1 Kurin 6 - Udél Dwata: Gna Kesfasad ne Lomi Kesfasad

Keskukum hono tau hemtahu

¹ Kesok wen gónó ye seglius bè yó kem dumu ye hemtahu, moen de ke gel hkukum ye yó kem tau là hemtahuhen? Mò ye là tódô mit du ebè yó kem tau Dwata mò fen kmukum du bélê ye?

² Deng hónô tngón ye se, kdê tekuy kem tau Dwata, angat tekuy gbót béléen kmukum yó kem tau te tonok elem hulin kdaw. Ke yó se kmoen, tey élél là gbek kmukum du ke wen udì gónó ye seglius.

³ Deng hónô tngón ye snéen, balù yó kem hógów Dwata gu bè longit, angat knukum tekuy lu. Ke lómón yó angat nmò tekuy, élél là gbek knukum du yó dum olo knukum leneken talak tonok.

⁴ Ke wen gónó ye seglius, moen de ke hkukum ye bè yó kem tau laen dù kul kwalis du yóm kuy kmò yu kem tau hemtahu?

⁵ Ilóem là myak ye kô? Laen dù dumu ye hemtahu hulung kmukum lem blóng ye kô ke wen dumu ye seglius?

⁶ Mom yó nmò ye, skukum hono kem tau hemtahu, ne fen hkukum ye tu kem tau là hemtahuhen.

⁷ Bè yóm keskukum ye yó, olo ye mom hemyak knô ye. Mom hyu he ke tódô henbala ye ke wen gel lemugi kuy, dalang se ke wen gel mnagaw kimu ye.

⁸ Okóm ni deng mom yu lemugi yó kem dumu ye hemtahu, lel ye mnagaw kimu le igò ye sem hono tau hemtahu.

⁹ Deng hónô tngón ye, là kóen gmung bè yóm tau nogot Dwata yóm tau là tedeng nmoen. Béen tólóng kehedem ye du nim ni. Là kô le gmung yó kem tau gel mò samuk, ne yó kem tau hemtahu bè yóm dwata kéng, ne yó kem tau mdà yehen, ne yó kem tau deng mom senwì le yóm kmò kesyehen, syehen hono logi, ne syehen hono libun.

¹⁰ Ne yó kem tau mnagaw, là kô le gmung bè yó kem tau nogot Dwata, ne yó kem tau seglom, ne yó kem tau gel hlengel, ne yó kem tau gel sidek kbak le ebè kem dumu le, ne yó kem tau tódô gel temsob ma.

¹¹ Tehe wen se bélê ye mò du ekni ni kem monu ni koni. Okóm ni, deng ye baling mólós lan ye hkó yó kem salà ye. Deng ye baling kun tau Dwata, ne deng tedeng ne ktonen kuy hlanen bè Jisas Krays, yóm gónó tekuy mogot ne bè yóm Tulus yóm Dwata tekuy.

Bè lówó tekuy mò gónón megdóyón Dwata

¹² Wen kun bè yó kem dumu tekuy hemtahu mon du, monen, “Kihu dou nóyô nmò gbeku mò du.” Yó balau du yóm tau yó, monu, “Tahu se yóm monem yó. Bede là kdéen du yóm hyu béléem.” Béléu dou, gbeku mò du nô kihu nóyô nmou, okóm yó sidek ke deng mom henlósu lemolò yó kem knóyóu efete mom gfét du.

¹³ Ne wen se gel mon du, monen, “Yó se mu yóm blutut tau mò gónón e tódô ken. Ne yó mu yóm ken mò sù lem blutut.” Ya mo ktahuhen du yóm monen yó, okóm angat nmò Dwata sónen yóm blutut ne yóm ken. Yóm lówó tekuy, là yó du muhen ke gónó tekuy mò samuk. Okóm yó dé muhen mò fen mò nmò bè yóm gónó tekuy mogot. Ne du se fen hol semgyok du yóm lówó tekuy.

¹⁴ Deng hlowil Dwata yóm gónó tekuy mogot, ne lemwót bè yóm kfasangen mò du, angat hlowilen tekuy snéen.

¹⁵ Deng hónô tngón ye se, yóm kuy lówó deng ssotu bè kun lówó Krays. Yó kô nmò ye, tnù ye bè kun lówó Krays yóm kun lówó yóm libun hdóyón? Hol bê tekuy abay nmò yóm yó.

¹⁶ Deng hónô tngón ye yóm logi, ke sentungóen yóm libun hdóyón, deng ssotu ne lówó le. Abay se deng monen bè Sulat Dwata, monen, “Ke deng sgefet lówó le yóm lewu le, deng le baling ssotu ne.”Okóm yóm tau ke deng hemtahu bè yóm gónó tekuy mogot, deng le baling ssotu ne yóm gónón mogot.

¹⁷ Okóm yóm tau ke deng hemtahu bè yóm gónó tekuy mogot, deng le baling ssotu ne yóm gónón mogot.

¹⁸ Holi hlayuk du yóm mò samuk. Balù kihu dumu salà nmò tau, là gomongen lemen yóm lówóhen. Okóm yóm tau mò samuk, gomong hensideken yóm kun lówó.

¹⁹ Deng hónô tngón ye se nim lówó tekuy hol gónóhen nô yóm Tulus Dwata tehe sù Dwata bélê tekuy, yóm deng blayen tekuy. Là bud tekuy du ne funen yóm lówó tekuy, deng nfun Dwata.

²⁰ Yakà deng tehe benlihen tekuy, ne tey mebtes yóm keblihen tekuy. Duhen yó, bè kmò kwit tekuy yóm lówó tekuy, hol nmò tekuy yóm gónó Dwata megdóyón.