Thuhilh-sia 8 - Tedim Bible

¹ Mipilte bek in na akhiatna taktak theithei uh hi. Pilna in mipilte maitaisak a, a hehmai bei sak hi.

Kumpipa’ Thumang In

² Kumpipa hong sawl bangin gamta in la, Pasian’ tungah thu mawkciam pak kei in.

³ Kumpipa in a ut peuhpeuh hih thei ahih manin, ama kiang panin paikhia in la, ama lungkim lohna hih teitei kei in.

⁴ Kumpipa in aana neihna tawh gamta hi; ama gen bangin gamta in; kuamah in amah nial zo lo hi.

⁵ Ama thu a mangte in haksakna tuak kha lo ding hi; mipilte in a gamtat nading zia leh a hun hoih thei uh hi.

Pasian’ Sepna Ziate Mihing’ Theihzawh Hilo

⁶ Na khatpeuh i hih ding ciangin a kilawm hun, leh a ngeina man om a, ahi zongin eite in bangmah i thei kei hi.

⁷ A hong piang ding thu i thei kei a, a hong gen thei zong kuamah om lo hi.

⁸ A sih ding a pelh thei, a sih ding hun a phiat thei kuamah om lo hi. Gal a om ciangin gal launa a pelh thei, siatna sungah a lut ciangin a peng thei kuamah om lo hi.

⁹ Leitunga gamtatnate ka ngaihsut ciangin, hih thute ka mukhia hi. Mi khat in midang tungah vangliatna nei-in, a uk sung mite a gimsak gawp hun om hi.

¹⁰ Migilote si-in kivui a, a siat gamtatna khua sunga mite mah in han panin a ciah ciangun amah a phat vevena uh ka mu hi.

¹¹ A mawhte kidaantat pahpah lo ahih manin, mihingte in khialh ding haksa sa lo uh hi.

¹² Mawhnei khat in zavei dong siatna bawl napi-in, a khan’ sau veve hi. Ahi zongin, “Pasian a zahtakte adingin, thu khempeuh nuam ding hi.

¹³ Migilote’ adingin, thu nuam lo ding a, amaute in Pasian zahtak lo uh ahih manin, a nuntak hun uh nilim bangin bei pak ding a, khan’sih ding uh hi,” kici hi.

¹⁴ Ahi zongin hih thugenna a mawknapi ahi hi. Leitunga thupiangte ngaihsun dih in: khatveivei midikte’ in migilote’ daantuah ding teng tuak zawsop a, migilote in midikte’ thaman ngah ding teng ngah zawsop uh hi. Hih thu in a hai vai, a mawkna taktak ahi hi.

¹⁵ Tua ahih ciangin mihing in hih leitungah nuam a sak theih ding adang om lo ahih manin, an ne tui dawnin nuamsa-in a om ding bek ahi hi. Pasian in hih leitungah nuntak a piak sung teng, a sep thaman a ngah theih ding hih bek om hi.

¹⁶ Pil ding hahkatin, leitunga thupiangte ka theih ciangin, sun leh zanin ihmu lo liangin i om hangin,

¹⁷ Pasian’ nasepna i theih zawh lohna ka phawk hi. Mihingte in bangzahin i hahkat hangin kithei khia zo lo hi. Mipilte in thei a kisak hangun, bangmah thei lo uh hi.