Thukhente 8 - Tedim Bible

¹ Tua ciangin Efraim mite in ama kiangah, “Midiante do ding na pai lai-in kote nong sap loh, kote hong bangci bawl na hi hiam?”a ci uh hi. Amaute in nakpi takin amah mawhsak uh hi.

² Amah in amaute kiangah, “Note tawh teh dingin ke’n bang hih ka hi hiam? Efraim leenggah sang kaihkhopna in Abiezer leenggah lak sangin hoih zaw hilo ahi hiam?

³ Pasian in note’ khut sungah Midian uliante Oreb leh Ze-eb hong pia zo hi; note tawh teh dingin ke’n bang hih zo ka hi hiam?” a ci hi. Amah in hih thu a gen khit ciang-in ama tunga amau’ hehna a bei hi.

Gideon in Midian Kumpite Man

⁴ Tua ciangin Gideon, amah leh amah tawh a om mi zathumte, Jordan tungin galkah a, gimpi mahin amaute delh lai uh hi.

⁵ Tua ahih ciangin amah in Sukkoth mite kiangah, “Kong thuum hi, kei hong zuite tungah anlum pia un; bang hang hiam cih leh amaute gim uh a, Midian kumpi Zebah leh Zalmunna a delh ka hi hi,” a ci hi.

⁶ Tua ciangin Sukkoth uliante in, “Na galkapte tungah anlum ka piak dingun Zebah leh Zalmunna na khut sungah om khin ahi hiam?” a ci uh hi.

⁷ Tua ciangin Gideon in, “Tua ahih leh pha hi, Topa in Zebah leh Zalmunna ka khut sungah hong piak khit ciangin gamlak lingte leh lingkung tawh na sa uh ka kui ding hi,” a ci hi.

⁸ Tua lai panin Penuel-ah paito a, amaute tungah tua mah bangin gen hi; Penuel mite in Sukkoth mite’ dawn mah bangin amah na dawng uh hi.

⁹ Tua ciangin amah Penuel mite kiangah, “Lungnuamin kong pai kik ciangin hih tausang ka su-pai ding hi,” a ci hi.

¹⁰ Tu-in Zebah leh Zalmunnate, Nisuahna lam mi galkap khempeuh sung pan a om lai teng, mihing tulsawm leh tulnga bang a pha a galkapte uh tawh Karkor-ah om uh hi; bang hang hiam cih leh namsau a tawi mi tulza leh tul sawmnih si khin hi.

¹¹ Tua ciangin Nobah leh Jogbehah nisuahna lam mihonte’ tot lampi zui-in Gideon paito-in galkapte do hi; bang hang hiam cih leh galkapte a galvil om lo hi.

¹² Tua ciangin Zebah leh Zalmunna tai uh hi; amah in amaute delhin Midian kumpi nihte Zebah leh Zalmunna manin galkapte khempeuh kitheh thangsak hi.

¹³ Tua ciangin Joash’ tapa Gideon a gal simna panin Heres kahtohna lam tawnin ciahkik hi.

¹⁴ Amah in Sukkoth mi tangval khat manin thu dong hi; tua pa in ama adingin Sukkoth uliante leh upate mihing sawmsagih leh sagih a min gelhsak hi.

¹⁵ Tua ciangin Sukkoth mite kiangah amah tungin, “Kei tungah hong kisialin, ‘A gim na mite tungah anlum ka piak dingun Zebah leh Zalmunna na khut sungah om khin ahi hiam?’ na cih uh Zebah leh Zalmunna en un,” a ci hi.

¹⁶ Tua ciangin amah in a khuapi upate sam a, gamlak lingte leh lingkungte zong la-in, tuate tawh Sukkoth mite thuhilh hi.

¹⁷ Tua ciangin amah in Penuel tausang su-pai-in tua khua mite that hi.

¹⁸ Tua ciangin amah in Zebah leh Zalmunna kiangah, “Tabor-ah na thah uh mite koi-ah om ahi hiam?” a ci hi. Amaute in, “Amaute, nangmah bang uh hi; amaute in kumpipa’ tapate suun uh hi,” a ci uh hi.

