Thukhente 18 - Tedim Bible

Mikah leh Dan mite

¹ Tua hun lai-in Israelte sungah kumpi om lo hi. Tua hun lai-in Dan minamte in a teen’ nading uh gamhluah zong uh hi; bang hang hiam cih leh tua hun dong mateng Israel minamte sung panin amau ading gamhluah bangmah kia lo hi.

² Tua ahih ciangin Dan mite in gam ensimin a va zong dingin amau’ minam bup khempeuh lak panin misiam nga Zorah pan leh Eshtaol panin sawl uh hi; amaute in amau kiangah, “Pai un la gam va zong un,” a ci uh hi. Amaute Efraim mualtung gam, Mikah’ inn-ah hong tung uh a, tua lai-ah taam uh hi.

³ Amaute Mikah inn gei-ah a om uh ciangin Levi tangval’ aw khat khen thei uh hi; amaute kihei-in ama kiangah, “Kua in hih lai-ah nang hong paipih ahi hiam? Hih lai munah bang hih na hi hiam? Hih lai-ah na nasep bang ahi hiam?” a ci uh hi.

⁴ Amah in amaute kiangah, “Tua bang tua bangin Mikah in kei hong bawl hi: amah in kei hong cialin kei in ama siampi ka suak hi,” a ci hi.

⁵ Tua ciangin amaute in ama kiangah, “Kote’ kuankhiat khualzinna a tangtung ding hiam cih ka theih nadingun Pasian hong dotsak in, kong thuum uh hi,” a ci uh hi.

⁶ Tua ciangin siampipa in amaute kiangah, “Lungnuamin pai un. Note paina na khualzinna uh Topa’ khut sungah om hi,” a ci hi.

⁷ Tua ciangin mi ngate pai khia-in Laish tung uh a, tua lai-a om mite, Sidon mite’ om bang danin dai takin omin bangmah in a upmawh lohna, leitungah bangmah kisam loin a hauhna, leh amaute Sidonte kiang panin gamla omin kuamah tawh kizopna a neih lohna, lungmuang tak-a a teen’na uh mu uh hi.

⁸ Amaute Zorah leh Eshtaol-a a sanggamte uh kiang hong tun’ kik uh ciangin, a sanggamte un amaute kiangah, “Bang thu gen ding na nei uh hiam?” a ci uh hi.

⁹ Amaute in, “Ding un, amaute do-in paito ni; bang hang hiam cih leh a leitang ka mu khin uh hi, en un, lei hoih mahmah hi. Bangmah hih loin om mawk ding na hi uh hiam? Pai ding zekai kei un, lut-in tua leitang va luah ni.

¹⁰ Na pai uh ciangin bangmah a ummawh lo mite kiangah na tung ding uh hi. Leitang zai mahmah hi; hi hi, Pasian in na khut sung uh ah leitungah bangmah a kisap lohna mun hong piakhin zo hi,” a ci uh hi.

¹¹ Tua ciangin Dan minamte galhiam a tawi mihing zaguk Zorah leh Eshtaol panin kuankhia uh a,

¹² amaute paito-in Judah gam sung Kiriath-jearim-ah giahphual sat uh hi. Hih thu hangin tu hun dongin tua mun pen Mahanehdan kici hi; en in, tua in Kiriath-jearim nitumna lamah om hi.

¹³ Amaute tua lai mun panin Efraim mualtung gamah pai suakin Mikah innah tung uh hi.

¹⁴ Tua ciangin Laish gam a ensim dingin a pai mi ngate in a sanggamte uh kiangah, “Hih innte sungah siampi puan khat, inn sung pasiante, a kiseek milim khat, leh a kisung milim khat a omna na thei uh hiam? Tua ahih ciangin tu-in na hih ding uh ngaihsun un,” a ci uh hi.

¹⁵ Tua ciangin amaute kihei-in Mikah’ inn-a Levi tangvalpa omna-ah tung uh a, ama omzia dong uh hi.

¹⁶ Tu-in galhiam a tawi Dan mi zagukte kulh kongpi lutna-ah ding uh hi;

¹⁷ tua ciangin, galhiam a tawi mi zagukte tawh kulh kongpi lutna-ah siampipa a din’ lai takin gam ensim dingin a kuankhia mi ngate tumin a kiseek milim, a siampi puan, a inn sung pasiante, leh a kisung milim la uh hi.

¹⁸ Hih mite Mikah’ inn sungah tumin a kiseek milim, a siampi puan, a inn sung pasiante, leh a kisung milim a lak uh ciangin siampipa in amaute kiangah, “Bang hih na hi uh hiam?” a ci hi.

¹⁹ Amaute in ama kiangah, “Pau kei in, na khut-in na kam hum in la kote tawh hong pai-in kote adingin pa leh siampi hong hi in. Nang adingin mi khat’ inn sungah siampi hih ding hoihzaw ahi hiam, tua ahih kei leh Israelte sungah minam leh beh siampi hih ding hoihzaw ahi hiam?” a ci uh hi.

²⁰ Tua ciangin siampipa a lungkim hi; amah in a siampi puan, leh a innsung pasiante, leh a kiseek milim la-in mite’ laizangah pai hi.

²¹ Tua ahih ciangin amaute mai-ah a ta neute leh a ganhingte leh a vante uh om sakin, amaute kihei-in paikhia uh hi.

²² Amaute Mikah’ inn panin a gamla khop khat a tun’ uh ciangin Mikah’ inn gei-a om innte sunga om mite kisam khia-in amaute in Dan mite delhin pha uh hi.

²³ Amaute in Dan mite otsan uh a, tua ciangin amaute hong kihei-in Mikah kiangah, “Hih bang mihon tawh nong pai nading bang thu om ahi hiam?” a ci uh hi.

²⁴ Amah in, “Note in keima bawlsa ka pasiante, leh siampipa la-in na paikhia uh hi; keimah in bang nei nawn ka hi hiam? Tua ahih ciangin, ‘Bang thu ahi hiam? bang hangin hong ci thei na hi uh hiam?” a ci hi.

²⁵ Dan mite in ama kiangah, “Kote lakah na aw hong kizasak kei in, tua hi kei leh ka lawmte uh hehin nang hong hih ding uh a, na innkuanpihte tawh na si kha ding uh hi,” a ci uh hi.

²⁶ Tua ciangin Dan mite pai uh hi; Mikah in ama adingin amaute thahat lua uh hi, ci-in a muh ciangin amah kihei-in a innah ciahkik hi.

²⁷ Dan mite in Mikah’ bawlsate leh a siampipa paipihin gam dai-in a om bangmah a ummawh lo mite omna Laish tung uh a, namsau tawh amaute vatin mei tawh a khuapi hal uh hi.

²⁸ Amaute in Sidon panin gamla uh ahih manin a honkhia ding om lo a, amaute in kuamah tawh kizopna nei lo uh hi. Tua mun pen Bethrehob-te’ neihsa kuam sungah om hi. Amaute in khuapi lam kikin a sungah teeng uh hi.

²⁹ Amaute in tua khuapi min pen Israelte sungah a suak amau’ pian’na Dan tamin Dan phuak uh hi; ahih hangin a masa-in tua khuapi min in Laish ahi hi.

³⁰ Tua ciangin Dan mite in a kiseek milim amau’ adingin phut uh hi; Moses’ tapa Gershom’ tapa Jonathan leh ama tapate in tua gam a kilak hun dongin Dan minamte adingin siampi ahi uh hi.

³¹ Tua ahih ciangin amaute in Shiloh-ah Pasian’ inn a om sung teng Mikah’ bawlsa a kiseek milim phut uh hi.