1 Kurin 5 - Udél Dwata: Gna Kesfasad ne Lomi Kesfasad

Keblólów Pol yóm mò samuk

¹ Deng wen tmulón du bélê me dini yóm kmoen samuk yóm sotu tau bélê ye, mom nugeten yê hulihen. Tey sidek yóm nmò yó. Balù yó he kem tau là deng le hemtahu bè Dwata, sana tey kekbê le du yóm nmò yó.

² Moen de ke deng ye mom hegmón? Mò ye là kemblat du nawa du yóm salà yó? Hol bê ye abay bud hmung bè yóm gel kestifun ye yóm tau mò du yóm yó.

³ Balù yóm là knóu lem blóng ye tek són dyó se gónón nô nawahu. Duhen yó, yóm tau mò sidek yó, deng eles hendemu ne yóm mò tafaken.

⁴ Mlan bè boluy yóm gónó tekuy mogot Jisas na ye na stifun. Yóm nmò ye, hol hlan ye bè kun kfasang yóm gónó tekuy mogot Jisas yóm deng eles nô bélê tekuy bè yó,

⁵ na ye tódô bayà bè Seitan he yóm tau yó anì nan hol glayam lówóhen, syan ke bud mulék nawahen ebè Dwata anì là gehlósen elem hatay bè yóm kdaw angat kehdaen du bè soluhen yóm gónó tekuy mogot.

⁶ Tey là kóen na a hyu yóm kehegmón ye yó. Igò ye se temngón du yóm gel mon le, “Baluen ke tek udì yóm ken bali, ke suem bè yóm ken là balihen, gbót bali snéen yóm ken lomi.”

⁷ Yó gónóm mon, hol kó ye dé yóm ken bali anì laen dù sidek gbool lem blóng ye. Ke yó nmò ye, hol lómón ke yu yóm ken lomi, balù udì ke wen bali gbol du. Ne bè ktahuhen, tódô tngónu ni se yóm hol kuy kmò. Yakà dengen matay Krays bélê tekuy, hol lómón ke du yóm ngà ubiha hnatay le bè yóm Kdaw Khius mò dsù le ebè Dwata.

⁸ Duhen yó, bè yóm kken tekuy bè yóm Kdaw Khius, hol kó tekuy ke wen ken bali, duhen yóm dê gónó kuy gemsalà. Yake tles tekuy du yóm ken lomi, duhen yóm nawa laen dù belenen ne yóm kestulón laen dù kéngen.

⁹ Yóm tehe sotu ksulatu ebélê ye, tehe monu bê ye segbót bè yó kem tau gel mò samuk.

¹⁰ Bè yóm ksulatu yó, là tendoku du yó du kem tau là hemtahu le. Sana kul kmò yóm mò samuk, ne seglom ne mnagaw ne hemtahu bè dwata kéng. Là gbekem kembê ston kul yó kem tau yó. Song hyu ke là budi nô talak tonok.

¹¹ Okóm yó dé hol lanen yóm tehe snulatu, ke wen tau gel monen deng hentahuhen Jisas, okóm ke gel mò samuk duhen ke seglom, duhen ke hemtahu bè dwata kéng, duhen ke gel sidek kbaken, duhen ke gel hlengel, duhen ke gel mnagaw, yó se yóm monu, hol bê ye abay sen-gbót. Ne bê ye slomong mken béléen.

^12-13 Bè ktahuhen, laen kô dù kwalisu kmukum kul yó kem tau là hemtahuhen. Tódô Dwata he angat kmukum kul. Okóm bè yó kem dumu tekuy hemtahu, wen kwalis tekuy kmukum kul. Hol lómón se yóm monen bè Sulat Dwata, yóm monen, “Hol hdó ye lem blóng ye yóm tau mò sidek.”