¹⁹ Tua ciangin amah in, “Amaute in ka sanggam, ka nu’ tapate ahi uh hi; Topa a nuntak mah bangin, amaute suakta sak hi le uh cin note kong that kei ding hi,”a ci hi.

²⁰ Tua ciangin amah in a tacil Jether kiangah, “Ding in, amaute that in,” a ci hi. Ahih hangin tangvalpa in a namsau dok lo hi; bang hang hiam cih leh amah tangval lai ahih manin lau hi.

²¹ Tua ciangin Zebah leh Zalmunna in, “Nangmah mah ding in, kote hong hih in; bang hang hiam cih leh pasal in a pasal bangin a thahat hi,” a ci uh hi. Tua ciang Gideon ding-in Zebah leh Zalmunna that hi; amah in amau’ kalaohte’ ngawng-a a om khade lim tawh a kibang kizepnate la hi.

Gideon’ Sep Dangte leh a Sihna

²² Tua ciangin Israel mite in Gideon kiangah, “Nang leh na tapa leh na tupate in zong kote hong uk un; bang hang hiam cih leh Midiante khut sung panin kote nong honkhia khin hi,” a ci uh hi.

²³ Gideon in amaute kiangah, “Note kong uk kei ding a, ka tapa in zong note hong uk lo ding hi; Topa in note hong uk ding hi,” a ci hi.

²⁴ Tua ciangin Gideon in amaute kiangah, “Note tung panin ngetna khat hong bawlsak un; note lakah mi khempeuh in van kinusia na top uh lak panin bilbahte hong pia un,” a ci hi. (Bang hang hiam cih leh amaute in Ishmael mite ahih manin bilbah nei uh hi.)

²⁵ Amaute in dawngin, “Lungkim takin kong pia ding uh hi,” a ci uh hi. Tua ciangin amaute in puan phah uh a, mi khempeuh in a van kinusia top uh lak pan bilbahte tua puan tungah lawn uh hi.

²⁶ Ama nget kham bilbahte a gihna in kham shekel tulkhat leh zasagih ahi hi; Midian kumpite in a zat khade lim tawh a kibang kizepnate leh khainiangte leh puan dupsante, leh a kalaohte uh ngawng kimkotah a om ngawng-awhte kisim lo ahi hi.

²⁷ Tua ciangin Gideon in milim-in tuate bawlin ama khuapi Ofrah khua-ah koih hi; Israelte khempeuh in tua lai mun-ah tua milim bia uh a, Gideon leh a innkuanpihte’ adingin thangzak khat suak hi.

²⁸ Tua ahih ciangin Israel mite mai-ah Midiante guallel uh a, amaute kihisak zo nawn lo uh hi. Gideon’ hun sungin tua gam in kum sawmli sung tawlngakna nei hi.

²⁹ Joash’ tapa Jerubbaal pai-in ama aituam innah teeng hi.

³⁰ Tu-in Gideon in tapa sawmsagih, ama aa mahmah nei hi, bang hang hiam cih leh amah in zi tampi nei hi,

³¹ Shekhem-ah a om a zineu in zong tapa khat nei a, amah in a min Abimelek phuak hi.

³² Tua ciangin Joash’ tapa Gideon teek sih a, Abiezer mite neihsa Ofrah khua-a om a pa Joash’ han-ah kivui hi.

³³ Gideon a sih khit phetin Israel mite kihei kikin Baalte bia uh a, a pasian dingun Baalberith bawl uh hi.

³⁴ Israel mite in, mun khempeuh panin amau’ galte’ khut sung pan a honkhia Topa a Pasian uh phawk lo uh hi;

³⁵ Jerubbaal (Gideon a cihna) in Israelte tungah a bawl thu hoihte khempeuh hangin amaute in Jerubbaal innkuante tungah migitna bangmah lak lo uh hi.