Thukhente 1 - Tedim Bible

Judah leh Simeon in Adonibezek Man

¹ Joshua a sih khit ciangin Israel mite in Topa tungah thu dong uh a, “Kote adingin Kanaan mite a do dingin kua paito masa ding ahi hiam?” a ci uh hi.

² Topa in “Judah paito ding hi; en un, ama khut sungah tua leitang ka pia zo hi,” a ci hi.

³ Tua ciangin Judah in a sanggampa Simeon kiangah, “Kanaan mite i do theih nadingin kei tungah hong kipia gamah kei hong zui in; tua mah bangin nang hong kipia gamah keimah in zong kong zui ding hi,” a ci hi. Tua ahih ciangin Simeon in amah zui hi.

⁴ Tua ciangin Judah paito a, Topa in amaute khut sungah Kanaan mite leh Perez mite pia hi; amaute in Bezek-ah tua mite tulsawm zo uh hi.

⁵ Amaute in Bezek-ah Adonibezek tuakin amah tawh kido uh a, Kanaan mite leh Perez mite zo uh hi.

⁶ Adonibezek tai hi; ahih hangin amaute in delhin man uh a, a khutpite leh a khepite attan uh hi.

⁷ Tua ciangin Adonibezek in, “A khutpite leh a khepi a ki-attan kumpi sawmsagihte in ka sabuai nuai-ah anneng kia tawm ngei uh hi; ka gamtatnasa bangin Pasian in kei hong thuk hi,” a ci hi. Tua ciangin amaute in Jerusalem-ah amah paipih uh a, tua mun-ah amah si hi.

Judah in Jerusalem leh Hebron Zo

⁸ Tua ciangin Judah mite in Jerusalem simin la uh a, namsau tawh vatin a khuapi hal uh hi.

⁹ Tua khit ciangin Judah mite, mualtung gam, Negeb gam, leh lei niamna-a teeng Kanaan mite a do dingin paisuk uh hi.

¹⁰ Tua ciangin Hebron (Hebron min pen a ni dangin Kiriath-arba) ah a teeng Kanaan mite do dingin Judah mite paisuk hi; amaute in Sheshai leh Ahiman leh Talmai zo uh hi.

Othniel in Debir zo-in Aksah Ngah

¹¹ Tua lai panin Debir mite do dingin amaute pai uh hi. Debir min pen ni dangin Kiriath-sefer ahi hi.

¹² Tua ciangin Kaleb in, “Kiriath-sefer simin a la pa tungah a zi dingin ka tanu Aksah ka pia ding hi,” a ci hi.

¹³ Tua ciangin Kaleb naupa Kenaz tapa Othniel in la hi; amah in a zi dingin a tanu Aksah pia hi.

¹⁴ Tua nu ama kiangah a pai ciangin a pa kiang panin lo khat a nget nading tua nu in sawl hi; tua nu a la tung panin kum a, Kaleb in ama kiangah, “Bang ut na hi hiam?” a ci hi.

¹⁵ Amah in “Letsong khat hong pia in; Negeb gamah hong koih na hih ciangin tuikhukte zong hong pia in,” a ci hi. Tua ciangin Kaleb in ama tungah tuikhuk tungnungte leh tuikhuk nuainungte a pia hi.

Judah leh Benjamin’ Zawhna Ciang

¹⁶ Tua ciangin Moses’ sungpate nam ahi Ken’ suan-le-khakte, Judah mite tawh nisuh khuapi panin Negeb gam Arab gei-a om Judah gam lakah paito uh hi; amaute tua lai mun-ah tungin tua mite tawh teeng khawm uh hi.

¹⁷ Judah in a sanggampa Simeon tawh pai khawmin Zefath-ah a teeng Kanaan mite va zo-in susia mang uh hi. Tua ahih ciangin tua khuapi min Hormah kici hi.

¹⁸ Judah in zong Gaza leh a gam, leh Askhelon leh a gam, leh Ekron leh a gamte la hi.

