gel kwitu du yóm Tulón Hyu, laen kô gónóhu hton salù du, abay se bè ktahuhen, wen fen hmò du dou. Hol là gbeku du ke là nmou du. Angat tey kegtafaku ke là nmou du.

¹⁷ Ke tódô dou lenbù nmò nim ni, knóón ke gmutahe du sukéy. Okóm ni se hmò Dwata do, ne tey mget ksigangen du tahu.

¹⁸ Bede wen se ofolu du. Yó ofolu, duhen yóm alì kehyu nawahu bè yóm klaen dù hnihu bè yó kem tau gónóhu tmolok du yóm Tulón Hyu yó, balù yóm kwen kwalisu hlowil bélê le.

¹⁹ Nim ou, laen kô deng tau gónóhu klifen. Okóm tódô kem ou ne heklifen knóu bè kdéen tau anì hol temnù kwenen yóm tau nwitu ebè Krays.

²⁰ Bè yóm gel knóu lem blóng yó kem Ju, tódóe hmung bè yóm kul adat mò lanu mit kul ebè Krays. Ne balù yóm là bud kegfétu du yóm hlau Musis, tódóe kem hmung bè yóm klolò le du anì wen lanu mit kul ebè Krays yó kem tau gel lemolò du yóm hlau yó.

²¹ Senged se ke nóe lem blóng yó kem tau là Ju le, là kô naw e lolò du yóm kum hlau mi kem Ju abay se là kul hlau du yóm yó. Okóm tódóe hmung bè kul adat anì wen lanu mit kul ebè Krays. Ya mon ke là bud lolou du yóm hlau Dwata. Lómón ke gotu lolou lu se lanu lemolò yóm hlau Krays.

²² Ke nóe lem blóng yó kem tau tolo lufi kehtahu le, tódóe hmung bè yóm kul kmò anì wen lanu mit kul bè kehtahu le. Ket tau gel tnulónu, sal gel hnebelu yóm lanu gemwit kul ebè Krays.

²³ Yó gónóhu mò du nim ni anì hol mból yóm Tulón Hyu nwitu, ne anì wen se dou du bè yóm hyu gel tulónen lemen.

²⁴ Deng hónô tngón ye se ke wen yóm skuya mlóy, tey dê tau gel mung, okóm tek sotu yóm matù, ne du se olo gemwa ofol. Tekuy se kem tau hemtahu, lómón ke skuya tekuy mlóy. Hotu tekuy són gel tekuy mlóy anì guta tekuy yóm ofol.

²⁵ Yóm tau mung bè yóm skuya mlóy, tey khotuhen gelen mò du yóm gónón kemgis lem lówóhen anì angat matù. Ewenem yó, yóm ofolen bè yóm katuen, là kóen dog legen, sana sidek. Okóm yó dum ofol guta tekuy kem tau hemtahu, laen kô mtukul ksideken.

²⁶ Yó gónóm mon, tódô henktengu yóm dou klóy efet kól bè sónen. Sotu bud gónóhu e hmingón du yóm nmou, lómón ke tauhe seglab. Là kóe móyô smuntuk lenos dou. Kóyóu ke ket ksuntuku, hono tódô.

²⁷ Duhen yó, anien ke wen sidek knóyô lówóhu, tódô hotuhu gelu kembê du anì là gmunge. Ke là hulunge mafas nawahu, là kô gutahu du se yóm ofol angat blay Dwata dou, igoen ou se sotu tau gel tmolok kem dumu tau.