Thukhente 17 - Tedim Bible

Mikah’ Milim biakna

¹ Efraim mualtung gam mi Mikah a kici min nei mi khat om hi.

² Amah in a nu kiangah, “Ngun peek tul leh peek zakhat nang kiang panin a kigu, tua tawh kisai-in na samsiat, keima zak-in zong na gen pen, en in, a ngun kei kiangah om hi; keimah in ka la hi,” a ci hi. Tua ciangin a nu in, “Ka tapa aw, Topa in thupha hong pia ta hen,” a ci hi.

³ Amah in ngun peek tul leh zakhatte a nu kiangah piakik hi; a nu in, “A kiseek milim khat leh a kisung milim khat bawl nadingin ka tapa adingin Topa tungah a ngunte ka apsa ahi hi; tua ahih ciangin tu-in nang tungah kong piakik ding hi,” a ci hi.

⁴ Tua ahih ciangin amah in a nu kiangah a sum a piak kik ciangin a nu in zong ngun peek zanih la-in, a kiseek milim khat leh a kisung milim khat-a a bawlsak ngun seekpa kiangah pia hi; tua pen Mikah’ inn sungah om hi.

⁵ Tua mipa Mikah in biakna phual khat nei a, amah in siampi puan khat leh innsung pasiante bawlin siampi suak dingin a tapate khat koih hi.

⁶ Tua hun lai-in Israelte sungah kumpi om lo hi; mi khempeuh amau’ hoihsak bang ciatun gamta uh hi.

⁷ Tu-in Judah gam Bethlehem khuami, Judah innkuan, Levi tangval khat om hi; amah tua lai-ah peem hi.

⁸ Tua mipa a muhna mun peuhah a teeng dingin Judah gam Bethlehem khua panin paikhia hi; tua bangin khualzinin a pai lai takin Efraim mualtung gam sunga Mikah’ inn-ah va tung hi.

⁹ Mikah in ama kiangah, “Koi panin hong pai na hi hiam?” a ci hi. Amah in ama kiangah, “Judah gam sung Bethlehem khuami Levi mi ka hi a, mun ka muhna peuhah a peem ding ka hi hi,” a ci hi.

¹⁰ Mikah in ama kiangah, “Kei tawh hong omin kei adingin pa leh siampi hong hi in, kum khat-in ngun peek sawm, leh puan silh khat, leh annek kong pia ding hi,” a ci hi.

¹¹ Levi mipa in amah tawh a teeng khawm dingin thukim hi; tangvalpa in ama tungah a tapate khat tawh kibang hi.

¹² Mikah in Levi mipa koihin, tangvalpa ama siampi suak in Mikah’ inn-ah om hi.

¹³ Tua ciangin Mikah in, “Topa in ka dau hong pai sak ding hi, ci-in tu-in ka thei hi; bang hang hiam cih leh siampi-in Levi mite khat ka nei hi,” a ci hi.