¹⁹ Topa in Judah tawh om a, amah in mualtung gam teng luah hi; ahih hangin zang gam-a teeng mite amah in hawlkhia zo lo hi; bang hang hiam cih leh amaute in sik leeng nei uh hi.

²⁰ Tua ciangin Moses in a gensa bangin Kaleb tungah Hebron kipia hi; tua sung panin amah in Anak tapa thumte hawlkhia hi.

²¹ Ahih hangin Benjamin mite in Jerusalem-ah a teeng Jebus mite hawlkhia lo uh hi; tua ahih ciangin tu ni dongin Jerusalem-ah Jebus mite in Benjamin mite tawh teeng khawm uh hi.

Josef in Beth-el Zo

²² Josef innkuan zong Beth-el do dingin paito uh hi; Topa in amaute tawh om hi.

²³ Tua ciangin Josef innkuante in thu kansim dingin Beth-el ah mi sawl uh hi. (Tua khuapi min pen a ni dangin Luz ahi hi.)

²⁴ Thu kansimte in khuapi panin hong paikhia mi khat mu uh a, ama kiangah, “Khuapi lutna lampi hong hilh in, kong thuum uh hi, nang tungah kong diktat ding uh hi,” a ci uh hi.

²⁵ Tua ciangin amah in khuapi lutna lampi amaute lak hi; amaute in namsau tawh tua khuapi vat uh a, ahih hangin tua mipa leh a innkuante suakta sak uh hi.

²⁶ Tua ciangin Hit mite gamah tua mipa pai-in khuapi khat sat a, a min pen Luz ci-in phuak hi; tu dongin tua khua min in tua mah ahi hi.

Manasseh leh Efraim’ Zawhna Ciang

²⁷ Manasseh in Bethshean leh a khua neute-a teeng mite, Ta-anak leh a khua neute-a teeng mite, Dor leh a khua neute-a teeng mite, Ibleam leh a khua neute-a teeng mite ahi a, Megiddo leh a khua neute-a teeng mite ahi zongin hawlkhia lo hi; ahih hangin Kanaan mite tua leitangah teeng teitei uh hi.

²⁸ Israelte a thahat ciangin amaute in aana tawh na a sem dingin Kanaan mite koih uh a, hawlkhia siang lo uh hi.

²⁹ Efraim in Gezer-ah a teeng Kanaan mite hawlkhia lo hi; tua ahih manin Kanaan mite Gezer-ah amaute lakah teeng uh hi.

A Nam dangte’ Zawhna Ciang

³⁰ Zebulun in Kitron-a teeng mite ahi a, Nahalol-a teeng mite ahi zongin hawlkhia lo hi; Kanaan mite amaute lakah teengin aana tawh nasemte suak uh hi.

³¹ Asher in Akko-a teeng mite, Sidon-a teeng mite, Ahlab-a teeng mite, Aksib-a teengte, Helbah-a teengte, Afik-a teengte ahi a, Rebon-a teengte ahi zongin hawlkhia lo hi;

³² tua gam-a teeng Kanaan mite lakah Asher mite teeng uh hi; bang hang hiam cih leh amaute in hawlkhia lo uh hi.

³³ Naftali in Bethshemesh-a teengte ahi a, Beth-anath-a teengte ahi zongin hawlkhia loin, tua gam-a teeng Kanaan mite lakah teeng uh hi; ahi zongin Bethshemesh leh Beth-anath-a teeng mite in amaute adingin aana tawh na a sem mite suak uh hi.

³⁴ Amor mite in mual gamah Dan mite notkik uh hi, amaute in zang gamah paisuk sak lo uh hi;

³⁵ Amor mite, Harheres, Aijalon, leh Sha-albim-ah teeng teitei uh hi, ahih hangin Josef innkuante in amaute gawt semsem a, amaute in aana tawh nasemte suak hi.

³⁶ Amor mite’ gamgi in Akrabbim kahtohna, Sela leh a tung lam pan kipan hi.